O AYUB 4 - MA JOU AI BUKU O ABARI MA OA

IMATEKE ADE-ADE MADODIHIRAKA 4:1–14:22 O Elifas

^1-2 Daha o Elifas wotemo, wato: ”Ayub, bote ngona ani hininga isanangi nako ngohi totemo-temo? Takunua ngohi toma rirïdi iholoi itedekana.

³ O nyawa manga ngöe nahidöakoka o dodotoko, deʼ önanga yobö bole-bole nahi kuatoka.

⁴ Ani demo-demo ihidöaka o kuata, yahimomiki o nyawa yopele-peleke, yobole deʼ yokokangele.

⁵ Maöraha nënanga ngona mahirete initapalu o duka; ngona initodokana, deʼ idadi aninganono itoaka.

⁶ Koigoungua ngona nosetia ma Jou Madutuika; koigoungua ani ngango koiwa makuranga? Nako hoko gënanga, ipatutu ngona nongaku deʼ aninganono itoakua.

⁷ Napikiri, mamoi iböto o nyawa yahowo-howonua, yatapal̄u o bodito deʼ o huha?

⁸ Ngohi tohi öriki ahihidailako de madiai o nyawa yopopajeko o dumule madorou, de yodatomo o bodito magihihi hokä idato-datomo mamui, aha yautuku o bodito deʼ o huha!

⁹ Hokä o rato, hoko gënanga ma Jou Madutu Ai muruka hiädono önanga yabinaha kamamoiuku!

¹⁰ O nyawa madorou yopöaka deʼ yolau, hokä o singa önanga yodoora yaika yaino. Mä ma Jou Madutu watamunoka toönanga manga uru ikali wapagele hagala manga ingiri.

¹¹ Onanga yohonenge hokä o singa imakadonua mainomo, hiädono manga ngoha-ngohaka hohahi bari-barihi imahi kokorikokaua.

¹² Mamoi iböto moi o himatoko yadono ngohiuku, hokä o hudu ibole-boleil̄e ahi ngauku magoronaka.

¹³ Ahi ngidu yaruae deʼ yaridua, hokä tamake o nanere madodorou o hutu mahai-haitoka.

¹⁴ Ngohiö ihi todokana deʼ duru tohaharoka; ahi röehe mata-mata iwomaha, ihahara.

¹⁵ O hibu-hibu yawuwu ahibionoko, done ahigogo ahiröehuku kaioko-okoino.

¹⁶ Moi o gurumini imaokoino ahihimangoka; tapulono, mä ënanga ima tingaka ngohioka. Daha toihene itemo mailingi yodogilianga maöraha irirïdi,

¹⁷ ”Kaiyakunu o nyawa koiwa manga howono ma Jou Madutu Ai himangoka? Kaiyakunu ünanga ai kuranga koiwa Wihidadadi ai lakoka?

¹⁸ Igoungu ma Jou Madutu Ai gogilaongo o horogaka yakunua iwingaku ünanga. Igoungu o malaekat-malaekat wamake o howono deʼ makuranga.

¹⁹ Okia hongoli o dodadi o tonaka matau-taulino ododadi o kafo yakunu ihidateke hokä o goguhu!

²⁰ O dodadi gënanga iwango maöraha o ngorumino, daha ihonenge ipaliaraua o bobimaoa, deʼ mangale kahiado-adonika ënanga yohiningaokauaoli.

²¹ Done ihihanga hagala yapö pake-pakeino; enangö maihonenge yamakeua o hininga maoa-oa.”