O BILANGAN 34 - MA JOU AI BUKU O ABARI MA OA

Ma batingi-ma batingi o berera gënanga

¹ Ma Jou wohidöaka o Musaika

² o pareta-o pareta nënanga mangale o Israel manyawa, ”Itedekanokaua ngini niwohama o Kanaan mabereraika, o berera Tinihi döa-döaka nginika hokä o tonaka o puhaka. Nenanga doka maba tingi-ma batingi nia berera gënanga.

³ O Koreharail̄e, o batingi gënanga imulaenge o Zin matonaka ikokakahaka de yaigoro o Edom. O wange mahiwaroko o batingi gënanga imulaenge o Honenge ma Ngöto mabarenoka o koreharail̄e,

⁴ irehene koreharail̄e yameta o Akrabim ma Ngekomo deʼ igila-gila o Zinika hiädono o Kades-Barnea o koreharail̄e. Genangokadau irehene o wange madumuniha hiädono o Hazar-Adar, deʼ igila-gila o Azmonika.

⁵ Genangokadau de irehene o waika o Mesir mahiri batingoka deʼ mabobaha o Ngöto i Kokoronaka.

⁶ O Ngöto i Kokoronaka marupa nia berera mabatingi o wange madumuniha.

⁷ O koremieuku, o batingi gënanga imulaenge o Ngöto i Kokoronaka yameta o Hor mal̄oku.

⁸ Genangokadau de o Hamat ma Ngekomika, daha igila-gila o Zedadika

⁹ deʼ o Zifronika deʼ mabobaha o Hazar-Enanoka.

¹⁰ O wange mahiwaroko, o batingi gënanga imulaenge o Hazar-Enanoka de o Sefamika.

¹¹ Genangokadau de iuti o Riblauku o Ain deo wange ma hiwaroko, daha igila-gila o doporono-o doporonika o Galilea ma Taaga mahohana o wange mahiwaroko.

¹² Daha o koreharail̄e o Yordan ma Ngairi magurutu hiädono o Honenge ma Ngötoka. Genanga doka nia berera imoteke mabatingi-mabatingi magilolitino.”

¹³ O Musa wätemo o Israel manyawaika, ”Genanga doka matonaka aha ngini nia tarima de madodagi niundi, o tonaka imoteke ma Jou Ai pareta kokiani ihihikodoku o Israeloka manga hoana hiwo de mahonongaika.

¹⁴ O Ruben deʼ o Gad manga hoana de ikali o hidoku mahononga o Manasye ai hoanino yatarimaka toönanga manga hidoku, deʼ o tonaka gënangö ma, ihikodokuoka toönanga manga tau madol̄aika.

¹⁵ Toönanga manga tonaka puhaka gënanga o Yordan ma Ngairi o wange mahiwaroko, imahi tigi-tigika o Yerikho makotaika.”

O tutuda-o tutuda yahi momanarama inï hikodoku o tonaka gënanga

¹⁶ Ma Jou wïtemo o Musaika,

¹⁷ ”Yohidoku–doku o tonaka gënanga kokiani tingini nia hidogoronaka gënanga ma Imam Eleazar deʼ o Yosua o Nun ai ngohaka.

¹⁸ Natumutö o hoana yogetongo o tutuda womatengo mangale wiriwo o Eleazar deʼ o Yosua ihikodoku o tonaka gënanga.”

^19-28 Manga romanga o nyawa geönanga ganga: Ai hoana Manga tutuda o Yuda o Kaleb o Yefune aingohaka o Simeon o Semuel o Amihud aingohaka o Benyamin o Elidad o Kislon aingohaka o Dan o Buki o Yogli aingohaka o Manasye o Haniel o Efod aingohaka o Efraim o Kemuel o Siftan aingohaka o Zebulon o Elisafan o Parnah aingohaka o Izakhar o Paltiel o Azan aingohaka o Asyer o Ahihud o Selomi aingohaka o Naftali o Pedael o Amihud aingohaka

Ai hoana Manga tutuda

²⁹ Geönanga doka ma Jou wahi popareta mangale ihi kodoku o tonaka o puhaka o Israel manyawaika o Kanaan mabereraka.