O TESALONIKA MADODIHIRAKA 2 - MA JOU AI BUKU O ABARI MA OA

O Paulus ai manarama o Tesalonika mabereraka

¹ Roriadodoto! Ngini mahirete nihi öriki, ngomi minï ädono nginika parahajaua.

² Ngini nihi öriki i hira de ngomi miböa nginika o Tesalonika mabereraka, ngomi imï aniaya de imï hoheduoka o Pilipi mabereraka. Mä ngarokö o nyawa manga ngöe imï lawani ngomi, tongone nanga Jou Madutu womihi döakoka o barani la mihi ngahu o Abari ma Oa nginika ma ahali Unangino.

³ Ngomi migëgoto migahoko nginika ganga mia howonua; inoli mia dungutua itö tebi-tebinua ekola lamitipu.

⁴ Kowali! Ngomi miade-adeua laʼ mia sanangi o nyawa manga hininga, duga-duga la mia sanangi ma Jou Madutu ai hininga, wauji tongomi mia hininga. Hababu ngomi ma Jou Madutu womï pulonoka ipatutu mihi barihi o Abari ma Oa gënanga.

⁵ Ngini mahirete nihi öriki komaiwa ngomi mia uru dema mutiti ekola nia lako mia tamunu la mia gogono o kal̄il̄u madungutu. Ma Jou Madutu wohakihi!

⁶ Ngomiö mihi dailakoua la mia mäke o higiriri o nyawaino – kayaoa nginino kayaoa o nyawa mahomoaino. Imoteke madiai hokä o Kristus ai rasul, ngomi yakunu dika migahoko okianaga nginino.

⁷ Mä ngomi de mia jako ibole-bole maöraha naga ngini nia hidogoronaka, hokä momatëngo o ayo mapaliara de mögöana ami ngoha-ngohaka.

⁸ Karana tongomi mia dora de mia hayanga, ngomi mimasadia minihi döaka nginika koigoungua ka o Abari ma Oa dika ma Jou Madutuino gënanga mä tongomi mia ngangö. Hababu ngomi duru minï dora ngini!

⁹ Marai ngini kanio hiningahi sarakia mia kaigoungu ngomi mihidailako de miparangi. O hutu de o wange ngomi mimanarama hupaya kao nyawa moiö de nia hidogoronaka ngomi minï diaiua o huha, maöraha ngomi mihi barihi o Abari ma Oa ma Jou Madutuino gënanga nginika.

¹⁰ Ngomi miwango itebini, itiai deʼ ma howono koiwa nginika ningaku-ngakuoka o Kristusika. Kangini tongomi mia hakihi, kogenangoli ma Jou Madutu.

¹¹ Ngini nihi öriki ngomi minihidiai ngini moi-moi hokä womatëngo o ama wahi diai ai ngoha-ngohaka.

¹² Ngomi minï nasihati ngini, ngomi minï hititila ngini deʼ ngomi minï gëgoto hupaya ngini niwango hoko gënanga marupa hiädono ma Jou Madutu ai hininga nia sanangi. Karana ma Jou Madutu winï ahoko ngini la nidadi ma Jou Madutu ai Dunia ma Hungi makawaha deʼ nia mäo to ëna mamulia.

¹³ Nagaohi o hali moi mahomoa yadiai ngomi salalu mitemo tarima kasi ma Jou Madutuika. O hali gënanga ena ganga maorahoka ngomi mihi ngahu o abari ma Jou Madutuino nginika, ngini ni ihene deʼ nia tarima o abari gënanga, hokä o abari o nyawa inoua, mä hokä o abari i gou-goungu ma Jou Madutuino. Una ganga magogiria womanarama nia diri magoronaka ningö ngaku-ngaku o Kristusika.

¹⁴ Roriadodoto, o hali kiaka ngini nia ohana yaohanokali ma Jou Madutu ai jemaat o Yudea madaeraoka, yodä dadioka to Kristus Yesus. Ngini nia ohana o huha de o hangihara nia hoana o nyawaino mahirete, imatero hokä yaoha-ohana ma Jou Madutu ai jemaat o Yudea madaeraoka gënanga hagala o Yahudi manyawaino.

¹⁵ Hagala o nyawa gënanga iwi toma ma Jou Yesus deʼ o nabi-nabi, inoli ngomi imï aniaya. Onanga yähaturü o nyawa mata-mata, deʼ ma Jou Madutu kautuö de wäsanangiua onangika.

¹⁶ Igoungu önanga imï tätatoko ngomi mangale mihi ngahu o Yahudi manyawa ikaua, o abari yakunu yahihalamati o hoana de o berera manyawa gënanga. De hoko gënanga hagala o Yahudi manyawa gënanga yö dogo gila-gila toönanga manga baradoha hiädono yadono magegëtongo itiai. De öraha nanga mabobaha önanga yatapal̄u ma Jou Madutu ai murukä!

O Paulus ai ngigo wä ädono o Tesalonika manyawa wohigalioli

¹⁷ Mä Roriadodoto, kade madero ngomi mima tingaka jai-jai dede ngini – homa kitingaka nanga lakooka ma nanga hiningaka kowali – ngomi kai dogo minï igo de minï nganono nginika deʼ mihidailako mia gou-goungu la homaka mäkeoli dede ngini!

¹⁸ Ngomi mia niati minï ädono ngini; deʼ ngohi tohi tailoka mamoi mahinoto, mä o Ibilihi imï tatoko ngomi.

¹⁹ Igoungu kangini tongomi mia ngonganono deʼ mia mörene. Hababu nako dahaö ma Jou Yesus woböaoli, deʼ ngone hihimangika, done kangini aha nia dadi tongomi mia hininga iamoko!

²⁰ Itiai kangini de mia hininga i amoko deʼ tongomi mia mörene!