O DANIEL 2 - MA JOU AI BUKU O ABARI MA OA

O Nebukadnezar ainanere

¹ O hutu moiuku, o taongo hinoto iboto ma koano Nebukadnezar wopareta, ünanga wonanere. Ai nanere gënanga aihininga duru yaruae, hiadono ünanga yakunua iwikioko.

² Karana gënanga wäahoko ihingahu-ngahu o kianaga aha idädadi, duru yososawaro yomatara, yo hou-houru deʼ hagala o nyawa yososawaro o gamake, mangale i hitararono ainanere gënanga.

³ Maöraha önanga imaokoino aihimangoka, ma koano wätemo, ”Ngohi tonanere, deʼ ahihininga iruae karana ngohi töigo tohioriki mamangarati!”

⁴ Onanga yohaluhu de o Aramoka manga demo, ”Nowango ahi Tuanga hiado-adonika! Nohijarita o nanere gënanga ngomiino, done ngomi aha mihitararono mamangarati.”

⁵ Makoano wäbaluhu, ”Ngohi tal̄eoka ta putuhoka hoko nënanga: Ngini kokiani nihingahu o nanere gënanga ngohino, hokogenangali mamangarati. Nako ngini niakunua, ngini aha inï lui-luituku deʼ niatau aha yakilianga ruba.

⁶ Ma nako ngini niakunu, ngini aha tini hidöaka o hadia ihöhailoa inoli o horomati maamoko. Aa, nihingahu örahanënanga ahinanere gënanga de toenanga mamangarati!”

⁷ Onanga yohaluholi, ”Kokiani ahi Tuanga ihira nohingahu o nanere gënanga ngomiino, gënanga dei boto ngomi aha mi hitararono toënanga mamangarati.”

⁸ Woihene genanga ma koano wohaluhu, ”Itiai hokä tatugaika. Ngini duga-duga niadohu-dohuku dika maöraha, karana ngini nihioriki ngohi ahidungutu

⁹ ngini mata-mata tini hukumu madodagi imakoketero nako ngini niakunua nihingahu o nanere gënanga ngohino. Ngini nimateke fakati la kahoko genangika nihielu-eluku deʼ ngohi nimahigogule de nianganono ngohi aha tangali ahiputuhu. Aa, nihingahu o nanere gënanga, done ngohi aha tohioriki ngini kaniäkunu nihimangarati toënanga mamangarati.

¹⁰ Duru yososawaro gënanga yohaluhu, o dunia yamode-modekika moiua o nyawa yakunu ihingahu o kianaga ahi Tuanga nomau-mau gënanga. De komaiwahi ma koano womatengo, hokokia aiämoko de aimulia, watuututu o hali hokogënanga duru yososawaro yomataraika, ihingahu-ngahuika o kianaga idädadi, deʼ hagala o nyawa yososawaro o gamakeika ai kadatoka.

¹¹ Ahi Tuanga nönahihu okianaga moi duru ihühuha. O nyawa moiua yakunu yatotomo sawaliua hagala o gikiri, maönanga yogogerua o nyawa manga hidogoronaka.”

¹² Woihene gënanga ma koano duru wongamo deʼ wohipareta la yätoma yososawaro mata-mata o Babeloka.

¹³ Daha o pareta gënanga ihingahu, deʼ yososawaro mata-mata, iwohamika o Daniel deʼ aidodiawo yalingiri la yatoma.

Ma Jou Madutu wohidumutu o nanere gënanga inoli toënanga mamangarati o Danielika

¹⁴ Done o Daniel imamake deʼ o Ariokh, ma koano aigogoana mangatutuda, womahidiaioka wohidagi o hukumanga yähohonenge gënanga.

¹⁵ O Daniel duru wohidodiai wïleha unangika, yadodoaho ma koano wohihupuoka o pareta mahauku gënanga, O Ariokh wohingahu o Danielika okianaga idädadioka.

¹⁶ Demajapatioka o Daniel wïhimanga ma koano deʼ wogahoko wihidöaka o oraha mangale wohitararono o nanere gënanga mamangarati.

¹⁷ Ai gogahoko watarima, deʼ o Daniel wolio o tauika deʼ wohingahu hagala idädadi gënanga o Hananyaika, O Misael de o Azaryaika.

¹⁸ Wähuloko imäniata Ma Jou Madutuika o horogaka hupaya Unanga wähayangi dewädora onangika deʼ wohingahu o nanere gänanga marahasia. De hoko gënanga önanga yähohonengua yähukumu kamamoi deyososawaro mahomoa.

