O TESALONIKA MADODIHIRAKA 5 - MA JOU AI BUKU O ABARI MA OA

Nima sadia mangale ma Jou ai böa

¹ Roriadodoto, iparalua ngomi mitulihi nginika muruonoka maöraha yakokoronauku o hali-o hali gënanga aha idadi.

² Hababu ngini mahirete nihi öriki demadiai ma Jou ai böa ma Wange gënanga aha imahi ädono hokä yotohi-tohiki yaino o hutu-hutu.

³ Nako o nyawa yotemo yato, ”Mata-mata kai rorahai deʼ kai rirïdi,” done maorahoka gënanga itodokanino önanga aha yätapal̄u o binaha, deʼ kao nyawa moiö de yakunua yo otana. O hali gënanga aha idadi itodokanino, hokä o ngoheka momatëngo aha mongohaka mamäo mahiri momä gilianga.

⁴ Mä ngini koigoungua o nyawa niwö wango-wango o huhutu magoronaka, hiädono o wange gënanga ngini inï todokana hokä o nyawa yotohi-tohiki yaino.

⁵ Riadodoto mata-mata ganga o nyawa niwö wango-wango o dararono magoronaka; ngini niwohama o ginitara madodararonika. Ngone koigoungua o nyawa yowö wango-wango o huhutu magoronaka ekola howohama o hutu maho huhutuika.

⁶ Hababu gënanga ngone yakunua kahomä idu-idu dika hokä o nyawa mahomoa. Ngone kokiani homahi dodiai ho mä göana deʼ to ngone nanga dibanga ko kiani itararono.

⁷ O hutu-hutu o nyawa imä idu, deʼ o hutu-hutuö o nyawa idadi yädaluku.

⁸ Mä ngone nënanga inä etongo o ginitaroka manyawa; hababu gënanga nanga dibanga kokiani itararono. Ngone kokiani itatapu hïngaku ma Jouika deʼ hädora o nyawa mahomoa inoli hönganono hagoungu ma Jou Madutu aha wona hihalamati ngone. Gënanga doka o daë inä göa-göana ngone o parangi magoronaka halawani o huhutu.

⁹ Ma Jou Madutu wonä iriki ngone koigoungua la inä hukumu, mä mangale ina hihalamati de madodagi tongone nanga Jou Yesus Kristus.

¹⁰ Unanga wohonenge mangale ngone hupaya maorahoka Unanga aha woböa – bote ngone kaho wango-wangohi, bote ngone hohonengoka – ngone yakunu howango dede Unanga.

¹¹ Hababu gënanga, kokiani ngini itatapu nimahiki liara deʼ nima hikukuata, imatero hokä ngini nia gogiria nia diai o öraha nënanga.

O hidumutu-hidumutu mabobaha deʼ o tabea

¹² Roriadodoto, ngomi migahoko de magiria hupaya ngini niä horomati o nyawa yomomanarama nia hidogoronaka; enagënanga önanga ma Jou wäiri-irikoka la ngini inï tuda deʼ inï nasihati.

¹³ Nia hidiai önanga duru demahoromati deʼ de nia hayangi de nia dora karana homa hininga okia önanga yodiaioka. Niwango salalu nimahi teke dodiai.

¹⁴ Roriadodoto, ngomi migahokoli, nia hidaaere nihididiai o nyawa yo olu-oluku yomanarama; nihi bitumu manga hininga o nyawa yohö hawa-hawana; nia riwo o nyawa ipöparalu nia riwo, deʼ nia hisabari o nyawaika mata-mata.

¹⁵ Nio göana hupaya uha naga yabalahi o dorou de o dorou. Nihi dailako salalu mangale o oa nidiai, o nyawa moi de moiika deʼ o nyawa mata-mataika.

¹⁶ Kokiani ngini salalu nimörene,

¹⁷ deʼ nimä niata kahoko genangika.

¹⁸ Hagala okianaga idädadi magoronaka kokiani ngini nisukur, hababu gënanga doka ma Jou Madutu wö igo-igo nginino hokä o nyawa yowango yorimoi de o Kristus Yesus.

¹⁹ Uha nia tätatoko ma Jou Madutu ai Womaha.

²⁰ Uhali nia pulono okiaua yadäene o abari ihi döa-döaka ma Jou Madutu ai Womaha.

²¹ Hagala moi-moi kokiani nia uji, deʼ maoa-oa kokiani nia moteke.

²² Nimahi tingaka nia kokurutika hagala rupa o dorou.

²³ Tanu ma Jou Madutu mahirete wonahi döa-döaka o lolä, winihi dadi ngini o nyawa yagou-goungu niwango nihi tingaka mangale ma Jou Madutu. Tanu ma Jou Madutu wögöana nia diri ingodumu, kayaoa nia womaha, nia jiwa kayaoa nia röehe, hi ädono koiwa naga itotomua maorahoka nanga Jou Yesus Kristus woböali.

²⁴ Ma Jou Madutu winï ahokoka ngini la nia diai o hali gënanga hababu Unanga wosetia.

²⁵ Roriadodoto, nimi hihubayanga ngomi!

²⁶ Nima teke tabea nimahi teke dodiai, hokä o roriadodoto Haranioka.

²⁷ De ma Jou ai kuaha, ngohi togahoko de magiria hupaya ngini nia basa o hurata nënanga mata-mata o roriadodotika o ngongaku moi.

²⁸ Tanu nanga Jou Yesus Kristus winihi barakati ngini. Tongomi mia horomati, o Paulus