O EFESUS 3 - MA JOU AI BUKU O ABARI MA OA

O Paulus ai manarama mangale o Yahudi okaua manyawa

¹ Hababu gënanga ngohi, o Paulus, ihi buika karana o Kristus Yesus mangale tingini o Yahudi okaua nia oa.

² Marai ngini ni ihenoka ma Jou Madutu, karana Ai hininga maoa, wohihidöakoka ngohino o manarama nënanga mangale nia oa.

³ Ma Jou Madutu wohi demoka Ai datoro irorahasia deʼ wohingahuoka ngohino. (Imakorona o hali nënanga de madipoko ngohi tatulihoka däkena,

⁴ deʼ nako ngini nia basa, ngini aha nimangarati o rahasia ima korona o Kristus hokä ngohi tomangarati.)

⁵ Mahira o rahasia gënanga komaiwahi yahingahu o nyawaika, mä oraha nënanga ma Jou Madutu ai Womaha ihi matokoka o rasul-rasul deʼ Ai nabi-nabiika.

⁶ O rahasia gënanga ganga nënanga: Itilakuru o Abari ma Oa gënanga, o Yahudi okaua manyawa imakinïki yamäo ma Jou Madutu ai barakati-barakati mahira wadiai duga-duga mangale o Yahudioka manyawa. O Yahudi okaua manyawa yodadioka o röehe moi mahidoku, deʼ imakinïki yatarima okia ma Jou Madutu wohi jäjajioka itilakuru o Kristus Yesus.

⁷ Ma Jou Madutu wohihidöaka ngohino o ngongike – enagënanga o manarama – mangale tohigerewoto o Abari ma Oa gënanga. Ngohi tatarima o ngongike gënanga itilakuru ma Jou Madutu ai kuaha imanarama ahi diri magoronaka.

⁸ Ma Jou Madutu ai umati yongodumu manga hidogoronaka ngohi duru topatutua. Mä ma Jou Madutu wohihidöaka ngohino o ngongike nënanga: o manarama mangale tohi abari o Abari ma Oa o Yahudi manyawa ikaua mangale o Kristus ai kaya koi mata-mataua;

⁹ deʼ itilakuru ngohiö hupaya mata-mata o nyawa ihiöriki sarakia ma Jou Madutu wohi dadadi o dunia magilolitino nënanga, wadiaioka Ai datoro ka öraha mahirahi warahasiahi o duniaika.

¹⁰ Ma Jou Madutu ai dungutu enagënanga hupaya öraha nënanga, itilakuru o jemaat, mata-mata yasosö o kuaha o gitawaka ihi öriki ma Jou Madutu ai barija hagala marupa magoronaka.

¹¹ Ma Jou Madutu wodiai gënanga imadäene de Ai datoro ikokakali, wadiaioka de madodagi o Kristus Yesus tongone nanga Jou.

¹² De nanga ngongaku o Kristusika de karana horimoi de Unanga, ngone inahigumal̄a mangale homahi tigi ma Jou Madutu de nanga ngongaku itototomo.

¹³ Hababu gënanga, tongohi ahi gogahoko enagënanga: uha nihawatere mangale okia ngohi taohana o hangihara karana ngini, hababu mata-mata gënanga ganga mangale nia oa.

O Kristus ai dora

¹⁴ Hababu gënanga ngohi tatilabuku o Ama ai himangoka.

¹⁵ Unangino moi-moi o tau madol̄a o horogaka deʼ o duniaka yatarima manga rupa imomulia.

¹⁶ Ngohi toma niata tanu ma Jou Madutu womomulia mangale woigo wohikuata nia hininga de ai Womaha.

¹⁷ Tanu karana ngini ningaku o Kristusika, o Kristus wogogere nia hininga magoronaka, deʼ nia ngango nihihol̄e de yakuaha de o dora.

¹⁸ Ngohi toma niata tanu nimakinïki de ma Jou Madutu ai umati mata-mata, ngini yakunu nio dumunu hoko kia ma amokika deʼ magurutu deʼ ma gurutil̄e deʼ malukuku o Kristus ai dora,

¹⁹ de o nyawa ma akali hakunua homangarati hi ädono iloluku-lukuku. Tanu ngini nia näko o Kristus ai dora gënanga, hiädono ngini ini ömanga de ma Jou Madutu ai diri itototomo.

²⁰ De ma Jou Madutu ai kuaha imanarama magiria tongone nanga diri magoronaka, ma Jou Madutu wakunu wadiai iholoi ikurutika iwöe de okia ngone hakunu hogahoko ekola hatibanga.

²¹ Kokiani niwihimulia ma Jou Madutu nia ngohaka de nia danonguku o jemaat magoronaka, i tilakuru o Kristus Yesus. Niwihigiriri ma Jou Madutu kahi ado-adonika! Amin.