¹⁹ O hutu gënanga dika Ma Jou wohingahu o rahasia gënanga o Danielika okianaga moi wamömake-make magoronaka, Done o Daniel wïhigiriri Ma Jou Madutu o horogäka,

²⁰ Wato, ”Ma Jou Madutu gënanga wobarija deʼ woputurungu iwihigiriri Unanga kahiado-adonika!

²¹ Unanga dika wohi tatapu o oraha deʼ hagala o oraha, Unanga lulu deʼ wä tede yo kokuaha. Ka Unangoli wahidöaka o beri i ja, inoli wa cacatu o mangarati.

²² Unanga la wohidemo o rahasia duru ilöluku-luku. Unanga wohioriki hagala idädadi o huhutu magoronaka. Unanga iwihawoino o cahaya i totarärono.

²³ Ya, Jou Madutu inihigogiriri ahiete de ahi tohona, Ngona tonihigiriri de tonihimulia. Hababu nohihidöaka ngohino o bariji deʼ o kuata. Tongomi miagogahoko Natarimaka. deʼ o bobaluhu mangale ma koanoika Nohimatokoka.”

O nanere genanga wohingahu deʼ wihitararono o Daniel

²⁴ Gënanga de iboto o Daniel woiki o Ariokhika iwihimanarana mangale wätoma hagala yososawaro o Babel. O Daniel wïtemo unangika, ”Uha nätoma yososawaro gënanga. Nohiao ngohi tïhimanga ma koano, hababu ngohi tomau tohingahu Ma Jou koanoika mamangarati ainanere genanga.”

²⁵ De woma taiti o Ariokh wïao o Daniel wïhimanga ma Koano Nebukadnezar de wotemo, ”Ngohi tämakeoka o Yahudioka yototabuanga manga hidogoronaka womatengo wakunu wohingahu aninanere mamangarati ahi Tuanga.”

²⁶ Dema koano wïtemo o Danielika iwihetongo o Beltsazar, ”Kayakunu ngona nohingahu ngohino ahinanere de toënanga ö mamangarati?”

²⁷ O Daniel wohaluhu, ”Ahi Tuanga, moiua naga o nyawa de manga ganako, yososawaro yomatara, ihingahu-ngahu okianaga aha idädadi ekola yososawaro yotötailako o murumu yakunu ihingahu o hali gënanga ahi Tuangika.

²⁸ Mä o horogaka naga Ma Jou Madutu wöbobelenga hagala o rahasia, deʼ Unanga woni hingahuoka ahi Tuangika okianaga aha idädadi o wange ma duruino. Orahanënanga, tanu nohihigumal̄a ngohi tohitararono o nanere deʼ okianaga namömake-make ahi Tuanga natotarima ahi Tuanga maöraha noma idu gënanga.

²⁹ Maöraha ahi Tuanga magogiria inikiokoka, ahi Tuanga nonanere mangale o oraha aha iböboa-boa. Ma Jou Madutu wöbobelenga hagala o rahasia wonihimatoko ahi Tuangika okianaga aha idädadi.

³⁰ O rahasia nënanga ihinyataka ngohino koigaungua karana ngohi iholoi tosawaro deo naguna dika, mä hupaya ahi Tuanga yakunu nohioriki mamangarati aninanere ahi Tuaga gënanga deʼ nomangarati mangale anihininga madol̄a Tuanga.

³¹ Nënanga la ololega ahi Tuanga namake. Ahi Tuanga anihimangoka naga o dulada o gahumu moi! O dulada gënanga marupa duru höborohono.

³² Mahaeke yadiai de o gurasi madutu, maalu mangunungu de magiama o haaka, magorona dema gului o tabaga,

³³ magaono o behi de mal̄ou o hidoku moi o behi de mahidoku moioli o tonaka matau-taulu.

³⁴ Maöraha ahi Tuanga magogiriaka napulono nohidodiai, o gahumu moi o helewo mapako-pako yodipidili o bakoroka deyauku, moiua o nyawa yatigi, daha yatapal̄u o dulada gënanga mal̄ouuku o behino deo tonaka ma tau-taulu gënanga hiadono i wede-wederuku.

³⁵ O oraha gënanga dika i ngodumu o dulada gënanga i ruba de idadi o behi itotoporonil̄e, o tonaka matau-taulu, o tabaga, o haaka de o gurasi, hokä o kafo o gandum ihi boha-boha mangïoka o ngogoro maorahuku. Itotoporonil̄e gënanga ihihaili o hidal̄oko yawuwu, hiadono yamal̄aikaua kama rio makoiwa. Ma helewo yaröruba-ruba o dulada gënanga idadi imatero mapako hokä ol̄oku deʼ yaomanga o dunia ya mode-modekika.

