O AYUB 15 - MA JOU AI BUKU O ABARI MA OAIMATEKE ADE-ADE MAHINOTOKA 15:1–21:34 O Elifas 1-3 Daha o Elifas wahaluhu, ”Notemo nohi hohomoa, Ayub, anidemo igoungu koiwa mamangarati! Moiua yososawaro manga bobaluhu hokä ngona nënanga, aha hoko genangua ünanga wödemo ai diri de o demo-demo koiwa mamangarati. 4 Hohiade anidemo gënanga yamoteke, moiuaö iwimodongo ekola imaniatoli ma Jou Madutuika. 5 Ani demo-demo ihinyata ngona nahowono, mä anidorou nohitamunu de aniakiri mabaata. 6 Iparaluua ngona tonikalaki deʼ tonihihowono, hababu anidemo-demo mahirete ngona inikalaki. 7 Natobote ngona o nyawa madodihiraka inihingohaka? Ngona nohimangika maöraha hagala ol̄oku wohidadi? 8 Boteka ngona noihene ma Jou Madutu wadiai Aimanarama madatoro? Boteka duga-duga ngona dema ënanga o nyawa manga bobarija? 9 Hagala nohi öri-öriki, ngomiö mihiöriki; hagala nomangongarati, itararono ngomino. 10 O barija nënanga ngomi miatarima o nyawa yadodudutuino; ani ama womakil̄auuahi önanga nagaka! 11 Yadodoa ma Jou Madutu Ai lolaru noluku natarima? Ngomi mitemo de mia sabari deʼ mabole mangale de Ai römanga. 12 Mä ngona aniawunu idoa, ani lako majanga-janga; 13 ngona nïngamo ma Jou Madutuika deʼ nïngelo. 14 Boteka o nyawa kamamoiuku yahowonua? Yakunu ünanga watiai ma Jou Madutu Ai himangoka? 15 Igoungu kaö malaikatikaö ma Jou Madutu wangakuua; önanga yatebinua Ai lolegaoka. 16 Okia hongoli, o nyawa manga kalakuanga itotorou deʼ ipese-peseke, ya okere o dorou hokä o akere dika. 17 Noihene Ayub, ngona aha toni hitararono okianaga moi, 18 ihidödoto-dotoko o nyawa yososawaro ngohino. O dodotoko gënanga watarima ai ete de ai tohoraino, deʼ wohi gila-gila ingodu-ngodumu aidifaukuika. 19 O öraha gënanga moiua o nyawa maporetino toönanga manga bereraka; koiwa yahirörehe-rehene önanga ma Jou Madutuino. 20 O nyawa madorou yatötuku-tuku imahikoka nyawa, aha yamao manga hininga mahuha ai wowango magurutu! 21 Ma ilingi homodo-modongo yatopongono ai ngauku; maöraha irirïdi yoora-ora yoböa iwiparangi. 22 Koiwa o ngonganono unangika womahirehene o huhutu, hababu yotoma-toma manga o oworo iwiginïki ai öraha iworo-woro magetongo. 23 Hagala o totaleo o kawihi kai totamä ai honenge maöraha, ënanga imau yaol̄omo aimaiyeti. Done ünanga wamao kaihohonguku o wange ai himangika. 24 O bodito hokä o koano wonau-nauru, woma bötoka womau wiparangi. 25 Hoko gënanga manga wowango o nyawa iwilawa-lawani ma Jou Madutu, deʼ yobarani iwilawani Duru woko Kuaha. 26-27 De ai edenge ünanga wiparangi deʼ wilawani ma Jou Madutu; womägoraka ai dadatoko, ünanga woluku womaike. 28 Unanga wogogere hagala o kota hohibari-barihikaoka, hagala o tauoka koö iwa-iwa manyawa yogogerika. Hagala o kota gënanga ihi tantuoka mangale kahirahi idadi magilianga. 29 Manga kaya o nyawa gënanga aha hihanga koiwa mario ai arata aha imata kamamoiuku. 30 Unanga aha wo otanua o huhutu mahai-haitino; o uku aha yatuhuku madori-dori. Unanga aha wohihanga mangale ma Jou Madutu Ai uru mahaga. 31 Nako ünanga wangaku ibobaragunaikaua, aha iwi tipu ünanga; deʼ magilioro aha watarima, mabaraguna koö iwa-iwa. 32 Maöraha iboauahi, ünanga aha wohonenge, hokä majaga madengeeti imaai yakunokaua kama gou-gouoli. 33 Unanga hokä o angguru mautu iturabaha mahohoko, hokä o zaitun magota mautu irero mahuri. 34 O nyawa madorou aha koiwa manga difauku, manga tau youku imata ihigögoko-goko manga uru bokumu mahasilino. 35 Genanga önanga ihidato-datoro o dorou deʼ yadodiai; o tipu iö aka-akali hokogenangika imahiluluino aihininga magoronaka.” |
@ LAI 2002
Indonesian Bible Society