O BILANGAN 16 - MA JOU AI BUKU O ABARI MA OA

O Korah, o Datan deʼ o Abiram manga lolawani

^1-2 O Korah o Yishar aingohaka o Kehat ai ahaluku, o Lewi ai hoana, womalawani o Musaika. Unanga iwihi böa yaruange o Ruben aihoanino, enagënanga o Datan deʼ o Abiram o Eliab aingoha-ngohaka, deʼ o On o Pelet aingoha-ngohaka, deʼ yaratuhu hinoto de yamoritoa o tutuda yaheto-hetongo o kawaha yairi-irikika.

³ Onanga kamamoi yoiki yahimanga o Musa deʼ o Harun deʼ yotemo, ”Yaoaka gënanga, Musa! Ingodumu o Israel manyawa yatingakoka mangale ma Jou, deʼ ma Jou naga ngone mata-mata nanga hidogoronaka. Mä yadodoa hoʼ ngona nomamao ani diri iholoi ikurutil̄e de ma Jou Ai umati?”

⁴ Woihene gënanga, o Musa womahi tudukuku o tonakuku deʼ woma niata ma Jouika.

⁵ Daha ünanga witemo Korahika deʼ iwinö ninïki. ”Yarehe o ngorumino ma Jou aha wohidumutu ngoneino o nagona Tounanga, deʼ o nagona yatingakoka mangale Unanga. O nyawa Wäiri-iriki aha wahi gumal̄a imahi tigi Unangika.

^6-7 Yarehe o ngorumino ngona de ininö ninïki kokiani yal̄ë o uku mangï, yonoauku o uku mangaboho deʼ o dupa, deʼ nao o huhuba mangï ika. Kayaoa de ngone aha hamake tongone nanga hido goronaka o nagona wairikoka ma Jou. Yaoaka gënanga, hei Lewi manyawa!”

⁸ De ikali o Musa wïtemo o Korahika, ”Ni ihene, hei o Lewi manyawa!

⁹ Boteka ngini nia pikiri nënanga o hali mahohumujuru o Israeloka manga Jou Madutu winï iriki ngini o Israel manyawa manga hidogoronaka hupaya ngini yakunu nimahi tigi Unangika, deʼ nimanarama Ai Tauoka, inoli nikarajanga mangale o Israel ma nyawa deʼ nïa leleani önanga?

¹⁰ Ngona, Korah deʼ mata-mata o Lewi manyawa nia makeoka o horomati gënanga ma Jouino, deʼ o öraha nënanga ngini nigahoko mangale nidadioli o imam!

¹¹ Nako ngona de ininö ninïki nitaiana o Harunika, igou-goungu ngini niwi lawani ma Jou!”

¹² De o Musa wähuloko yäahoko o Datan deʼ o Abiram, mä önanga yotemo, ”Ngomi mioluku miaika!

¹³ Yawedonowahi ngona nomïao ngomi o Mesir matonaka burereoka gënanga de nomihi hupu la nomï toma ngomi o tonaka ikokakahaoka nënanga? Kokiani ngona nomï pareta ngomiö?

¹⁴ Igoungu ngona nomi aoua ngomi o tonaka iboburereika, ekola nomihidöaka o tonaka mimadodumule deʼ o angguru madumule idadi tongomi mia puhaka madutu! Oraha nënanga naga ngona nomau nomï tipu ngomi! Kowali mioluku miaika!”

¹⁵ O Musa duru iwi tohata deʼ wotemo ma Jouika, ”Jou uha natarima toönanga manga huba. Onangoka kawomatengo ma’ komaiwa tahidadi rugi; maboboloioli o keledai o dutu moi ma komaiwa ngohi tal̄ë onangoka.”

^16-17 Daha o Musa witemo o Korahika, ”Yerehe naika ma Jou Ai Tauika kamamoi de 250 ininö ninïki. O Harunö aha naga dokengoka. Ngini kokiani niao moi-moi nia uku mangï. Niö noauku o dupa, daha nihihuba ma Jouika.”

¹⁸ De o nyawa moi-moi imä l̄ë o uku mangï, yonoa o uku ma ngaboho deʼ o dupa, de imaokoino ma Jou Ai Tau mangoranoka ima komoteke de o Musa deʼ o Harun.

¹⁹ De ipaha o Korah watoomu o kawaha mata-mata, deʼ önanga imaokoino imateke rorihimanga de o Musa deʼ o Harun ma Jou Ai Tau mangoranoka. Itodokanino o kawaha mata-mata yamake ma Jou Ai cahaya maletongo.

²⁰ Deʼ ma Jou wätemo o Musa deʼ o Harunika,

²¹ ”Nimadohuku de hagala o nyawa gënanga; Ngohi tomau tä binaha önanga öraha nënanga dika.”

²² Mä o Musa deʼ o Harun imahi tudukuku iwihuba deʼ yotemo, ”Ya Jou Madutu Ngona nohidö döa-döaka o wowango hagala iwö wango-wangoika. Nako duga-duga womatengo dika wobaradoha, boteka Ngona nangamo yongodumu o kawaha?” Ma Jou wïtemo o Musaika,

^23-24 ”Nä huloko hagala o nyawa imahi rehene de o Korah, o Datan deʼ o Abiram manga tau.”

²⁵ Daha o Musa de iwi nïkino o Israeloka manga tutuda-tutuda, yoiki o Datan deʼ o Abiram manga ngï ika.

²⁶ O Musa wätemo o Israel manyawaika, ”Nimahi rehene o nyawa madorou manga tauoka nënanga deʼ toönanga manga kia nagaö mauha nia tigi. Nako ngini nihimotekua ngini aha nibinaha kamamoiuku dede önanga karana toönanga manga baradoha.”

