O BILANGAN 5 - MA JOU AI BUKU O ABARI MA OA

O datoro mangale o nyawa yopeseke

¹ Ma Jou wïtemo o Musaika,

² ”Nohi döaka o pareta nënanga o Israel manyawaika: Mata-mata o nyawa yä pado-pado ekola o ngoheka mapanyake yadaene, ekola yapekeoka o maiyeti, kokiani yahihupu o Israel manyawa manga tau madoomuoka.

³ Onanga kokiani yähuloko yoiki, hupaya uha yapeseke o tau madoomu, kiaka Ngohi togogere kamamoi de Ahi umati.”

⁴ O Israel manyawa yadiai o pareta gënanga deʼ yahihupu mata-mata o nyawa hoko gënanga o tau madoomuino.

O rugi yatagali madodagi

^5-6 Ma Jou wohi döaka o Musaika o datoro-o datoro nënanga mangale o Israel manyawa: Nako imatengo ani yosetiaua ma Jouika de yodiai o howono o nyawa mahomoaika,

⁷ o nyawa gënanga kokiani woma ngaku ai baradoha deʼ yo fangu manga duduhuhu itö totomo, o nyawa yahi rugu-rugika deʼ yödogo o tiwi haaka monaoko nako o duduhuhu gënanga o tiwi haaka o ratuhu moi.

⁸ Mä nako o nyawa yahi rugi-rugioka gënanga yohonengoka deʼ manga riadodoto yotigi-tigino moiua, done o duduhuhu gënanga kokiani ihi döaka ma Jouika, deʼ idadi o imam manga hidoku. O duduhuhu gënanga ietongua o duba manauru mangale o baradoha ma apongo o nyawa yahowo-howonoka gënanga ma upacara.

⁹ Okia dika o Israel manyawa ihihö huba-huba ma Jouika manga huhuba yö dinga-dingakoka idadi ma imam ai hidoku watotarima ihi hö huba-huba gënanga.

¹⁰ Okia ihihö huba-huba ima tengo ani ma Jouika, idadi o nyawa gënanga mahirete ai hidoku. Duga-duga okia ihi döa-döaka ma imamika womatengo, idadi ma imam gënanga ai hidoku.

O atoranga mangale o rokata womihi omu ngoi hekata

¹¹ Ma Jou wihuloko o Musa

^12-14 wohi döaka o datoro-datoro nënanga o Israel manyawaika. Nako o nauru womatengo womihi omu ngoi hekata. Unanga womi tae ngoi hekata gënanga mosetiaua unangika deʼ ma pesekoka ami diri karana ima röehe moi de o nauru mahomoa. Mä ami rokata gënanga wohi öriki itiaiua, karana o hali gënanga ngoi hekata madiai kamoma ngiu-ngiunu; koiwa ai hakihi, deʼ ünanga wahi datagokua. Ekola, nako o rokata womatengo womihi omu ngoi hekata, ena hioko ngoi hekata gënanga mohowonua.

¹⁵ O hali hinoto gënanga magoronaka o rokata gënanga ko kiani womi ao ma imamika. Unangö kokiani woao ihihö huba-huba ipoparalu, enagënanga o gopuno o kilo moi. O gopuno gënanga yakunua ihi tuagi de o zaitun maminya ekola yadupauku, karana marupa ihihö huba-huba imaka ngakua deʼ madungutu mangale ihi nonako naga o gia hekata imaka ngakua.

¹⁶ Ma imam kokiani womi huloko o ngoheka gënanga o huhuba mangï mahimangika deʼ moma okoino mihimanga ma Jou.

¹⁷ De aha ma imam kokiani wal̄ë o mangko o tonaka o gahumu moi deʼ woguheuku, o akere itebi-tebini mahuhutulu. Genanga de iböto ünanga kokiani wal̄ë mahuhutulu o kafo ma Jou Ai Tau malanteoka deʼ wonoa o akeruku gënanga.

¹⁸ De ipaha kokiani ünanga wahohe o ngoheka gënanga ami tada uru, deʼ wogelenga ami giamuku o gopuno imaka ngakua mahuhuba, ena hioko ma imam mahirete wasö o akere ma mali-mali yao-ao o lolai.

¹⁹ Genanga de iböto ma imam kokiani wohetongo o koboto deʼ wo gahoko o ngoheka gënanga mohi goungu. ”Nako ngona nohowonua, ngona ini koronaua o lolai iao-ao o akere nënanga.

²⁰ Mä nako ngona nohowono,

²¹ tanu ma Jou wadiai ani romanga idadi o koboto malolai ani hoana deʼ ani berera mahi dogoronaka. Tanu Unanga wadiai ani gaono magoa ikororomo deʼ ani mamata ideke.

²² O akere iao-ao o lolai nënanga aha iwohama ani mamata uku deʼ yadiai ideke deʼ ani gaono magoa ikororomo.” O ngoheka gënanga koakiani mobaluhu, ”Ngohi tohi goungu; tanu ma Jou wadiai hoko gënanga.”

²³ De ma imam kokiani watulihi o lolai gënanga o karatahi i lululuinoika de waehe mamali-mali gënanga.

²⁴ Ma imam womi huloko o ngoheka gënanga maokere o akere ma mali-mali iao-ao o lolai. Nako ma okere, o akere gënanga idadi o hababu mamao o hiri.

²⁵ Ma imam kokiani wal̄e o gopuno ihihö huba-huba gënanga, deʼ wohidumutu ma Jou Ai himangoka, daha wao o huhuba mangï ika.

²⁶ De ünanga kokiani wal̄e o gopuno o bokoto moi hokä manonako o gopuno gënanga mata-mata ihi hubaka, deʼ yatuhuku o huhuba mangï mal̄okuoka. De mabaha o akere gënanga womihi okere o ngoheka gënanga.

²⁷ O demo ma ade o ngoheka gënanga mahowonoka, o akere gënanga idadi o hababu münanga mamao duru kahä hiri; ami mamata ideke deʼ ami gaono magoa ikororomo. Ami romanga aha idadi o koboto deʼ o lolai ami hoana mahi dogoronaka.

²⁸ Mä o demo ma ade muna mahowonua, munanga imi koronaua o lolai deʼ kamakunohi o ngohaka mamake.

²⁹ Hoko gënanga madatoro nako o rokata womatengo wo omu deʼ womihi omu ngoi hekata modiaioka ihowo-howono deʼ mapeseke ami diri.

³⁰ O nauru genanga nakiani womiao ngoihekata genanga Ma Jouika de o imam nakiani wadiai o datoro genanga munangika.

³¹ O nauru gënanga wahowonua, mä ngoihekata, nako inyata mahowono, kokiani matagongo mabahaika.