O DANIEL 12 - MA JOU AI BUKU O ABARI MA OA

O wange mabaha

¹ O Malaekat wapö pake-pake o pakeanga o lenan gënanga wohi temoli, ”O öraha gënanga aha i boa o malaekat ilamo-amoko o Mikhael anihoana de aniberera magogoana. De ipaha aha naga o huha deo hukaranga maöraha koiwa ihohitero kadema dero naga hagala o hoana deo berera. Mä mata-mata o nyawa anihoanino de anibereraino manga romanga ihitulihoka ma Jou Madutu Ai buku magoronaka, aha yahihalamati.

² Manga ngöe toönanga manga hidogoronaka yahone-honengoka aha yowangoli, o hidoku moi aha yamao iame o ngango ikokakali de o hidoku moioli aha yamao, o hikauku deʼ o o borohono i kokakalioli.

³ O tutuda-tutuda yososawaro aha yotararono hokä o dihanga macahaya. Deʼ onanga yädoto-dotokoka manga ngöe mangale yodiai okianaga maoa-oa deʼ iadili aha yotararono hokä o murumu mangale ka hiado-adonika.”

⁴ De o malaekat gënanga ihitemoli ngohino, ”Daniel, natamunu o buku gënanga örahanënanga, deʼ nogelenga masegeluku hupaya kahirahi i tamunuku hiadono öraha o wange mabahaka. Manga ngöe o nyawa aha ihitaili yatailako ihidodiaika okianaga magogiriaka idadi. Mä manga hidailako önanga gënanga aha parahaja mata-matauku.”

⁵ Deipaha tämake o nyawa yähinoto o nauru. Womatengo woma okoino o ngairi mahonongaino madatekoka, deʼ womatengoli o ngairi mahonongaika madatekoka.

⁶ Womatengo wileha woma oko-okoinoika iholoi wotigi dede o mautu mautuika, ”Muruonoka hagala idödadadi-dadi i hera-heranga nënanga aha ipaha?”

⁷ O nyawa mahomoa gënanga wagorakil̄e aigiama hinoto i toakil̄e o dihangil̄e. Toihene ünanga wokoboto dema Jou Madutu wo kokakali deʼ wotemo, ”Idödadadi-dadi gënanga aha i tagi i gila-gila madekanino o taongo hange demahononga madekana. Deʼ iboto o aniaya ma Jou Madutu Ai umatika ihi bobaha dei boto, done ihi bobahaoli, idödadadi i hera-heranga gënanga.”

⁸ Mata-mata wahi demo-demo genanga i goungu toihene, ma ngohi tanako i tiaiua. Done ngohi toleha, ”Tuanga, sarakia mata-mata nënanga aha ipaha?”

⁹ Unanga wohaluhu, ”Noiki örahanënanga, Daniel, hababu o demo-demo nënanga kokiani naiunu deʼ narahasia hiadono o öraha mabaha.

¹⁰ Manga ngöe o nyawa aha yäuji deyädodono. Onanga yätotorou aha imangaratiua deʼ aha kaihi gila-gila manga jojobo yätorou; duga-duga önanga yososawaro aha imangarati.

¹¹ Maörahaino o huhuba o wangeil̄e ihigetongo gënanga yatogumoka deʼ moi-moi höboborohono yahetongo i Totorou yahiwedere gënanga ihigoko itotiail̄e, aha ipaha o wange o 1290.

¹² Yo utumu önanga kahirahi yosatia hiadono o wange ma 1335

¹³ Ngona Daniel, nosatia hiadono ma baha. Ngona aha no honenge, mä aha no momiki mangale natarima anihewa maöraha mabahaka.”