O DANIEL 8 - MA JOU AI BUKU O ABARI MA OA

O Daniel ailolega mangale o duba manauru deʼ o kabingi manauru

¹ O taongo, mahangeoka o Belsyazar aipareta o taongo mahange oka, ngohi tamake o lolega mahinotoka.

² O lolega gënanga magoronaka tamake ahidiri naga o Elam mapropinsioka, o Susan mabereraka o Persia ma kota matitioka. Ngohi toma okoino o Ulai mangairi madatekoka,

³ deʼ o ngairi madatekoka gënanga tamake o duba manauru o dutumoi dematatadukoka o gahumu hinoto maguru-gurutu, moi iholoi ikurutu deʼ iholoi ihungi dema homoa.

⁴ Tamake o duba manauru gënanga itaduku yameta o wange madumuniha, o koremieuku deʼ o koreharail̄e. Koiwamoi o aiwani itongohono yöhimanga ekola i tana de toënanga ma kuaha. Enanga idiai mahininga mamau deʼ imaedenge.

⁵ Ma gogiriaka ngohi tapulo-pulono, tamake o dutu moi o kabingi manauru imapopopata o wange madumunu deyaoko yatilakuru o dunia. Hokogënanga majapati imapopata hiadono mal̄ou koyödigiukua o tonakuku. Mahi sogorona malako hinoto ma hidogorona naga moi o tataduku kaharamoioli.

⁶ O kabingi manauru gënanga ima hitigi-tigika o duba manaurika tamömake-make o ngairi gënanga madatekoka yaohana mameta demahatera.

⁷ Tatö tailako ënanga yaohana o duba manauru gënanga. Enanga hokogënanga mahatera hiadono yaohana o duba manauru gënanga deʼ yatobiki matataduku hinoto. O duba manauru gënanga imangakunua la imalawani. Enanga imahikaweli o tonakuku deʼ yadoko-doko, deʼ moiua o nyawa yakunu yöriwo.

⁸ O kabingi manauru gënanga kaidogo ilamoko. Mä maöraha ënanga imahiadono makuaha tubuika, matataduku mapako-pako gënanga itobili, de mangioka gënanga iwango o tataduku o gahumu iata i hera-heranga, moi-moi yatumutu mameta imakokohowono.

⁹ Mahomoa deʼ matatadukino i wango o tataduku maiteteke, idadi duru kahapako deʼ makuaha idogo iwoata mameta o koreharail̄e, mameta o wange mahiwaroko demameta o tonaka ihöhailoaika.

¹⁰ O tataduku gënanga idogo ipako hiadono yaoaka makuata mangale yaparangi o horoga matentara enagënanga hagala o murumu, koaholi yämuruono naga mangahidogoronaka deʼ yahikaweli o tonakuku deʼ yädoko-doko.

¹¹ Iwohamikaoli ünanga wïlawani o horoga matentara manga kapita, wahibareti ihihuba o huhuba o wange higetongo ihihöhuba-huba makapitaika gënanga, deʼ ya o pupuji ma tau mangale ünanga.

¹² De hagala o nyawa dokengoka yomulaenge yobaradoha deʼ ihi hubaua hagala o huhuba yahipatu-patutu gënanga. Done o puji madiai ihipakaoka o tonakuku. O tataduku gënanga ihasili hagala toënanga mamanarama magoronaka.

¹³ De ipaha toihene womatengo o malaekat yatemo mahomoaika, ”Hiadono hokokia madekana mata-mata tamö make-make o lolega gënanga magoronaka aha ihigila-gila? Hiadono muruonoka o baradoha maamoko gënanga yahitururu deo huhuba o wange ile? Hiadono muruonoka o horoga matentara deʼ o pupuji matau gënanga yadoko-doko?”

¹⁴ Toihene o malaekat womatengoli wohaluhu, ”Hiadono o wange o 1.150 moi ohi. Madekanino gënanga o huhuba o bimaoa deʼ o huhuba o ngorumino ihi hubaokaua. Gënanga dei boto daha ö o pupuji matau aha hoi hira-hiraoli.”

O Malaekat Gabriel wohitararono mamangarati o lolega gënanga

¹⁵ Maöraha ngohi magogiriaka tohidailako latohioriki tamangarati o lolega gënanga, i todokanino imaokoino ahihimangoka okianagamoi hokä o nyawa.

¹⁶ Toihene o ilingi yopöaka o Ulai ma Ngairi mahonongaka yato, ”Gabriel, nïhitararono unangika o lolega gënanga.”

¹⁷ Daha o Gabriel womaokoino ahihimangoka gënanga womahitigi ngohino. Ngohi duru tohawana, hiadono ngohi to ruba. O Gabriel wohitemo ngohino, ”Hei o nyawa yokokakaliua, ngona kokiani nohioriki o lolega gënanga enagënanga la yakorona oraha o wange mabaha.”

¹⁸ Magogiriaka ünanga wotemo-temo ngohi tokiditoko. Ma ünanga wohisö ngohi deʼ wohïriwo toma okoil̄eoli. Daha ünanga wohitemo,

¹⁹ ”Ngohi aha tonihingahu ngonaika okianaga aha idöda dadi hokä o gorehau ma Jou Madutu Ai dahata. Hababu anilolega gënanga ihidumutu oraha o wange ma habaika.

²⁰ O duba manauru namömake-make gënanga matataduku hinotoka ihinonako o Media deʼ o Persia mapareta.

²¹ O kabingi manauru gënanga ihinonako o Yunani mapareta, deʼ matataduku höhera-heranga malako hinoto mahidogoronaka gënanga enagënangala ma koano madodihiraka.

²² Iatö o tataduku ipuda hupu-hupu, ipahaika o tataduku madodihiraka gënanga i tobiki, ma mangarati o Yunani mapareta aha i regu-regu idadi o pareta iata, mä kamoiö ma aha imaketeroua makuata moiua o pareta madodihiraka gënanga.

²³ Itigi-tigi mabobaha hagala popareta-pareta gënanga, nako o dorou yadonoka mabatingil̄e, done aha ipuda womatengo ma koano aihaeke itotogowini, deʼ wosawaro wotipu.

²⁴ Unanga aha wo dadi duru koai kuata, mä karana aikuatua mahirete. Unanga aha wädotagao o binaha höboborohono deʼ okiadika wadodiai aha i hasili. Unanga aha wäbinaha hagala o nyawa yopoputurungu deʼ ma Jou Madutu Ai umati.

²⁵ Karana unanga wosawaro wotipu, hagala aitipu aha i hasili. Unanga aha aidiri wohikurutile, deʼ koiwa wohidoakua o hohininga iholoi ihira ünanga aha wäbinaha manga ngöe o nyawa. Iwohamika ünanga wobarani wïlawani ma Koano Duru wo lamo-amoko. Mä ünanga aha iwiwede-wederuku deo nyawaua manga kuata.

²⁶ O lolega mangale o huhuba o bimaoa deʼ o ngorumino tohi totararonoka ngonaika gënanga, igou-goungu aha idadi. Mä mata-mata gënanga aha idadi maöraha nangahimangika kamagurutikahi; hoʼ uha nohi ade-ade kaima tengoika o.”

²⁷ De ipaha ngohi tamao ihibole daha topanyake o wange muruono nagaino madekana. Gënanga deipahaika ngohi tomomiki deʼ tadiaioli hagala ahimanarama mangale ma koano. Mä ngohi ahi tobaliha iruae tapiki-pikiri o lolega gënanga deʼ takunua tamangarati.