O HIMATOKO 2 - MA JOU AI BUKU O ABARI MA OA

O behehongo mangale o Efesus

¹ ”O jemaat Efesus mamalaekatika, notulihi hokonënanga: Nënanga o behehongo Unangino wasosöika o murumu tumidi Ai giama manirakoka, de womadagi o hilo o gurasi matotodenge tumidi mahidogoronaka gënanga.

² Ngohi tohiöriki okia ngini niadiai: Ngini nimanarama kahagiria deʼ ngini duru nitongohono. Ngohi tohiöriki ngini nihidoakua niahininga o nyawa madorouika. Deʼ hagala o nyawa ihigoungu manga diri o rasul enahioko kowali, ngini niaujioka, deʼ ngini niamäke önanga o nyawa yototengeluku.

³ Ngini nisabari deʼ ngini niatagongo o hangihara karana Ngohi, deʼ tingini nianganono itoakua.

⁴ Mä nenanga Ahi kabaratanga nginika: Ngini nihihininga okauaoli hokä mahira.

⁵ Hababu gënanga, niohininga hokokia magurutuku iniotakoka ngini! Ibötohi nidiai o baradoha, deʼ niadiai okia mahira ngini niadodiai. Nako kowali, aha Ngohi toböa nginika deʼ tarahuku niahilo matotodenge mangïoka gënanga.

⁶ Mä naga okianaga moi maoa nginioka, enagënanga: Ngini niodohata o Nikolaus iwinöninïki manga manarama, Ngohiö ma todohata.

⁷ O nagona honanga yakunu yoihene, kokiani yohohininga okia itemoka ma Jou Madutu ai Womaha o jemaat-jemaatika! Onanga yoöutu-utumu aha Tahigumal̄a yaol̄omo o hohoko o ngango magotaino iwowango-wango ma Jou Madutu ai Dumuleoka.”

O behehongo mangale o Smirna

⁸ ”O jemaat Smirna mamalaekatika, notulihi hokonënanga: Nënanga o behehongo Unangino madodihiraka deʼ mabobahaka – wohonengoka deʼ wowangokali.

⁹ Ngohi tohiöriki hagala tingini niahuha; Ngohi tohiöriki ngini nimihikini – mä imoteke madiai ngini nikaya! Ngohi tohiöriki o romanga madorou inidotumo nginika, hagala o nyawa ihigoungu mangadiri o Yahudioka, enahioko kowali; önanga ganga o Ibilihi aiumati!

¹⁰ Uha nihawana aha niatagongo o hangihara, koitedekanokauaoli ngini kiani niamäo. Niohininga, o Ibilihi aha wahingohama o hidoku moi nginioka o bui magoronaika mangale initaili ngini. Ngini aha niatagongo o hangihara o wange ngimoino madekana. Kokiani ngini nisetia Ngohino hiädono nihonenge, ngohi aha tinihidöaka nginika o ngango madutu deʼ ikakali hokänia utumu mangongike.

¹¹ O nagona honanga yakunu yoihene, kokiani yohohininga okia ma Jou Madutu ai Womaha itemoka o jemaat-jemaatika! Onanga yoöutu-utumu, aha kautuö de koiwa yatagongo okia naga mangale o honenge mahinotoka.”

O behehongo mangale o Pergamus

¹² ”O jemaat Pergamus mamalaekatika, notulihi hokonënanga: Nënanga o behehongo Unangino womajoika o oworo kahadöto, mahimanga de maporete kamadöto.

¹³ Ngohi tohiöriki kiaka ngini nigogere, enagënanga o ngï o Ibilihi imä kokadatoka. Ngini nisetia Ngohino. Idogoli maöraha o Antipas, Ahi hakihi wososetia gënanga, iwitoma niahimangoka o Ibilihi mangïoka, mangini nimahi pongonua, ngini nihingaku Ngohino.

