रोमियो 9 - बुक्सा

परमेसर और यहूदी लोग

¹ मैं मसी मै सच कैबौ हौं, झूँट ना बोलौ हौं और मेरे भीतर की आत्‍मा बी पबित्‍तर आत्‍मा मै गभाई देवै है।

² कै मैं भौत दुखी हौं, और मेरो मन हमेसा बेचैन रैहबै है।

³ कास ऐंसो हो सकतो कै मैं अपने भईयौ, बहनौ और रिस्तेदारौ के ताँई मसी को सराप अपने ऊपर ले लेतो और मसी सै अगल हो जातो।

⁴ जो ईसराइली हैं और जिनकै परमेसर की औलाद होनै को अधकार है, जे परमेसर की महिमा कै देख चुके हैं, और परमेसर नै इनके संग करारनामो करो है। जिनकै मूसा के दुआरा देए भए नियम, सच्‍ची आराधना, और बचन दओ है।

⁵ बापदादा बी उनई के हैं और मसी बी सरीर के अनुसार उनई सै पैदा भओ है, जो सबको परमेसर है और हमेसा धन्‍न है! ऐंसोई होए।

⁶ इसको मतलब जौ ना है कै परमेसर नै अपनो बचन पूरो ना करो है, कैसेकै ईसराइल के बंस मै पैदा सबई लोग सच्‍चे ईसराइली ना हैं।

⁷ और इब्राहिम के बंस मै जलम लैनै सैई सबई उसकी सच्‍ची औलाद ना हो जावै हैं। कैसेकै परमेसर नै बोलो है कै, “तेरो बंस इसहाक सैई अग्गे बढ़ैगो।”

⁸ यानी सरीर की औलाद परमेसर की औलाद ना हैं, बलकन परमेसर के बादे के अनुसार जो पैदा भए हैं बेई इब्राहिम की सच्‍ची औलाद हैं।

⁹ और बादे को बचन ऐंसे कैओ गओ हो कै, “ठीक उसई टैम मै मैं लौहटंगो और सारा के एक लौंड़ा होगो।”

¹⁰ और सिरप जौई ना, पर जब रिबका बी एक आदमी सै यानी हमरे अब्बा इसहाक सै गरबबती भई,

¹¹ तौ बालकौ के पैदा होनै सै पैले और उनको कुछ बी भलो बुरो कन्‍नै सै पैले परमेसर नै उनके करमौ के अनुसार ना छाँटो पर परमेसर नै अपनी मरजी सै एक बौ चुनो जिस्सै बाकी मरजी पूरी हो जाऐ।

¹² और रिबका कै जौ कैओ गओ हो, “बड़ो लौंड़ा छोटे लौंड़ा की सेवा करैगो।”

¹³ जैसो पबित्‍तर सास्तर मै लिखो है, “मैंनै याकूब कै पियार करो और ऐसाब सै नफरत करी।”

¹⁴ तौ फिर हम का कैंऐ? का परमेसर अनियाय कन्‍नै बारो है? बिलकुल ना!

¹⁵ कैसेकै बौ मूसा सै कैबै है कै, “मैं जिस किसी के ऊपर दया कन्‍नो चाँहौ, उसई के ऊपर दया करंगो, और जिस किसी के ऊपर तरस खानो चाँहौ, उसई के ऊपर तरस खांगो।”

¹⁶ इसताँई जौ सब कुछ आदमी की मरजी या उसकी मैहनत के ऊपर ना, बलकन दया कन्‍नै बारे परमेसर के हात मै है।

¹⁷ कैसेकै पबित्‍तर सास्तर मै परमेसर नै फिरौन सै जौ कैओ हो कै, “मैंनै तेकै इसताँई खड़ो करो हो कै मैं अपनी सकति तेरे ऊपर दिखा सकौं, और मेरो नाम सिगरी धरती मै फैल जाऐ।”

¹⁸ इसताँई परमेसर जिस किसी कै चाँहबै है, उसके ऊपर दया करै है, और जिस किसी कै ना चाँहबै उसकै कठोर बना देवै है।

परमेसर की घुस्सा और दया

¹⁹ तौ सायद तू मैंसै फिर कैगो, “फिर बी परमेसर हम्मै काए बुराई ढूंड़ै है? कैसेकै कौन उसकी मरजी को बिरोद कर सकै है?”

