O HIMATOKO 16 - MA JOU AI BUKU O ABARI MA OA

Mangï-mangï ma Jou Madutu aidohata

¹ Daha ngohi toihene o ilingi malago-agomo ma Jou Madutu ai Tau magoronaino yätemo o malaekat tumidika gënanga, ”Nioiki deʼ niapuraraha madol̄a ma Jou Madutu aidohata mangï tumidö gënanga o dunia mal̄okuuku!”

² O malaekat madodihiraka, ioiki de wapuraraha aingï madol̄a o duniauku. Done ipuda o boroho-o boroho malago-agomo deʼ duru kahähiri mata-mata o nyawaoka naga de manga nonako o aiwani gënanga, deʼ hagala o nyawaoka yahohuba-huba madulada.

³ Iböto de gënanga o malaekat mahinotoka wapuraraha aingï madol̄a o ngötuku. Done o ngöto maidadi hokä o nyawa mahonenge manga awunu, deʼ ihonenge hagala o dodadi naga iwöwango-wango o ngöto magoronaka.

⁴ Ipahaika o malaekat mahangeoka wapuraraha aingï madol̄a hagala o ngairuku deʼ o akere malakouku, homa akere mata-mata imadadi o awunu.

⁵ Ngohi toihene o malaekat wakokuaha o akere wotemo, ”O hukumanga Ngona nogelengaka ganga iadili, ya nö Tebi-tebini, Jou Madutu naga, deʼ nagaka!

⁶ Onanga yakopoaka ma Jou Madutu aiumati manga awunu deʼ o nabi-nabi manga awunu; örahanënanga ngona nadiai önanga o awunu yaokere. Itiai ipatutu gënanga mangale onangika!”

⁷ Daha ngohi toihene o ilingi o huhuba mangïino yotemo, ”Jou, Jou Madutu noko Kuaha, itiai deʼ iadili hagala o hukumanga naga Ngona nagogelengaka!”

⁸ Iböto de gënanga o malaekat maiatoka wapuraraha aingï madol̄a o wange malakoika, ho o wange malako maihigumal̄a yatuhuku o nyawa de töena mahauku ihohau-hauku gënanga.

⁹ O nyawa yatuhuku de töena mahauku duru ihohau-hauku, deʼ onanga yalolai ma Jou Madutu airomanga, wakokuaha hagala o balä ihoheto-hetongo. Ngaroka hokogënanga, önanga yoluku yotoba de to önanga manga baradoha deʼ yoluku ihigiriri ma Jou Madutu aimulia.

¹⁰ Daha o malaekat mamotoaka wapuraraha aingï madol̄a o aiwani gënanga makuruhi imomuliauku. Ho o aiwani gënanga mapopareta mata-mataika idadi ihuhutu deʼ o nyawa yagoli manga äkiri karana mangahiri.

¹¹ Daha önanga iwilolai ma Jou Madutu o horogaka karana önanga kamanga hiri deʼ karana toönanga manga boro-boroho. Mä onanga yoluku yotoba de toona manga manarama itotorou.

¹² Iböto de gënanga o malaekat mabutangaka wapuraraha aingï madol̄a o Efrat ma Ngairi maamo-amokuku gënanga. Done o ngairi gënanga idudungu hiädono o kokoano o wange mahiwariha yakunu yatilakuru imädagi.

¹³ Daha ngohi tamäke o womaha madorou gahumu hange marupa hokä o koro-koro. Moi-moi o koro-koro gënanga ihupu o dodiha o naga mauruiha, o aiwani mauruiha, deʼ o nabi madutua aiuruiha.

¹⁴ Onanga ganga o womaha madorou idodiai ihöhëra-hëranga. O womaha hangeö gënanga ioiki o kokoanoika mata-mata o dunia mata-mataika deʼ yätoomu önanga la imateke parangi o Wange ma amokoka, enagënanga o Wange ma Jou Madutu woko Kuahaino.

¹⁵ ”Niihene! Ngohi toböa hokä yotohi-tohiki! Youtumu o nyawa yotatapu imägöana yaböböto deʼ yögoana manga pakeanga, hiädono önanga yotagiua de manga hekonoka deʼ idadi yamal̄eke o kawaha manga himangoka!”

¹⁶ Ipahaika o womaha-o womaha gënanga yätoomu o kokoano gënanga o ngï moioka de o Ibrani mangademo ihiromanga Harmagedon.

¹⁷ Iböto de gënanga o malaekat matumidoka wapuraraha aingï madol̄a o gitawail̄e. Ho yoihene o ilingi ikökua-kuatil̄e o kuruhi imomulia ma Jou Madutu ai Tauino, naga yotemo, ”Yadiai ibötoka!”

¹⁸ Daha idadi o leletongo imakokepeleke de o dotoreke mailingi iruruhu, de ipotoka, inoli o ohu duru hömodongo. Maöraha o nyawa yahidadi komaiwahi idadi o ohu hokogënanga. O ohu nënanga duru hömodongo!

¹⁹ O kota malamo-amoko gënanga ibelaka idadi o regu hange, deʼ iwederoli o negara mata-mata makota o duniaka. Daha ma Jou Madutu womahininga mangale o Babel malamo-amoko gënanga. Ho ma Jou Madutu wadiai ënanga i okere o angguru ma Jou Madutu aiangguru mangïino – enagënanga Ai dohata maangguru ihebu-hebulu.

²⁰ O nühu mata-mata imahihanga, deʼ o l̄oku mä mata-mata ihihanga.

²¹ O awana o es ma ago-agomo, moi-moi madubuho o kilo moritoa, o dihangoka de itifa yätapal̄u hagala o nyawa. Ho önanga iwilolai ma Jou Madutu karana o bodito o awana o es hömodo-modongo gënanga.