¹⁴ Ngaro hokogënanga naga o hali muruono naga nginioka Ngohi tösanangiua: Naga o nyawa o hidoku moi niahidogoronaka yanïki okia o Bileam wododoto-dotokoka. O Bileam widotoko o Balak sarakia wahiotaka o umati Israel o baradoha magoronauku; de wäbaja önanga yaol̄omo o inomo ihinia-niatoka o gomangika deʼ yadiai o hali-o hali itotorou.

¹⁵ Hokogenangö naga niahidogoronaka ima hijöjö o Nikolaus iwininïki manga dodotokika.

¹⁶ Hababu gënanga ibötohi nidiai o baradoha! Nako kowali, kabotino okahi Ngohi aha toböa nginika deʼ Taparangi o nyawa gënanga de o oworo naga Ahi uruoka.

¹⁷ O nagona honanga yakunu yoihene, kokiani yohohininga okia ma Jou Madutu ai Womaha itemoka o jemaat-jemaatika! Onanga yoöutu-utumu, aha Tahigumal̄a yaol̄omo o manna io iu-iunu, deʼ moi-moi aha yatarima Ngohioka o helewo moi magare-garehe. O helewoika gënanga itulihi o romanga mahungi moi, o nagonaö dika ihiörikua, mahomoa de o nyawa yatotarima.”

O behehongo mangale o Tiatira

¹⁸ ”O jemaat Tiatira mamalaekatika, notulihi hoko nënanga: Nënanga o behehongo ma Jou Madutu ai Ngohakoka ailako macahaya hokä o uku, de Ai l̄ou macahaya hokä o tabaga haharongika.

¹⁹ Ngohi tohiöriki mata-mata ngini niadiai – Ngohi tohiöriki ngini niädora niadodiawo o nyawa, ngini nisetia, ngini nimanarama, deʼ ngini nitongohono niatagongo o hangihara. Ngohi tohiöriki örahanënanga ngini nimanarama iholoi iwöe ngaro de mahira.

²⁰ Mä nenanga ahi kabaratanga nginika: Ngini nihidöaka niahininga o ngo Izebelika, o ngoheka momangaku amidiri ma Jou Madutu aihuhuloko gënanga. Komanga ngöeoka Ahi gogilaongo matipu deʼ madotoko mangale yodiai itotorou deʼ mangale yaol̄omo o inomo ihinöniatoka o gomangika.

²¹ Tomihi döakoka öraha munangika mangale ibötohi modiai o baradoha, mä munanga möluku momatogumu modiai o hali-o hali itötotorou gënanga.

²² Niohininga! Ngohi aha tomihipaka münanga hiädono kämihiri amingidu-ngidu mangïoka. Genangoka münanga de o nyawa ima koköhowono dede münanga aha duru yohangihara. Orahanënanga mata-mata gënanga aha Tadiai – sowaliua nako önanga imatogumu yodiai o hali-o hali itotorou imakinïki dede münanga.

²³ Iminöninïki ahao Tätoma la mata-mata o jemaat yamäo Ngohi ne ünanga todumunu o nyawa manga dibanga deʼ manga hiningaika. Aha Tabalahi imoteke tingini niamanarama moi-moi.

²⁴ Mä ngini mahomoa o Tiatiraka nianïkua o dodötoko madorou gënanga, deʼ nimadotokua o Ibilihi madodötoko. Ngohi totemo, Ngohi aha todogoua nginika inihitubuho niamomoku.

²⁵ Mä damä hiädono maöraha Ngohi toböa, kokiani ngini nitatapu nianïki okia ngini niapäkeinoka.

^26-27 Onanga yoöutu-utumu, deʼ hiädono mabaha gila-gila yadiai okia toigo-igo, aha Tahidöaka o kuaha hokä imatero Tatotarima ahi Amaino. Onanga aha yatarima o kuaha Ngohioka mangale yapareta o hoana de o berera de o diki-diki o behi, deʼ mangale yawedere o hoana de o berera gënanga hokä o bohoko o tonaka.

²⁸ Onanga aha yatarima o koruku Ngohioka.

²⁹ O nagona honanga yakunu yoihene, kokiani yohohininga okia ma Jou Madutu ai Womaha i temoka o jemaat-jemaatika.”