²⁰ भलो आदमी तू कौन है जो परमेसर कै पलट कै जबाब देवै है? का कोई चीज अपने बनानै बारे सै पूँछ सकै है कै, “तैनै मैं ऐंसे काए बनाई?”

²¹ का कुम्हार कै जौ हक ना है, कै बौ एकई गौंदा मै सै, एक बरतन इज्‍जत के ताँई और दूसरे कै बेजती के ताँई बनाऐ?

²² तौ का भओ अगर परमेसर नै अपनी घुस्सा दिखानै और अपनी सकति परकट कन्‍नै के ताँई उन लोगौ की जो घुस्सा के हकदार हे और जिसको बिनास होनै बारो हो, बड़े सबर के संग उनकी बरदास करी।

²³ जो दया के लोग बानै अपनी महिमा के ताँई पैलेसैई तईयार करे हे, उनके ऊपर बानै अपनी महिमा भरपूरी सै चमकाई।

²⁴ उस दया के हकदार हम हैं, जो बानै ना सिरप यहूदिऔं मै सै बलकन गैर यहूदिऔं मै सै बी बुलाए।

²⁵ जैसो कै होसे नबी की किताब मै लिखो है, “जो लोग मेरे ना हे उनकै मैं ‘अपने लोग’ कैंगो। और बौ बईयर जिस्सै मैं पियार ना करौ हौं, मैं उसकै ‘अपनी पियारी’ कैंगो।”

²⁶ और, “जिस जघै बानै उनसै जौ कैई ही, ‘तुम मेरी परजा ना हौ।’ बाई जघै मै बे ‘जिन्‍दे परमेसर की औलाद कैलांगे।’”

²⁷ और यसाया ईसराइल के बारे मै जोर सै चिल्‍लाकै कैबै है, “चाँए ईसराइलिऔ की संखिया समन्‍दर के रेता के कड़ौं के हाँई भौस्सी होए तौबी उनमै सै थोड़े सेई बचंगे।

²⁸ कैसेकै परभु धरती के ऊपर अपने नियाय कै पूरी तरै सै जल्दी पूरो करैगो।”

²⁹ जैसे यसाया नै पैले बी कैई ही, “अगर सरब सकतिमान परभु हमरे ताँई, बंस ना छोड़तो तौ हम सदोम के जैसे और अमोरा जैसेई नास हो जाते।”

ईसराइल को अबिसवास

³⁰ तौ फिर हम का कैंऐ? जौ कै गैर यहूदी लोगौ कै जो धारमिकता की खोज मै ना हे, उनौनै धारमिकता कै पा लओ, जो बिसवास सै मिलै है।

³¹ मगर ईसराइल के लोग जो ऐंसे नियम मै चलनो चाँहै हे जो उनकै धरमी बनाबै है, बे उसके अनुसार ना जी सके।

³² ऐंसो काए भओ? कैसेकै ईसराइली बिसवास सै ना, बलकन अपने करमौ सै पानै की कोसिस कर रए हे, उनौनै उस पत्‍थर सै ठोकर खाई, जो “ठोकर को पत्‍थर” है।

³³ जैसो पबित्‍तर सास्तर मै लिखो है, “देखौ मैं सिओन मै एक पत्‍थर रख रओ हौं, जो लोगौ कै ठेस लगाबै है, और एक चट्‍टान जो ठोकर लगाबै है। मगर जो कोई उसके ऊपर बिसवास करैगो उसकी कबी बेजती ना होगी।”