O HOSEA 10 - MA JOU AI BUKU O ABARI MA OA

¹ O Israeloka hokä o angguru ma gota ma utu ma hohoko duru i wöe. I holoi i dogo-dogo manga kaya, i holoi i wöe o huhuba mangï yo diai. I holoi i mata-mata i de maenanga, i holoi i rahai oli yo diai o gomanga ma tugu yahö huba-huba.

² Hagala o nyawa manga hininga i riko-rikotua gënanga, oraha nënanga kokiani ya tagongo manga baradoha ma hasili. Ma Jou Madutu aha wa wedere toönanga manga huhuba mangï, deʼ wa kilianga toönanga manga gomanga ma tugu.

³ I tedekanokaua önanga aha yo temo, ”Ngohe koiwa nanga koano hababu ngone hï modongua ma Jouika. Okia ma guna o koano woma tengo mangale ngone?”

⁴ Onanga yo temo ihi hohomoa deʼ yo diai o jaji yo elu-eluku inoli ihi l̄el̄eo jaji ma guna koiwa-iwa. O tita ya takaidulu hiadono i adi-adilua i wango hokä idö dato-datomo dema padoha oka o dumule oka yapö paso-pasoloka.

⁵ O Samaria ma kota yogö gogere aha yo hawana, önanga deʼ o imam-imam yolö leleani o hapi o gurasi o Betel mabereraka gënanga aha manga hininga i huha deʼ yo ari karana hagala toönanga manga gomanga ma mulia gënanga i hihangoka.

⁶ O gomanga gënanga aha ya toraka o Asyur ika la yahihadia o koano yo momuliaika. O Israel ya moteke o datoro ya dodiai önanga ya make o mal̄eke deʼ ya hi kauku.

⁷ O Samaria aha i wedere deʼ manga koano yoiki iwi ao hoko o gota ma dobiki o akere ihi l̄ahini.

⁸ O puji-puji mangï o Betel ma doporonoka o Israel manyawa ya huba-huba o gomanga manga ngï aha ya wede-wederuku. O hihika deʼ o momo aha i wango toönanga manga huhuba mangï oka. Done önanga aha yo pöaka hagala o l̄oku-l̄oku ika, ”Nimï tamunuku ngomi!” deʼ hagala o doporonika, ”Nimï tapaluku ngomi!”

O Israel yä gelenga o hukumanga

⁹ Ma Jou wotemo, ”Kade i mulaenge idö dadi o Gibea ma ka, o Israel manyawa komaiwahi ima togumu yo diai o baradoha ihi lawani Ngohi. Hababu genanga o Gibea mabereraka ö aha önanga yä tapal̄u o parangi.

¹⁰ Ngohi aha tä parangi hagala o nyawa o baradoha gënanga, deʼ tä hukumu önanga. Hagala o hoana deo berera aha ima kodogoino la yä lawani önanga, deʼ önanga aha yä hukumu karana toönanga manga baradoha ma ngöe gënanga.

¹¹ Mahira o Israel hokä o hapi magö yö ihi biaha yaoa, deʼ yö igo i hidoro o gandum. Ngohi i paralu ua tö gelenga o momoku ma tomara ma rorahaiuku gënanga. Mä öraha nënanga Ngohi ta putuhoka la tä pakisa yo karajanga i tubuho. O Yehuda Tä huloko yo pajeko, deʼ o Israel Tä huloko yo garu.

¹² Ngohi tä temo, ’Hei Israel! Helenga o dumule ma hungi mangale ngini, nihi barihi o adili ma gihihi, deʼ ni utuku o barakati ihi hasi-hasili nia dora ma goungu Ngohino. Hababu to ënanga ma orahoka ngona nohi lingiri Ngohi, ani Jou. Ngohi aha to böa deʼ tonï dotawana ngonauku Ahi barakati ngona uku barakati o awana.’

¹³ Mä ngona na diai na takaidulu; ngona nohidailako i totorou, deʼ no utuku i adi-adilua. Ngona na ol̄omoka hagala o hohoko ani hasili tengeluku ma hasilino.” Ma Jou wo temoli, ”Hei Israel manyawa, karana ngini nia ngaku de hagala nia kereta nihi poparangi deʼ manga ngöe nia tentara-tentara,

¹⁴ done o kawaha aha yä tapal̄u o parangi, deʼ mata-mata nia bebeno o mehele aha ya oli wede-wederuku. Makaadanga idä dadi aha hokä mawange oka ma Koano Salman wa binaha o Ber-Arbel ma kota o parangi magoronaka, deʼ wä tapal̄u hayo wede-wederuku o ayo-ayo kamamoi de manga ngoha-ngohaka.

¹⁵ Gënanga doka aha idadi dede ngini, hei o Betel nigö gogere karana ngini ni diai o dorou ma ago-agomo. Maöraha ibatingi tigi-tigi i tebini, itaiti de iböto o parangi emulaenge, nia koano aha wo honenge.”