O DANIEL 7 - MA JOU AI BUKU O ABARI MA OA

O DANIEL WOHI JARITA OKIA NAGA WAMÖ MAKE-MAKE 7:1–12:13 O Daniel wamake o lolega mangale o aiwani o dutu iata

^1-2 O hutu moiuku, o taongo madodihiraka o Belsyazar wodadi o koano o Babel mabereraka, ngohi o Daniel tonanere deʼ ta make okianaga hamömake-make. O nanere gënanga tatulihi deʼ o hingahu mangale okianaga tamö make-make gënanga ganga hokä hokonënanga: O hidaloko i poputurungu iwuwu hagala o hidal̄oko matitiino mahasili naga o rato o ngoto maago-agomoka.

³ De ipaha aiwani duru malago-agomo o dutu iata ipuda o gahi magoronail̄e, moi de moi imakokohowono.

⁴ Madodihiraka marupa hokä o singa, mä ënanga demagahuhuoka hokä o totaleo o garuda. Maöraha ngohita pulo-pulono i todokanino magahuhu irahuku deʼ i hoho; ënanga o tonakoka de imagoraka deʼ imaoko imatotiail̄e dema l̄ou hinoto hokä o nyawa, daha i hidöaka o nyawa maakali.

⁵ O aiwani mahinotoka marupa hokä o beruang. Enanga ima okoino dema l̄ou maporetoka, deʼ yao o dobiki hange o gumuruku makobongo maingiri mahidogoronaka. To ihene o ilingi yatemo enangika, ”Ika naol̄omo o hiode maakeme mangoe anihininga mamau!”

⁶ Maöraha ngohi magogiriaka tatötai lako, i puda aiwani mahomoa. Ma rupa hokä o macan tutul, mä maporetuku naga o totaleo magahuhu o gahumu iata, deʼ ënanga mahaeke iata. Enanga hölega-lega ikumati.

⁷ Maöraha ngohi ahigogiriaka tapulo-pulono, o aiwani ma iatoka ipuda. Enanga duru i kuata deʼ hömodongo inoli hö borohono. De toënanga maingiri mapako-pako deʼ madogowini hokä o behi, ënanga yawede-wederuku mainomo deʼ yaol̄omo kahäamoko, daha mahou-houohi yadoko-doko. Ima howono deo aiwani ihöhira-hira ënanga matataduku ngimoi.

⁸ Magogiriaka ngohi tatötailako matataduku itodokanino o gahumu moi ma tataduku mahomoa iwango mahidogoronaka. O tataduku gënanga maiteteke, mä yakunu ihidehoto deʼ yarahuku o gahumu hange o tataduku i hira-hira gënanga ma hidogoronaka. O tataduku maiteteke gënanga dema lakoka hokä o nyawa malako deʼ mauru i horeto itemo ihihohomoa de ima edenge.

Okianaga yamö make-make mangale Unanga wowango i kokakali

⁹ Orahautu magogiriaka ngohi katölega-legähi, o gahumu muruono naga o popareta makuruhi magogiria yakelenga. Daha Unanga wowöwango-wango kahiado-adonika Wogogeruku moi o popareta makuruhi mal̄okuoka gënanga. Ai pakeanga deʼ Ai tadauru magare-garehe mamedebini hokä o kapasi. Ai kuruhi mapopareta dema roda-roda i toka-tokara karana o uku majanga,

¹⁰ deʼ o uku matiti ihahuru o popareta makuruhiino gënanga. Dema ribuhu o nyawa iwïleleani Unanga, deʼ de manga juta-juta o nyawa imaokoino Ai himangoka. Deipaha yomulaenge yojuru hakimi, deʼ hagala o buku yahelenga.

¹¹ Maöraha ngohi magogiriaka tölega-lega, katoihenohi o tataduku maiteteke gënanga ihoreto ihihohomoa de imaedenge. Deipaha o aiwani maiatoka gënanga yatoma, deʼ toënanga mahonenge ihikaweli o ukuika hiadono ibinaha.

¹² O aiwani-aiwani mahomoa yal̄ëoka toënanga makuaha, mä önanga yahigumal̄a yowango hiadono maöraha ihitö tantuoka.

