O AMOS 1 - MA JOU AI BUKU O ABARI MA OA

¹ Amos ganga wotengo o duba ma go goana o Tekoa ma kota ino. Unanga wodadi o nabi ma orahoka o Yehuda maberera ma Koano Uzia aipareta o Yehuda maberera, deʼ o Israel, ma Koano Yerobeam o Yoahas aingohaka o nauru wa pareta. O taongo hinoto i dadiuahi moi o ohu, ma Jou Madutu wohinyata o Amosika hagala o hali yakokokorona o Israel.

² Nënanga doka wa heto-hetongo o Amos, ”Ma Jou wolau o Sion ma doporonino, Ai ilingi ma ruruhu o Yerusalemino. O momo o tonaka ma lua-luasoka i toolenge, o momo o Karmel mal̄okuoka madü dudungu totororata.”

Ma Jou Madutu Ai hukumanga hagala o negara ika ima kokitigino de o Israel O Siria

³ Ma Jou wotemo, ”O Damsyik yogö gogere ihi gali-galioka yo baradoha, karana gënanga Ngohi marai aha tä hukumu önanga. Onanga yä hidiai o Gilead manyawa duru koiwa ma hayangi dema dora,

⁴ habahu gënanga Ngohi aha tohidingoto o uku ma Koano Hazael ai kadato ika, deʼ ya tuhuku yamata-mataka ma Koano Benhadad ai hagala ma dadatoko o bebeno o mehele.

⁵ O Damsyik dehagala ma ngorana i lago-ogomo aha Ta kilianga, deʼ yogö gogere o Awen ma Wai aha Ta hehara ta tebi-tebini toönanga manga ngï yogö gogere. Ya kokuaha o Bet-Eden aha Ta higuti manga popareta ma kuruhioka, deʼ o Siria yogö gogere aha yä ai tagoko inoli ya toraka o Kir mabereraika.”

O Filistin

⁶ Ma Jou temo, ”O Gaza yogö gogere ihi gali-galioka yo baradoha, karana gënanga marai Ngohi aha tä hukumu onanga. Onanga yä torakoka moi o hoana deo berera manyawa yo ngodumu, deʼ yä hukunu hokä o gilaongo o Edom manyawaika.

⁷ Hababu gënanga Ngohi aha tohidingoto o uku o Gaza ma bebeno-bebeno o mehelika deʼ ya tuhuku ya mata-mata manga berera ma dadatoko o bebeno mehele.

⁸ Yogö gogere deʼ ya kokuaha o Asdod ma kota inoli o Askelon aha Tatitoko. O Ekron ma kota aha Ta hukumu, deʼ mata-mata ma hou-hou ohi o Filistin manyawa aha Tä binaha.”

O Tirus

⁹ Ma Jou wotemo, ”O Tirus yogö gogere ihi gali-galioka yo baradoha, karana gënanga Ngohi marai aha tä hukumu onanga. Onanga yä torakoka moi o hoana deo berera manyawa yo ngodumu o tabuangika, deʼ yä hilapahi o Edomika; önanga ya tilakuroka o jaji ima ko hobata.

¹⁰ Hababu gënanga Ngohi aha tohidingoto o uku o Tirus ma bebeno-bebeno o mehelika deʼ ya tuhuku yamata-mataka manga berera ma dadatoko o bebeno o mehele.”

O Edom

¹¹ Ma Jou wotemo, ”O Edom yogö gogere ihi gali-galioka yo baradoha, karana gënanga Ngohi marai aha tä hukumu. Koiwa ma dora dema hayangi koiwa önanga yä parangi o Israel manyawa, toönanga manga roriadodoto. Onanga kahokogenangika yä ngamo, deʼ kahirahi o hininga yä gogonika.

¹² Hababu gënanga Ngohi aha tohidingoto o uku o Teman ma kota ika, deʼ ya tuhuku yamata-mataka o Bozra maberera ma dadatoko o bebeno o mehele.”

O Amon

¹³ Ma Jou wotemo, ”O Amon manyawa ihi gali-galioka yo baradoha, karana gënanga Ngohi maraioka aha tä hukumu. Maöraha yo parangi mangale ya amokika manga daera, önanga yabelaka o ngongoheka yo roe-roehe manga mamata o Gilead mabereraka.

¹⁴ Hababu gënanga, Ngohi aha tohidingoto o uku o Raba ma kota ma bebeno mehelika deʼ ya tuhuku yamata-mataka ma bebeno o mehele. Maöraha gënanga aha yö gihene o parangi ma gigoro, deʼ o parangi ima hora-hora hokä o hidal̄oko o rato ma ngutuku.

¹⁵ Toönanga manga koano deʼ ai popareta ma popegawe aha yä toraka o tabuangika. Ngohi, ma Jou, to temoka.”