O HIMATOKO 3 - MA JOU AI BUKU O ABARI MA OA

O behehongo mangale o Sardis

¹ ”O jemaat Sardis mamalaekatika, notulihi hokonënanga: Nënanga o behehongo Unangino Ai womaha tumidi ma Jou Madutuino deʼ Ai murumu tumidi gënanga. Ngohi tohiöriki okia ngini niadiai. Yatobari ngini niwango, enahioko ngini nihonenge!

² Hababu gënanga, nimomiki, deʼ niakuata okia kanagahi nginioka, koihonenguahi mata-mata gënanga. Hababu Ngohi tamäkeokia ngini niadiai kamoiö de itotomuahi ma Jou Madutu aihimangoka.

³ Hoʼ, niohiningali okia kahuruono inidotokoka nginika deʼ okia ngini nioihe-ihenoka. Nihidagi gënanga deʼ ibötohi nidiai o baradoha. Nako ngini nimomikua, Ngohi aha toböa nginika hokä yotohi-tohiki; deʼ ngini aha nihiorikua maöraha muruonoka Ngohi toböa.

⁴ Mä ngini niahidogoronaka o Sardisoka kanagahi o nyawa imägöana laʼ manga pakeanga itatapu itebini. Onanga gënanga aha imadagi mimakinïki de Ngohi de mangapakeanga magare-garehe, hababu önanga ipatutu mangale gënanga.

⁵ Onanga yoöutu-utumika aha yahinoa o juba magare-garehe. Toönanga manga romanga aha taeheua o Nyawa yo Wango-wango ma Bukuoka. Deʼ Ahi Ama aihimangoka deʼ Ai malaekat-malaekat, Ngohi aha tohigoungu önanga ganga to Ngohi madutu.

⁶ O nagona honanga yakunu yoihene, kokiani yohohininga okia ma Jou Madutu ai Womaha i temoka o jemaat-jemaatika!”

O behehongo mangale o Filadelfia

⁷ ”O jemaat Filadelfia mamalaekatika, natulihi hokonënanga: Nënanga o behehongo Unangino wotebi-tebini de duru madutu. Unanga to Daud aikusi majojo; nako Unanga wahelenga, o nyawa moiuao yakunu yatamunu, deʼ nako Unanga watamunu, o nyawa moiuao yakunu yahelenga.

⁸ Ngohi tohiöriki okia ngini niadiai. Ngohi tohiöriki ngini hokokiaua niabuturungu; mangini niamotekoka Ahi dodötoko deʼ nisetia Ngohino. Mangale ngini tini dobelengaka o ngorana moi, ka o nagonaö dika yakunu yatamunu.

⁹ Niohininga nënanga: O nyawa yodadi o Ibilihi aiumati gënanga, yoelu-eluku ihigoungu manga diri o Yahudioka ena hioko kowali, aha Tadiai hiädono önanga yoböa yatilabuku niahimangoka. Deʼ onanga aha ihiöriki Ngohi tinidora-dora.

¹⁰ Hababu ngini niamotekoka Ahi pareta laʼ nitäna, Ngohiö aha Tinihohongino maöraha o huha aha yatapal̄u o dunia ingodumu. O hali gënanga aha idadi mangale yäcoba o nyawa o duniaka mata-mata.

¹¹ Ngohi toböa de mahiapotoka! Niogöana nihidodiai okianaga nginioka, laʼ o nyawa moiuaö yaora niautumu mangongikeino.

¹² O nyawa youtu-utumu, aha Tahidadi hokä o liate ahi Jou Madutu aitau itebi-tebini magoronaka, deʼ Unanga aha wogogere o ngï gënanga kahiado-adonika. Ahi Jou Madutu airomanga, deʼ ahi Jou Madutu aikota maromanga – enagënanga o Yerusalem mahungi aha iuti o horogauku, ahi Jou Madutuku – aha tatulihi o nyawa manga dirika gënanga. Hokogenangö ahiromanga mahungi aha tatulihi manga dirika.

¹³ O nagona honanga yakunu yoihene, kokiani yohohininga okia ma Jou Madutu ai Womaha i temoka o jemaat-jemaatika!”

O behehongo mangale o Laodikia

¹⁴ ”O jemaat Laodikia mamalaekatika, notulihi hokonënanga: Nënanga o behehongo o Amin womo Muliaka, o hakihi wososetia deʼ madiai, hagala moi-moi matiti ma Jou Madutu wohidö dädadi.

¹⁵ Ngohi tohiöriki okia ngini niadiai; Ngohi tohiöriki ngini nimätua deʼ nihaukuaö. Ngini kokiani itimoi, nimäta ekola nihauku!

¹⁶ Mä ngini kani bikihau; nihaukua, nimätaö makowali. Hababu gënanga Ngohi aha tinihingunanga ngini nihupu Ahi uru magoronaiha.

¹⁷ Ngini niato, ’Ngomi mikaya deʼ irupa-rupa iyaoaka; okia-kiakaua tongomi miakuranga.’ Mä ngini nihiörikua hokokia niahangihara deʼ hokokia yahuha niarupa! Ngini nimihikini, nimahekono deʼ nipiloko.

¹⁸ Hababu gënanga Ngohi tinihitiari ngini laʼ nimaija Ngohino o gurasi, enagënanga o gurasi madutu, hupaya ngini nidadi nikaya. Nima ijaö o pakeanga magare-garehe Ngohino, hupaya ngini de niapakeangoka deʼ nihitamunu tingini nia röehe imaheko-hekonoka deʼ inihimömal̄e-mal̄eke. Deʼ nima ijali o houru mangale nihinauhu nialakoino laʼ ngini yakunu nimahi öriki.

¹⁹ O nyawa Tadora-dora önanga Tataaere deʼ Tagohara. Karana gënanga kokiani ngini niahininga niaputurungu, deʼ ibötohi nidiai o baradoha.

²⁰ Niolega! Ngohi tomaokoino o ngorana mahimangoka deʼ Tötolo. Nako naga o nyawa Ahi ilingi yoihene, deʼ yahelenga o ngorana, Ngohi aha towohama mimamäke de ünanga; Ngohi aha tol̄omo dede ünanga deʼ unanga wol̄omo dede Ngohi.

²¹ Onanga youtu-utumu, aha Tahigumal̄a yogogere Ahi kuruhi imomuliaka dede Ngohi, hokä imatero Ngohi mahireteö toutumoka deʼ orahanënanga togogere de Ahi Ama Ai kuruhi imomuliaka.

²² O nagona honanga yakunu yoihene, kokiani yohohininga okia ma Jou Madutu ai Womaha itemoka o jemaat-jemaatika!”