O DANIEL 4 - MA JOU AI BUKU O ABARI MA OA

O Nebukadnezar wonanere mengale mahinotoka

¹ Nënanga doka nihingahu ma koano Nebukadnezar wohingö ngahu-ngahu wohidödingo-dïngoto hagala o nyawa o koano deo o hoano ino, berera manyawaika, o höano suku deʼ o bahasa o dunia yomode-modekika: ”Ahi tabea de olola!

² Ngohi töigo tohijarita mangale ihöhera-heranga deʼ o nonako i hera-heranga wadodiaioka ma Jou Madutu Duru Woko kurutil̄e ngohino.

³ Hokokia maamoko ihöhera-heranga Wadodiai! Hokokia mamogiria o nonako i hera-hëranga Wodiai! Ma Jou Madutu aha wo dadi o koano mangale kahiado-adonika. Unanga wokuaha o öraha magurutu.”

⁴ Ngohi togogere kato sosanangi togogere ahikadato magoronaka deʼ towango okia-kiaua tokuranga.

⁵ Mä hutu moiuku maöraha ngohi magogiria tomaiduoka ihikiokoka ngohi tonanere deʼ tamake o lolega naga hamömake-make de duru kato hawa-hawanika.

⁶ Daha täahoko duru yososawaro naga o Babeloka; la ihitararono ngohino o nanere gënanga mamangarati.

⁷ Mä maöraha ihingö ngahu-ngahu okianaga idädadi, yososawaro yomatara, o nyawa de manga goganakoka deʼ yososawaro yotö tailako o murumu gënanga yoboaino deʼ täade-ade ahinanere gënanga onangika, komoiua yakunu ihitararono mamangarati.

⁸ Mabaha woboa o Daniel iwihetongo o Beltsazar hokä ahigikiri maromanga. O Daniel iwiomanga o gikiri i tebi-tebini mawomaha. Tohijarita ahimanere unangika ö, tato,

⁹ ”Hai, Beltsazar, o nyawa de manga gogamakeoka manga tutuda, ngohi tohioriki ngona iniomanga o gikiri i tebi-tebini mawomaha, hiadono koiwa naga o rahasia inïngiunu ngonaika. Noihene ahinanere nënanga, deʼ nohitararono to ënanga mamangarati.

¹⁰ Maöraha ngohi magogiria ihikiokoka, tamake o gota o utu moi iwango o dunia mahidogoronaka.

¹¹ O gota gënanga duru kahägurutil̄e; maroehe mapako deʼ ikuata. Madekara hiadono o dihangil̄e, hiadono yakunu yamake hagala o nyawa o duniaka.

¹² Ma hoka maboburere deʼ mahohoko duru kahangoe, yaoaka mangale yaolomo yogogogerea yamode-modekika. Hagala deʼ aiwani ihuhuhuku imaidu-idu mahohongo matimioka, deʼ hagala o tataleo imäigutu majaga-jagaka. Deʼ hagala o dodadi iwöwango-wango yakunu yaol̄omo mahohoko.

¹³ Maöraha ngohi magogiriaka tatiba-tibanga o lolega gënanga, tïmake womatengo o malaikat wouti o horogaka dewauku; ünanga tïmake woma hidiai deʼ womägoana.

¹⁴ Deʼ makuatile unanga wotemo wakua-kuatil̄e, ’Nia tolanga o gota ma utu gënanga deʼ niatobiki majaga-jaga, niarero mahoka deʼ nihi kabarihi mahohoko. Niaduhu hagala o aiwani imaluluiha imaidu matimioka deʼ hagala o totaleo imaigu-igutu majaga-jagaka.

¹⁵ Mä niamal̄aika maagere igogogere o tonaka magoronaka, nialiko de orante o behi deʼ o tabaga daha niodogumal̄aika otonaka malua-luasoka dema mömomoka. Mal̄aika la ënanga yapeha-pehaka o dumunitara, deʼ iwango kamamoi de hagala o aiwani inoli hagala iwö wango-wango.