¹³ Ahilolega magoronaka o hutu gënanga, tamake okianaga moi hokä o nyawa. Unanga woboa deʼ iwihigilolitino o lobi daha woiki Unangika wo wango i kokakali deʼ iwi hinako unangika.

¹⁴ Unanga iwihidöaka o horomati deʼ o kuaha hokä o koano, hiädono hagala o nyawa o hoana deobereaino, o hoana deʼ o bahasa imahi gilaongo unangika. Ai kuaha aha itongohono kahiado-adonika, aipareta aha yalulua.

Okia o lolega-lolega naga wamö make-make gënanga wohitararono

¹⁵ O lolega-lolega okianaga tamake-make gënanga ihibingu deʼ ahihininga yaruae.

¹⁶ Daha tïtigika womatengo womaoko-okoino dokengoka deʼ togähoko o hitararono mangale mata-mata gënanga. Done ünangö wohihingahu.

¹⁷ Unanga wa hetongo, ”O dutu iata o aiwani duru ilölago-agomo gënanga ganga o popareta iata aha i puda o duniaka.

¹⁸ Mä ma Jou Madutu Duru Woko kurutil̄e aiumati aha yatarima o haku la yopareta deʼ manga popareta aha i tongöhono kahiado-adonika.”

¹⁹ Deipaha ngohi töigo tohioriki mamangarati o aiwani ma iatoka gënanga, toënanga mamangarati, imahowono dema homoa; hokogënanga höborohono deʼ yawede-wederuku ma inomo de yaol̄omo duru maamoko yagoli dema kuliti o tabaga deʼ maingiri o behi, inoli yadoko-doko mahou-houohi.

²⁰ Ngohi töigo tohiorikioli mangale matataduku ngimoi mahaekoka deʼ mangale matataduku maiteteke i puda ipahaika daha irahuku o gahumu hange o tataduku i hira-hiraino gënanga. O tataduku maiteteke gënanga toenanga demalako deʼ mauru i horeto ihihohomoa de imaedenge. Enanga iholoi höborohono ngaro deo tataduku-tataduku mahomoa gënanga.

²¹ Maöraha ngohi tatötailako, o tataduku gënanga iparangi yä lawani ma Jou Madutu Ai umati deʼ yähohihanga önanga.

²² De ipaha Unanga wowango i kokakali gënanga woboa daha wohidöaka o putuhu yahitiai. Ai umati ma Jou Madutu Duru Wokökurutil̄e. Maöraha yadonoka önanga yatarima o kuaha mangale yopareta.

²³ Nënanga doka o hitararono tamö tamake, ”O aiwani maiatoka gënanga enagënanga la opopareta maiatoka aha imaokoino o duniaka deʼ aha imakohowono de opopareta mahomoa. O popareta gënanga aha yawedere deʼ yaol̄omo duru maamoko o dunia yamode-modekika deʼ yapito-pitoko mahou-houohi.

²⁴ O tataduku ngimoi o gënanga enagënangala o koano yä ngimoi aha yapareta o popareta gënanga. De ipaha womatengo o koano ma homoa aha woboa, ünanga aha duru imakohowono deo kokoano madodihiraka, deʼ ünanga aha wähohihanga o koano yaruange.

²⁵ Unanga aha wotemo-temo wïlawani ma Jou Madutu Duru Wokökurutil̄e deʼ wätuku ma Jou Madutu Ai umati. Unanga aha wohidailako wangali ma Jou Madutu Ai umati manga tita-tita deʼ manga agama marameanga deʼ önanga aha yakuaha o taongo hange deʼ mahongeino madekana.

²⁶ Daha o juruhakimi o horogaka aha imatoomu deʼ yarahuku toënanga makuaha inoli yawedere ënanga hiadono ibinaha.

²⁷ O kuaha deo kabaharanga hagala o popareta o duniaka aha yahiadöaka ma Jou Madutu Duru Woko kurutil̄e aiumatika. Toönanga manga kuaha mangale yopareta aha koiwa mabaha deʼ mata-mata yokokuaha o duniaka aha ima gilaongo onangika de manga hingounu.”

²⁸ Hoko gënanga o hingahu nënanga. Ngohi duru ahihininga iruae hiadono idadi to mule-muleoka, mä moiua o nyawa tahingahu mangale mata-mata gënanga.