O AMOS 2 - MA JOU AI BUKU O ABARI MA OA

O Moab

¹ Ma Jou wotemo, ”O Moab yogö gogere ihi gali-galioka yo baradoha, karana gënanga Ngohi aha marai aha tä hukumu. Onanga iwi hikauku ma Koano Edom wo hone-honengoka gënanga, ya kilianga ai jere inoli yal̄ë ai kobo-kobongo deʼ ya tuhuku idadi o kafo.

² Hababu gënanga Ngohi aha tohi dingoto o uku o Moab maberera ika, deʼ ya tuhuku yamata-mataka o Keriot ma kota ma dadatoko o bebeno o mehele. O Moab manyawa aha yo honenge o parangi magigoro ma goronaka, magogiriaka o trompet toilingi, deo parangi maulili ihi boa-boaka.

³ O Moab ya kokuaha deʼ mata-mata manga popareta ma pegawe aha Tä toma.”

O Yehuda

⁴ Ma Jou wotemo, ”O Yehuda manyawa ihi gali-galioka yo baradoha, karana gënanga Ngohi marai aha tä hukumu önanga. Onanga ya tilakuru hagala Ahi pareta-pareta deʼ ya haduliua hagala Ahi do dotoko-dotoko. Onanga yorehenoka o ngekomo mangale hagala o gikiri ma homoa yahö huba-huba toönanga manga ete de manga tohora.

⁵ Hababu gënanga Ngohi aha tohidingoto o uku o Yehudaika deʼ ya tuhuku yamata-mataka o Yerusalem ma kota ma dadatoko o bebeno o mehele.”

Ma Jou Madutu Ai hukumanga o Israeluku

⁶ Ma Jou wotemo, ”O Israel manyawa ihi gali-galioka yo baradoha, karana gënanga Ngohi marai aha tä hukumu. O nyawa manga hininga iriko-rikoto yakunua ihigilio yo bau-bauoka, önanga yä hukunoka yo dadi o gilaongo. Hoko genangoli önanga yä hidiai hagala o nyawa mihikini ika yaku-akunua yo fangu manga nagimi, ngaroko o nagimi gënanga duga-duga o hapato tarupa habi moi ma ija.

⁷ Onanga yä tuku o nyawa yo bole-bole imä gaku-gakunua, deʼ o nyawa mihikini yä hitingaka binaha. Ma ama dema ngohaka imï mane moma tengo o gilaongo o ngoheka, ka ima daene, hi adono ya peseke Ahi romanga itebi-tebini.

⁸ O pupuji mangï oka yö getongo, hagala o nyawa ima idu deo baju önanga yalë l̄ëino hokä o nagimi ma dodanu o nyawa mihikini ino. Toönanga manga Jou Madutu Ai Tau oka, önanga yokere o angguru onanga yal̄ë yä nagi-nagimika onangika.

⁹ Ngaroko hoko gënanga, hei Ahi umati, mangale ka ngini Ngohi Tä binaha o Amori manyawa manga gö gurutil̄e hokä o gota ma utu o liwewuru, deʼ manga kuata hokä o terpentin ma gota.

¹⁰ Ngini Tinï aoka o Mesir mabereraka deni hupu, deʼ Tinï tuda nia nonu o dowongi ikokakaha o taongo moruata ma dekana. O Amori manyawa manga tonaka Tinï hidoakoka ngini ika idadi nia berera ma hirete.

¹¹ Ngohi tä irikoka ya muruono naga nia ngoha-ngohaka la yodadi o nabi, deʼ ya muruono naga o nyawa o gikiri magö la yodadi o nyawa o Nazir. Koigoungua gënanga itiai, hei Israel manyawa? Ngohi ma Jou to temoka.

¹² Mä ngini nia hidöaka o nyawa o Nazir, yokere o angguru, hiadono ya diai önanga ihi pongono manga jaji. Deʼ ngini niä duhunu o nabi-nabi ihingahu Ahi behehongo.

¹³ Oraha nënanga ngini aha Tinï tuku hiadono o tonakuku, hiadono ngini ni tido-tidono hokä o de ma dede gina o gandum i oma-omanga.

¹⁴ Ima popata yo sosapati ma aha ko yo otanua, o nyawa yo kua-kuata aha i hihanga manga kuata, deʼ o nyawa yo poputurungu aha ko yakunua ihi halamati manga diri ma hirete.

¹⁵ Yotö toi-toimi yakunua i tumungu, ima popata yo sosapati aha ko yakunua ihi oara manga diri, deʼ o kuda yo bare-barene aha koyo otanua.

¹⁶ O wange gënanga o tentara duru yo bobarani ma aha ya mal̄a manga dae daha yo piringana. Ngohi ma Jou to temoka.”