¹⁶ Mal̄aikala ainyawa maakali ingali imadadi o aiwani maakali o taongo tumidino madekana.

¹⁷ Gënangadoka miaputuhu ngomi o malaekat-malaekat mimasosadia deʼ mimägoa-goana. Tongomi miadungutu enagënanga la hupaya hagala o nyawa o kiakadika ihigoungu, Ma Jou Madutu Duru Wokökurutile wakuaha o nyawa manga popareta deʼ o popareta gënanga wohidöaka o nagonaikadika wairi-iriki, ma idogoika boboloi ngaroko o nyawa duru, kökia-kiaua yädaene!ʼ

¹⁸ Hei Beltsazar, gënanga doka ahinanere. Oraha nënanga nahetongo ngohino toënanga mamangarati. Moiua o nyawa yososawaro nagahi o poparetaka yakunu yahetongo ngohino, mä ngona nakunu, hababu ngona iniomanga o gikiri itebi-tebini ma womaha.”

O Daniel wohitararono o nanere gënanga mamangarati

¹⁹ Woïhene gënanga o Daniel iwiheto-hetongoli o Beltsazar, iwi todokana deʼ wohera-herangoka öraha murüono nagaino. Done ngohi, ma Koano Nebukadnezar tïtemo unangika, ”Beltsazar, uha ngona nohawana karana o nanere deʼ toënanga mamangarati gënanga.” O Beltsazar wohaluhu, ”Ahi Tuanga, hokokia marahai o demo maade hagala idädadi ihingö ngahu-ngahu o nanere gënanga yätapal̄u hagala anihaturü ahi Tuanga deʼ uha ahi Tuanga.

²⁰ O gota mautu ahi Tuanga namömake-make gënanga hokogënanga magurutil̄e hiadono madekara yadono o dihangil̄e, deʼ yakunu yamake hagala o nyawa o duniaka.

²¹ Mahoka maboburere deʼ mahohoko iwöe hiadono yawedono yahidoaka yaol̄omo yamode-modekika yogogogere. Hagala o aiwani ihuhuhuku imä idu-idu mahohongo matimioka deʼ hagala o totaleo imäigutu majaga-jagaka.

²² Ya ahi Tuanga, kangona ahi Tüanga o gota magögurutil̄e de ikua-küata gënanga. Ani kabaharanga ahi Tüanga i dogo yadono o dihangil̄e deʼ ani kuaha ahiTüanga imahohe yadono o dunia mabahaika.

²³ Ahi Tüanga nïmakeoli o malaekat womatengo wouti o horogauku de inoli wotemo, ’Niatolanga o gota nënanga deʼ niabinaha, mä niamal̄aika maägere igögogere o tonaka magoronaka. Nialiko deo rante o behi deʼ o tabaga daha niamal̄aika o tonaka malua-luasoka dema mömomooka. Nia mal̄aika la ënanga yapeha-pehaka o dumunitara deʼ i wango kamamoi de hagala o aiwani o taongo tumidino madekana.’

²⁴ Ahi Tuanga, nënangadoka mamangarati namö make-make o lolega gënanga, de nenangadoka Ma Jou Madutu Duru Wokokurutil̄e aiputuhoka inikorona ahi Tuanga mahirete.

²⁵ Ahi Tuanga aha iniduhu o kawaha oka deʼ nowango hagala o aiwani mahidogoronaka o tonaka ilua-luasoka. O taongo o tumidino madekana ahi Tuanga aha naöl̄omo o momo o hokä o hapi deʼ nomä idu o lapanga ma dodewedangoka, hiadono inï peha-pëhaka o dumunitara. Gënanga de iboto ahi Tuanga aha nomangaku Ma Jou Madutu Duru Woko kurutil̄e wa kuaha o nyawa mapopareta, deʼ o popareta gënanga Wohidöaka onagonaikadika Wao iri-iriki.

