O AYUB 17 - MA JOU AI BUKU O ABARI MA OA

¹ Ahi ajali itigioka, ngadeke ahi ngomaha itoaka; duga-duga o lungunu igogogere ngohioka.

² O nyawa ihidiai ngohi manga hohedu mangï; tämake hokokia önanga ihihikaweli o hohedu.

³ Ngohi nënanga torikoto, ya Jou Madutu. Nohi ngaku ngohino! O nagonali yakunu yöriwo ahidemo?

⁴ Natamunu toönanga manga hininga hiädono imangaratiua; Uha hiädono önanga ihihituduku ngohi nënanga.

⁵ Imamoteke o hohiade, o nagona yakalaki manga dodiawo mangale manga utumu, aingoha-ngohaka mahirete aha yatarima mabalahi.

⁶ O öraha nënanga ihitetemo de o hohiade gënanga; önanga yoböa mangale yaobiri ahibionoka.

⁷ Ahi lako igawa ahihininga ihuha; ahiröehe ingodumu iholoi itedekana yapelelaka.

⁸ O nyawa manga ngango itebi-tebini, yatodokana deʼ yoheranga; o nyawa yahowo-howonua, ihi pulono ngohi koiwa ahi Jou.

⁹ O nyawa maoa-oa deʼ yahowo-howonua, holoi yongaku manga ngango madodagi ma Jou Madutuika ai hininga yadaene.

¹⁰ Mä hohiade ngini mata-mata niaino nenangino, moiuaö yososawaroaha tämake.

¹¹ Hagala ahiwange ipahaka, hagala ahidatoro ikilianga; ihihangö ahihininga mamau mata-mata.

¹² Mä ahihoba-hobata yotemo, ’O hutu gënanga o wangeoka deʼ o dararono ngadeke iböa.’ Mä ngohi tohiöriki ahihininga magoronaka, kahirahi tatapu ihuhutu ahiwowango.

¹³ Duga-duga o honenge madunia tongano-nganono, dokengoka ngohi aha tomäidu o huhutu magoronaka.

¹⁴ Ahi lungunu tohiromanga ”Ahi ama”, deʼ hagala o kulubati yaol̄o-ol̄omo ahiröehe tahetongo ngohi ”Ayo” deʼ ngohi ”Hiranga”.

¹⁵ Kiaka o nganono ngohino; o nagona yamake ahiutumu mangale ngohi?

¹⁶ Nako ngohi touti o nyawa yohone-honenge manga duniauku, tongohi koiwakali ahinganono.”