O AYUB 16 - MA JOU AI BUKU O ABARI MA OA

O Ayub

^1-2 Mä o Ayub wohaluhu, ”Mamoi-mamoi toihene o damake hoko gënanga; anilolaru duga-duga o hangihara.

³ Muruonoka nihihohomoa gënanga ngini niatogumu? Okia yamomiki tingini nia mamao mangale nihidöaka o bobaluhu?

⁴ Hohiade ngini nënanga ngohi, deʼ ngohi ngini, ngohiö takunu totemo kaimatero hoko gënanga. Tinihi nguihi ngini de ahi demo-demo; ahi haëke aha ta giwi-giwi.

⁵ Niahininga aha takuata de irupa-rupa ihigaro, ahidemo-demo aha inihidöaka o lolaru.

⁶ Nako ngohi totemo, ahihangihara ikurangua; nako ngohi toma rirïdoka, okiali mabaraguna?

⁷ Ma Jou Madutu, wohidiai ngohi tobole; ahitau manyawa yongodumu wabinahaoka.

⁸ Unanga wohilawani deʼ wohitagoko ngohi. O öraha nënanga ahiröehe duru mabobelelaka, deʼ o nyawa yowöe-wöeika gënanga manyonyata ngohi tobaradohaka.

⁹ De duru wongamo ma Jou Madutu wakä kakihi ahiröehe; de duru wohi igoua Unanga wohipulo-pulono ngohi.

¹⁰ Hagala o nyawa ihihohedu ngohi de manga uru mamoana mangoata; ngohi ihiguruhe deʼ ahigotoaka yapoka.

¹¹ Ma Jou Madutu wohihilapahi ngohi o nyawa yososetiaikaua; ngohi wohihilapahi o nyawa madorou manga giama mahoatika.

¹² Hokangano ahingango irïdi deʼ yaoa, mä dei todokanino ma Jou Madutu wohiparangi ngohi. Ahi tomaruku wahookokuku deʼ ngohi wohihikaweli; wohihidadi ngohi mangale mangï tomahibiaha.

¹³ Wamaoua o dora Unanga gila-gila wohitoimi ngohi, hiädono ahiwariki höhohibari-barihi.

¹⁴ Unanga wohiparangi hokä womatengo womahidö dofo-dofo, deʼ wohil̄abo ngohi de kawögogilio.

¹⁵ Ngohi toma hinoa o karongo manonako ahihininga ihuha, deʼ togogeruku o kafo magoronaka karana wohiutumoka.

¹⁶ Ahi biono itokara karana toari; ahilako madadamunu imahï dodonoboho deʼ kama bihi-bihi.

¹⁷ Mä ngohi tadiaiua demabuturungu; inyata ahiniata irikoto ma Jouika.

¹⁸ Hei dunia, o dorou ngohino uha nangiunu; uha narïdi ahi böaka togahoko o adili.

¹⁹ Ngohi tohiöriki wohidö demo-demo naga o horogaka; Unanga wohidöaka o hakihi ngohi tobaradohaua.

²⁰ Ngohi ihihohedu ahidodiawo deʼ ihigogiete; ikali ngohi toari tihimanga ma Jou Madutu togahoko o roriwo.

²¹ Aa, tanu ma Jou Madutu mahirete wohïriwo ngohi Ai himangoka, hokä womatengo woigo wïriwo ai hobata.

²² Hagala ahitaongo mahou iwöe-wöeokauaoli; botinookahi ngohi töiki deʼ aha tomaidulokaua.