O HIMATOKO 7 - MA JOU AI BUKU O ABARI MA OA

O umati o Israeloka yaribuhu o ratuhu moi de moruata de iata

¹ Ipaha gënanga, ngohi tämäke o malaekat yaruata imaoko o dunia malibuku iata. Onanga yatumungu o hidal̄oko iata o duniaka laʼ uha naga o hidal̄oko iwuwu o dudungoka ekola o ngötoka, ekola o gota-gotaika.

² Daha ngohi timäke o malaekat womatëngo mahomoa o wange mahiwaroka de waiha. Unanga woao o segel ma Jou Madutu wowango-wangoka. De aiilingi makuata o malaekat gënanga wä ahoko o malaekat yäruata gënanga yamäkeoka o kuaha ma Jou Madutuino mangale yakilianga o dudungu deʼ o ngöto.

³ O malaekat gënanga itemo, ”Wahiohi niakilianga o dudungu deʼ o ngöto, ekola o gota-gotaö nako ngomi mihidoakuahi o segel manonako manga bimaoaoko tongone nanga Jou Madutu ai gogilaongo.”

⁴ Daha ihihingahu ngohi naga o gegetongo yaribuhu o ratuhu moi de moruata de iata manyawa yahidöaka o segel manonako ma Jou Madutuino manga bimaoaoko. O nyawa gënanga yal̄ë o Israeloka manga hoana ngimoi de hinotoino;

⁵ o hoana moi-moino yaribuhu ngimoi de hinoto manyawa. Enagënanga: O Yehudaino mahoana, o Ruben, o Gad,

⁶ o Asyer, o Naftali, o Manasye,

⁷ o Simeon, o Lewi, o Isakhar,

⁸ o Zebulon, o Yusuf, deʼ o Benyamin.

O nyawa mangöto kabiahaua mangangöe

⁹ Ipaha gënanga ngohi tomalegali, daha tamäke mangöto o nyawa kabiahaua mangangöe – koiwa naga o nyawa moi yakunu yaetongo magegetongo! Onanga manyawa ganga moi-moi o hoana de o berera, o hoana, o negara, deʼ o bahasa. De imahinoauku o juba magare-garehe deʼ imahijöika o biso magota matage-tage mangagiamoka, o nyawa yowöe-wöe gënanga imaokoino yohimangika o kuruhi imomulia deʼ iwihimangika o Duba ma Ngohaka gënanga.

¹⁰ Daha de manga ilingi makuatil̄e önanga yopöaka, ”Tongone nanga halamati iböa nanga Jou Madutuino, wogogeruku o kuruhi imomulia mal̄okuoka, deʼ o Duba ma Ngohakino gënanga!”

¹¹ O malaekat mata-mata imaoko yakiloliti o kuruhi imomulia deʼ o tutuda-tutuda de o dodadi iata gënanga. O malaekat-malaekat gënanga yatilabuku o kuruhi imomulia mahimangoka daha iwihuba ma Jou Madutu.

¹² Onanga yopöaka, ”Amin! Hihigiriri tongone nanga Jou Madutu womulia deʼ wobarija. Unangika kiani hawöe-wöe hotemo sukur deʼ o horomati. Unanga wokuaha deʼ wokuata kahiado-adonika! Amin.”

¹³ Womatëngo o tutuda-tutudaino gënanga wohileha ngohino, ”O nyawa manga juba magare-garehe nënanga, önanga o nagona deʼ onanga kiaka deyaino?”

¹⁴ Ngohi tohaluhu, ”Ngohi tohiorikua, Tuanga. Tuanga mahirete nohiöriki.” Unanga wohitemo ngohino, ”O nyawa nënanga yohalamatoka maöraha yatilakuru o aniaya kohagiria. Onanga yafokaka manga juba de yadiai idadi iarehe de o Duba ma Ngohaka ma awunu gënanga.

¹⁵ Hababu gënanga önanga imaoko ma Jou Madutu aikuruhi imomulia mahimangoka, deʼ iwipuji Unangika o hutu de o wange ma Jou Madutu ai Tau magoronaka. Deʼ Unanga wogögogere Ai kuruhi imomulia mal̄okuoka gënanga aha woböa dede önanga la wahohongino önanga.

¹⁶ Onanga aha yamäookaua o hahini ekola o kiriti madudungu; o wange ekola mahaukö i kokiria aha yadahaukokaua önanga,

¹⁷ hababu o Duba ma Ngohaka igögogeruku o kuruhi imomulia mahidodogoronaka gënanga aha idadi toönanga mangagogöana. Unanga aha watuda önanga o akere majobubuika yahidöa-döaka o wowango. Deʼ ma Jou Madutu aha waehe hagala o köngo to önanga manga lakoino.”