²⁶ Hagala o malaekat ihipareta hupaya o gota maagere gënanga yamal̄aika o tonaka magoronaka. Gënanga mamangarati ahi Tuanga aha nodadioli o koano ipaha nomangaku ahi Tuanga Ma Jou Madutu wokuaha o dunia yamode-modekika.

²⁷ Hababu gënanga kokiani ahi Tüanga namoteke tongohi ahinasihati. Ahi Tuanga uha nobaradohaoli, mä nadiai okianaga maoa-oa deʼ i adi-ädili, deʼ nädora o nyawa mihikini. De hokogënanga ahi Tuanga aha kahirahi noutumu.”

²⁸ Mata-mata gënanga idadi ahi diriuku ma Koano Nebukadnezar.

²⁹ O Taongo ngimoi de hinoto ipahaika, maöraha ngohi totagi-tagi ahikadato malape i l̄oku-l̄okuil̄e o bunga-bunga madumuleoka o Babel mabereraka,

³⁰ ngohi totemo, ”Nia make hokokia mahailoa o Babel makota! Ngohi dika tohigoko idadi o negara makota matiti la ihinyata de ihigoungu ahikuaha deʼ ahikuata ahimulia deʼ ahikabaharanga!”

³¹ Ngohi totemo-temo tamal̄a owahi toihenoka o ilingi moi o dihanguku, ”Koano Nebukadnezar noihene nënanga! Ani kuaha hokä o koano ngonaka tal̄ëoka.

³² Ngona aha iniduhu o kawaha oka, deʼ nowango de o aiwani-aiwani o tonaka i lua-luasoka. O taongo tumidino madekana aha naol̄omo o momo hokä o hapi. Gënanga de iboto ngona aha nongaku ma Jou Madutu Duru Wokökurutil̄e wapareta o nyawa mapopareta deʼ o popareta gënanga wahidöaka o nagonaika dika Wa iri-iriki.”

³³ O öraha gënanga dika, o demo-demo gënanga idadi imahi nyata. Ngohi o Nebukadnezar ihiduhu o kawaha oka deʼ taol̄omo o momo hokä o hapi. Ahi röehe yapeha-pehaka o dumunitara, ahitadauru imadadi i kurutu hokä o kawihi magogo, deʼ ahikuliti magurutu hokä o totaleo maküliti.

O Nebukadnezar wïhigiriri ma Jou Madutu

³⁴ Maöraha o taongo tumidi gënanga yatioka, ngohitoma mataga o dihangil̄e, daha ilio ahimamao. Daha tïhigiriri ma Jou Madutu Duru Wokokurutile. Tïgorakil̄e deʼ tihimulia Unanga wowöwango-wango ikakali gënanga. ”Ma Jou Madutu aha wodadi o koano kahiado-adonika. Unanga wokuaha o öraha magurutu.

³⁵ Hagala o hoana deo berera o duniaka koiwa mamangarati. Ma Jou Madutu wakuaha o malaekat o horogaka deʼ o dunia ka yogogogere. Ko moiua ö o nyawa yäkunu yalawani Ai mau, koiwa yobarani yoleha okianaga Wadodiai.”

³⁶ Maöraha ahimamao i lioli ngohino, done o kabaharanga, o mulia deʼ yahöheto-hetongo ahipopareta ihigilioli ngohino. Ngohi ihibuhuku ahipopegawe deʼ ahipegawe yolago-agomo, deʼ ngohi ihihigilio ahipoparetaika, ma i wohamika ahimulia i holoi i lamoko dei hira-hira.

³⁷ Hoʼ orahanënanga ngohi, o Nebukadnezar tïhigiriri, tihikurutil̄e deʼ tihimulia o Horoga ma Koano. Hagala Ai manarama i tiai deʼ i adili, deʼ Unanga wakunu wähitipokouku o nyawa ima dodiai yoedenge.