O AMOS 3 - MA JOU AI BUKU O ABARI MA OA

¹ Ni ihene ma Jou Ai behehongo nënanga, hei Israel manyawa ma Jou wimi ao-aoka o Mesir mabereraka deni hupu! Ma Jou wotemo,

² ”Mata-mata o hoana deo berera o duniaka, ka ngini nima tengo-tengoka o hoana deo berera Tinï nako deʼ Tinï to tailako. Gënanga ma hababu nia baradoha i amoko, deʼ Ngohi marai tinï hukumu ngini.”

O nabi manga manarama

³ Kai dadi o nyawa yahinoto yo sobo ima niki, nako i hiraua ima tator iholoi ihira?

⁴ Boteka o singa o honganoka i lau nako ënanga ko ima makeuahi o inomo? Boteka o singa ma ngohaka i lau ma arukoka nako ënanga ko kia-kiauahi imä dagoko?

⁵ Boteka o totaleo i tifa o dadagoko ma goronauku, nako o modoi ihi akanua? Boteka o dadagoko i tamunu nako koiwa yatö tago-tagoko?

⁶ Boteka o nyawa o kota magoronaka yä yohaharua nako yo ihene o trompet ma ilingi ma nonako o parangi? Kaidadi moi o kota ya korona o bodito, nako ma Jou kowo hidingotua?

⁷ Ma Jou Duru Wokö kurutil̄e komaiwa wo diai okianaga moi de kowo hinyataua Ai datoro o nabi-nabiika, ai gogilaongo?

⁸ Nako o singa i lau, o naguna kowo hawanua? Nako ma Jou Duwu Kokurutil̄e wo temo-temo o naguna yakunu woma ri ridi deʼ ko wohingahuua Ai behehongo?

O Samaria i kilianga

⁹ Nihingahu nënanga hagala o nyawa ika yogö gogere o Mesir deʼ o Asdod ma kadato ka, ”Nima toomu ol̄oku-l̄oku oka o Samaria ma gilolitino, deʼ nia tailako nihidodiai o huru-hara ma amoko inoli yo ora yateo yodiai dokengoka.”

¹⁰ Ma Jou wotemo, ”Hagala o nyawa gënanga ihi dol̄a toönanga manga kadato-kadato deo bara-baranga ai yamake yateo-yateo yoora-oraino deʼ yo aniaya. Ma boboloi oli önanga hakali-kali ya nakoua yo diai de manga hininga iriko-rikoto.

¹¹ Karana gënanga toönanga manga berera aha ihigilolitino o haturü, toönanga imahi tumungu iwedere deʼ toönanga manga kadato-kadato ya ora.

¹² Hokä woma tengo o aiwani wo goa-goana wa makeoli duga-duga ma l̄ou o habi moi ekola ai duba ma ngauku ma dobiki ya goli-golioka o singa, hoko genangoli duga-duga ka manga huhutulu dika yogö gogere o Samaria mabereraka ya mal̄aika kiaka, oraha nënanga ima hirorahai ima luluiha o ngidu-ngidu mangï ma bole-boleiha.”

¹³ Ma Jou Madutu Duru Wo kokuaha deʼ Duru Wokö kurutile wotemo, ”Nia tailako nihidodiai, deʼ nia hidöaka o hohininga o Yakub aidifauku.

¹⁴ Mawangeoka Ngohi tä hukumu o Israel manyawa karana manga baradoha, Ngohi aha ta binaha hagala o huhuba mangï o Beteloka mabereraka. Moi-moi o huhuba mangï aha ta tobiki ma bare-barene hiadono i tifa o tonakuku.

¹⁵ Hagala o tau mangale o dumamata ma orahoka deʼ hagala o tau ima hibö bato-batongo o ngogoro ma orahoka aha Ta wedere. Hagala o tau ihi poporomu o gadingi aha iruba; mata-mata o tau ilago-agomo aha iwedere.