³⁶ Gënangadoka aninanere ahi Tuanga, deʼ örahanënanga ngohi aha tohitararono mamangarati.

³⁷ No momulia ahi Tuanga ganga o koano de hagala o koano; ahi Tuanga dika duru nokokuaha. Ma Jou Madutu o horogaka wonihidoakoka ahi Tuangika o popareta nënanga, o kuaha, o kuata de o mulia.

³⁸ Ahi Tuanga wonihidadi na kokuaha o dunia mahidoku de yogögogere deʼ hagala o totaleo deʼ o aiwani mahomoa. Ahi Tuanga mahirete ganga o dulada gënanga ma häeke o gurasi

³⁹ o dulada gënanga Mä ahi Tuanga ani pareta gënanga de ipahaka, aha i puda o popareta mahomoa maamoko makoimateroua de ahi Tuanga anipopareta. De ipahaika i pudaoli o popareta mahangeoka ihinonako mahidoku o tabaga o duladaka gënanga, aha yakuaha o dunia yamode-modekika.

⁴⁰ De inoli aha i puda o popareta maiatoka, hokä o behi. De hokä o behi yawede-wederuku okia dika, hoko genangoli o popareta maiatoka nënanga aha yawede-wederuku hagala o popareta mahomoa gënanga.

⁴¹ Ma l̄ou dema l̄ou mahagarara o dulada o hidoku moi o tonaka matau-taulu deʼ o hidoku moi de o behi gënanga ihidumutu o wange ma duruino o popareta gënanga aha i regu-regu. O popareta gënanga naga dema ganu i kuatoli, karana o tonaka matau-taulu gënanga naga dema ganu o behi.

⁴² O l̄ou mahagarara o hidoku moi o behi deʼ o hidoku moi o tönaka matau-taulu mamangarati naga o popareta utu i kuata deʼ nagaö yabole.

⁴³ O behi de o tonaka matau-taulu ima ganu gënanga ihinonakoli o popareta gënanga aha ihidailako yokawingi imakongohama la yakuata manga diri, mä o hidailako gënanga parahaja, hokä o behi yakunua ima kaganu de o tonaka matau-taulu.

⁴⁴ O kokoano gënanga manga popareta maörahoka, Ma Jou Madutu o horogaka aha wohigoko moi o popareta aha i tongohono kahiado-adonika deʼ aha koya hohihangua o hoana deo berera okia dika. O popareta gënanga aha yawede-wederuku hagala o popareta mahomoa gënanga.

⁴⁵ Itiai hokä ahi Tuanga namakeoka moiua o nyawa yatigi, o gahumu moi o helewo i lulu o bakoroka de yauku daha yatapal̄u de yawede-wederuku o dulada o behi, o tagaba, o tonaka ma tau-taulu o haaka deʼ o gurasi genanga. Ma Jou Madutu wolamo-amoko wohinyata ahi Tuangika okianaga aha idädadi. O nanere gënanga yakunu ha ngaku detongohi ahi hitararono duru itiai.”

O Daniel watarima o hewa ma koanoino

⁴⁶ Daha ma Koano Nebukadnezar womahitudukuku wohuba o Daniel aihimangoka deʼ wohidoaka o pareta hupaya o Daniel iwihoromati deʼ unangika ihihuba o huhuba yatötuhu-tuhuku de inoli o huhuba-o huhuba mahomoa.

⁴⁷ Ma koano wïtemo, ”I goungu, Daniel, ani Jou Madutu gënanga duru iholoi wolämoko hagala o gikiri mangahidogoronaka. Una ganga wäkokuaha hagala o koano, dewöbobelenga hagala o rahasia. Ngohi tohiöriki o hali gënanga hababu ngona näkunu nohitararono mamangarati o rahasia nënanga.”

⁴⁸ De ipaha o Daniel wihidöaha o pangkati magö gurutil̄e, wihidoäka mangoe o hadia mahöhailoa, deʼ wïgoraka wodadi o Babel magubernur de inoli wihidadi o tutuda duru wokökurutil̄e mata-mata o kadato manonasihatika.

⁴⁹ Ma imoteke o Daniel aigogahoko ma koano wohidöaka o Babel mapropinsi mapareta o Sadrakhika, o Mesakh deʼ o Abednegoika, ma o Daniel mahirete wo gogere ma koano aikadatoka.