O BILANGAN 27 - MA JOU AI BUKU O ABARI MA OA

O Zelafehad ai ngoha-ngohaka o ngoheka

¹ O Zelafehad aingohaka yamotoa, ena gënanga o ngo Mahla, o ngo Noa, o ngo Hogla, o ngo Milka deʼ o ngo Tirza. O Zalafehad ai ama ganga o Hefer, o Hefer ai ama ganga o Gilead. O Gilead ai ama ganga o Makhir, o Makhir ai ama ganga o Manasye, deʼ o Manasye ai ama ganga o Yusuf.

² O Zelafehad ngoi ora yamotoaö gënanga yoiki iwï himanga o Musa, deʼ ma imam Eleazar, inoli o tutuda-tutuda deʼ yongodumu o kawaha magogiriaka imatoomuino imahi tigi-tigika deʼ ma Jou Ai Tau mangorana. Onanga yato,

³ ”Tongomi mia ama wohonenge o tonaka ikokakahaka, deʼ ünanga koiwa aingohaka o nauru. Unanga winö ninïkua o Korah wolawa-lawani ma Jouika. Tongomi mia ama gënanga wohonemge karana ai baradoha mahirete.

⁴ Mä yadodoa hoʼ kokiani ai romamga ihihanga o Israel ma nyawaka duga-duga karana ünanga koiwa aingohaka deʼ ai danongo o nauru? Nimihidöaka ngomi o tonaka o puhaka kamamoi deʼ mia ama ai roriadodoto.”

⁵ Daha o Musa wohiädono toönanga manga perkara gënanga ma Jouika,

⁶ deʼ ma Jou wïtemo o Musaika,

⁷ ”Okia yahö heto-hetongo o Zelafehad aingoha-ngohaka gënanga igoungu ipatutu. Hoʼ önanga nahidöaka o tonaka puhaka kamamoi deʼ toönanga manga ama ai roriadodoto. Zelafehad ai puhaka gënanga kokiani iuti aingoha-ngohaka o ngohekauku.

⁸ Nahetongo o Israel ma nyawaika nako womatengo o nauru wohonenge deʼ ünanga aingohaka o nauru koiwa, done ai tonaka puhaka gënanga kokiani ihi puhaka aingohaka o ngohekaika.

⁹ Nako ünanga aingohaka o ngoheka makoiwa, ai tonaka puhaka gënanga ihi puhaka ai dodoto o naurika.

¹⁰ Nako ünanga ai dodoto o nauru makoiwa, ai tonaka gënanga mangale ai ama ai dodoto o nauru.

¹¹ Nako ünanga ai dodoto o nauru makoiwa, deʼ ai ama ai dodoto o nauru ma koiwa, ai gënanga idadi ma dutu o ro riadodoto duru yotigi-tigika deʼ ai ahaluku.” O datoro gënanga kokiani o Israel manyawa ihingounu hokä o tita madatoro ma Jou wohipoparaeta o Musaika.

O Yosua wï iriki hokä o Musa ai dagali

¹² Ma Jou wïtemo o Musaika, ”Nodöa o Abarim mal̄okuil̄e, deʼ genangokadau deʼ napulono o berera aha Tahidö döa-döaka o Israel manyawaika.

¹³ Napulono de iböto, ngona aha nohonenge hokä o Harun ani riaka,

¹⁴ hababu o Zin matonaka ikokakahaka, ngini inï hinoto nia lawanoka Ahi pareta. Maöraha o Meriba madaeraka o kawaha yongodumu ihi ngamo Ngohino, ngini nioluku nihinyata Ahi kuaha toönanga manga himangoka ima dohanga de o akere gënanga.” (Okia naga idö dadadi gënanga idadi o Meriba majobubuoka o mabereraka o Zin matonaka ikokakahaka.)

^15-16 Daha o Musa womä niata, ”Ya, Jou Ma Jou Madutu, nahidö döa-döaka o wowango mata-mata iwö wango-wangoika, ngohi togahoko, nitumutu womatengo waku-akunu wätuda o hoana de o berera manyawa nënanga;

¹⁷ womatengo wakunu wodadi o kapita maöraha önanga yoparangi. Uha nohigumal̄a Ani umati nënanga hokä o duba matika koiwa magogoana.”

¹⁸ Ma Jou wïtemo o Musaika, ”Nï ahoko o Yosua, o Nun aingohaka. Unanga o nyawa moi wososawaro. Nogelenga ani giama ai häekuku.

¹⁹ Nihuloko ünanga woma okoino ma Imam Eleazar ai himangoka deʼ yongodumu o kawaha. Toönanga manga himangoka mata-mata kokiani ngona nohingahu o Yosua gënanga ani dagali.

²⁰ Nihidöaka unangika ani kuaha o hidoku moi, hupaya o Israel manyawa iwihingounu ünanga.

²¹ O Yosua kokiani wogahoko o hidumutu ma Imam Eleazarika, deʼ o Eleazar kokiani woleha Ahi mau wapake o Urim deʼ o Tumim. De madodagi gënanga o Eleazar wïtuda o Yosua deʼ yongodumu o Israel manyawa hagala o perokara magoronaka önanga yohima-himanga.”

²² O Musa wadiai hokä ma Jou wihipopareta unangika. Unanga wïhuloko o Yosua womaokoino ma Imam Eleazar ai himangoka deʼ yongodumu o umati.

²³ Deʼ ünanga wö gelenga ai giama o Yosua ai häekuku deʼ wo hingahu o Yosua ai dagali, hokä ma Jou wahetongoka unangika.