O TESALONIKA MADODIHIRAKA 1 - MA JOU AI BUKU O ABARI MA OA

¹ Roriadodoto jemaat o Tesalonika mabereraka, nidädadi ma Jou Madutu o Ama ai umati deʼ ma Jou Yesus Kristus. Ngomi, enagënanga o Paulus, o Silas deʼ o Timotius minganono tanu ma Jou Madutu wohidöaka Ai barakati deʼ Ai lolä nginika.

O Tesalonika manyawa manga wowango deʼ manga ngongaku

^2-3 Ngomi salalu misukur ma Jou Madutuika karana Riadodoto mata-mata. Mihi ëto-ëtongo ngomi mimä niata ma Jou Madutu deʼ nanga Amaika, ngomi salalu minihininga ngini. Ngomi salalu minï niata ngini. Ngomi mio hininga sarakia nihimatoko nia manarama magoronaka ngini niwi ngaku o Kristusika, sarakia ngini nia dora o nyawa mahomoa hiädono niä leleani önanga, deʼ sarakia ngini nimahi nganono dema kekete nanga Jouika o Yesus Kristus.

⁴ Ngomi mihi öriki, Roriadodoto, ma Jou Madutu winï dora ngini deʼ winï irikoka ngini nidadi to Una ai nyawa woma dinga-dingakoka.

⁵ Hababu ngomi mihi ngahu o Abari ma Oa kade o demo-demoua dika, mä made o kuahaö deʼ de ma Jou Madutu ai Womaha. Deʼ ngomi mihi goungu duru mangale o diai o Abari ma Oa ino gënanga. Ngini nihi öriki sarakia ngomi miwango mangale nia paralu maöraha ngomi naga tingini nia hidogoronaka.

⁶ Ngini nia nïki tongomi mia dulada deʼ ma Jou ai dulada. Ngarokö hoko gënanga duru nia tagongo o hangihara, ngini nia tarima de nia mörene o abari ngomi miao-ao nginika. O mörene gënanga ma Jou Madutu ai Womaha inihi döaka.

⁷ De hoko gënanga ngini nidadi o dulada mata-mata o Haranioka manyawaika o Makedonia deʼ o Akhaya mabereraka.

⁸ Hababu i muläenge nginioka, o abari mangale ma Jou yodogerewotoka hiädono o Makedonia deʼ o Akhaya mabereraka. Deʼ kagenangokadaua dika; i goungu o abari mangale sarakia ngini ningaku ma Jou Madutuika yadonoka okiaika dika, hiädono ngomi i paralu okaua okianaga mihiade-ade.

⁹ O nyawa mata-mata gënanga yoade-ade mangale sarakia nimï tarima ngomi maöraha madodihiraka ngomi miböa nginika. Onanga yoade-ade sarakia önanga yamal̄a o gomanga-o gomanga deʼ yoböa ma Jou Madutuika woma tëngo-tëngoka wowango-wango la niwï leleani Unangika.

¹⁰ Onanga yoade-adeoli mangale sarakia önanga yönganono ma Jou Madutu ai Ngohaka ai böa o horogaino, enagënanga o Yesus, ma Jou Madutu wihi wangoka o honenge mahidogoronaka. O Yesus kage Unangoli wonahihalamati ngone de ma Jou Madutu ai murukä aha i bö böa-böa.