²⁷ Daha o Israel manyawa gënanga imahi rehene o Korah, o Datan deʼ o Abiram manga tau-tauoka. O Datan deʼ o Abiram yo hupuoka deʼ magogiriaka imaokoino moi-moi toönanga manga tau mangoranoka, deʼ toönanga manga ngohaka de manga hekata.

²⁸ De o Musa wätemo, ”De nënanga ngini aha nihi öriki ma Jou wohi hulokoka ngohi mangale tadiai mata-mata nënanga deʼ gënanga tongohiua ahi mau mahirete.

²⁹ Nako o nyawa geönanga yohonenge de biaha madodagi, mahukumanga okia-kiaua ma Jou Madutuino, gënanga manonako ma Jou Wohi huloko ngohi.

³⁰ Mä nako ma Jou wodiai okianaga moi komaiwahi ni ihene ma dekana nënanga, deʼ nako o tonaka ibelaka mangale yälahiri önanga, hiädono önanga kamanga ngango yowohama o nyawa yo hone-honenge manga duniauku, ngini nihiöriki o nyawa geönanga iwilawani ma Jou.”

³¹ O Musa wotemo-temo iböto de ipahaino de majapati; o tonaka toönanga manga l̄ou matimiuku ibelaka,

³² deʼ yalahiri önanga de toönanga manga roriadodoto inoli mata-mata iwinö ninïki o Korah, deʼ hagala toönanga manga arata.

³³ Done önanga yotifa kamanga ngango o nyawa yohone-honenge manga dunia magoronauku de hagala toönanga manga kia honanga. O tonaka ibö bela-belaka gënanga itamunoli deʼ önanga yohihanga koyaiwaka o dunia yälahiri.

³⁴ O Israel manyawa mata-mata naga genangokadau manga diri ihioara, maöraha önanga yoihene yopöaka, ”Hopiringana! Done ngone inä lahiri o dunia.”

³⁵ De ma Jou wadotagao o uku yätuhu-tuhuku yaratuhu hinoto de yamoritoa ihihö huba-huba o dupa gënanga.

O uku mangï

³⁶ De ma Jou wïtemo o Musaika,

^37-38 ”Nihuloko o Eleazar ma Imam Harun aingohaka wagoraka o uku mangï gënanga o nguku mahou-hou gënanga deʼ wohibarihi ma kuru makafo o ngï mahomoaika, hababu o uku mangï gënanga ganga itebini. O bara-baranga gënanga ganga manga huba hagala o nyawa yä huku-hukunoka yahohönenge karana manga baradoha. O bara-baranga gënanga itebini karana ihihubaka ma Jou Ai himangoka, hababu gënanga kokiani yatutuku idadi ibal̄äna mangina-ngina mangale o huhuba mangï malape maporetino. O hali gënanga aha marupa o hohininga o Israel manyawaika.”

³⁹ De ma Imam Eleazar wal̄ë o uku mangï gënanga deʼ wähuloko o nyawa yatutuku idadi ibal̄äna mangina-ngina mangale o huhuba mangï malape maporetino.

⁴⁰ Genanga marupa o hohininga o Israel manyawaika mahomoa deʼ o Harun aidifauku, kao nyawa moiö mayakunua yoböa o huhuba mangï ika mangale yotuhuku o dupa mangale ma Jou. O nyawa yatotilakuru o datoro gënanga aha yabinaha hokä o Korah deʼ iwinö ninïki. Mata-mata gënanga idiai hokä ma Jou wohi popareta o Eleazarika de itilakuru o Musa.

O Harun wahi halamati o Israel manyawa

⁴¹ Yarehino mawange o Israeloka yongodumu kayä ngamo-ngamo o Musa deʼ o Harunika. Onanga yotemo, ”Ngini nia tomaka ma Jou ai umati.”

⁴² Magogiriaka önanga imatoomu yälawani o Musa deʼ o Harun, önanga imä lega manga poretoko ma Jou Ai Tauika, deʼ yamake o lobi yatamunu o Tau gënanga, de yamake ma Jou Ai himanga madararono.

⁴³ O Musa deʼ o Harun yoiki ma Jou Ai Tau mahimangika,

⁴⁴ de ma Jou wïtemo o Musaika,

⁴⁵ ”Nimadohuku de hagala o nyawa gënanga. Ngohi aha tä binaha önanga mangï genangoka dika!” Onanga yahinotö imahi tudukuku yohuba,

⁴⁶ de o Musa wïtemo o Harunika, ”Na l̄ë ani uku mangï o huhuba mangïoka de mal̄okuoka nogelengauku o dupa. Tai-taiti nao ma Jou Ai umatika deʼ nodiai o baradoha ma apongo ma upacara mangale önanga. Tai-taiti! Ma Jou Ai dohata iramaka deʼ o panyake o bobaku imulaengoka.”

⁴⁷ O Harun wadiai okia o Musa waheto-hetongo. Unanga woma popäta o kawaha manga hidogoronaika magogiriaka ima toomu, deʼ o panyake o bobaku imulaenge yakorona. Done o Harun wo gelenga o dupa o uku mangaboho mal̄okuoka, de wadiai o baradoha ma apongo ma upacara mangale o kawaha.

⁴⁸ O panyake ihö hora-hora gënanga ima togumu, deʼ o Harun naga hagala o nyawa kayo wango-wango deʼ yohone-honengoka manga hidogoronaka.

⁴⁹ O öraha gënanga yohonenge naga ya 14.700 yaetongua önanga yohö hone-honenge o Korah ai lolawani magoronaka.

⁵⁰ O panyake o bobaku gënanga imatogumu ipahaino, o Harun woma kilioro o Musaika ma Jou Ai Tau mangoranoka.