रोमियो 11 - बुक्साईसराइल के ऊपर परमेसर की दया 1 इसताँई मैं पूँछौ हौं, “का परमेसर नै अपनेई लोगौ कै छोड़ दओ है?” बिलकुल ना, कैसेकै मैं बी एक ईसराइली हौं, मैं इब्राहिम की औलाद और बिन्यामीन के गोत को हौं। 2 परमेसर नै अपने लोगौ कै ना छोड़ो, जिनकै बानै पैलेई सै चुनो हो। और का तुम ना जानौ हौ, कै पबित्तर सास्तर एलिया के बारे मै का कैबै है, कै एलिया ईसराइल के खिलाप परमेसर सै पिराथना कर रओ हो। 3 “हे परभु, उनौनै तेरे नबिऔ कै मार डारो, और तेरे बेदिऔ कै तोड़कै गिरा दओ, सिरप एक मैंई बचो हौं और बे मैंकै बी मारनै की कोसिस कर रए हैं।” 4 मगर परमेसर नै उसकै कैसे जबाब दओ हो? “मैंनै अपने ताँई सात हजार लोगौ कै बचाकै रखर खाओ है। जिनौनै बाल देबता के सामने घूंटे ना टेके हैं।” 5 और बैसेई आज कल बी कुछ यहूदी लोग बचे भए हैं जो उसके किरपा के कारन चुने भए हैं। 6 और अगर जौ परमेसर के किरपा सै भओ है, तौ जौ हमकै काम सै ना मिलो है अगर काम सै मिलतो तौ किरपा, किरपा ना रैहती। 7 तौ इस्सै का? ईसराइल के लोग जिसकै ढूंड़ रए हैं, बौ उनकै ना मिलो। मगर चुने भए लोगौ कै बौ मिल गओ, और बाकी के लोगौ को दिल कठोर बन गओ। 8 और जैसो पबित्तर सास्तर मै लिखो है कै, “परमेसर नै उनकी बुद्धि भरस्ट कर दई, और उसनै उनकै ऐंसी आँख दे दई, जो देख ना सकै हैं, और ऐंसे कान, जो सुनै ना हैं और उनकी ऐंसी हालत आज तक बनी भई है।” 9 दाऊद कैबै है, “उनकी रोटी उनके ताँई फाँसी, जार, ठोकर, और सजा को कारन बनै। 10 उनकी आँखौ मै धुंदरोपन छा जाऐ जिस्सै बे देख ना सकैं। तू उनकी पीठ हमेसा झुकाए रख।” 11 पर मैं कैबौ हौं, का उनौनै इसताँई ठोकर खाई, कै बे गिरकै खतम हो जाँय? बिलकुल ना, पर उनके गलती कन्नै के कारन गैर यहूदी लोगौ कै मुक्ति मिली है, कै यहूदिऔं कै जरन पैदा हो। 12 और अगर उनके गलत कदम सै, सिगरी दुनिया सेट हो गई, और उसके कामियाब ना होनै सै गैर यहूदी लोग सेट हो गए, तौ सिगरे यहूदी लोगौ के बापस आनै सै कितनो जादा फाएदा होगो। गैर यहूदी लोगौ की मुक्ति 13 मैं तुम गैर यहूदिऔं के ताँई भेजो भओ चेला हौं, और जौ सेवा मेरे ताँई गर्ब की बात है। 14 ताकि किसी तरै सै मैं अपने लोगौ मै जरन पैदा करबाकै उनमै सै कईऔ कै मुक्ति दौं। 15 कैसेकै अगर उनकै छोड़नै की बजै सै दुनिया सै परमेसर के संग मेल-मिलाब पैदा होवै है, तौ फिर परमेसर के दुआरा यहूदी लोगौ कै अपनाऐ जानै सै मरे भएऔं मै सै जिन्दो कन्नै के बराबर ना होगो? 16 अगर माड़े भए चून की पैली लोई परमेसर कै चढ़ानै सै पबित्तर है, तौ सिगरो माड़ो भओ चून बी पबित्तर है, और अगर जड़ पबित्तर है, तौ डुग्गी बी पबित्तर हैं। 17 पर अगर कुछ डुग्गी तोड़कै अगल कर दई गंई और तुम जो जंगली जैतून हौ, और तुम उनकी जघै मै कलम लगाए गए हौ और तुम उस जैतून की जड़ सै तागत लेते रैहए। 18 और अगर तुम डुग्गी मै घमंड करौ हौ तौ याद रक्खौ कै तुम जड़ कै ना पालौ हौ, बलकन जड़ तुमकै पालै है। 19 पर अब तुम कैऔगे, “हाँ, इसताँई बे डुग्गी तोड़ी गंई, कै मैंकै कलम करकै लगाओ जाऐ।” 20 जौ सच है, कै बे अपने अबिसवास के कारन काटकै अगल कर दए गए, मगर तुम अपने बिसवास के कारन अपनी जघै मै बने भए हौ। तुम घमंड ना करौ, पर चौकस रैहओ। 21 कैसेकै अगर परमेसर नै जब उन डुग्गिऔ कै ना रैहन दओ जो उसमै पैलेई सै हीं तौ बौ तुमकै कैसे रैहन देगो? 22 इसताँई परमेसर की दया और बाकी सकताई मै धियान दे। जौ सकताई उसके ताँई है जो गिरे हैं, पर तुम बाकी दया मै बने रैहऔ, तौ तुमरे ऊपर दया होगी। ना तौ तुम बी पेड़ सै काट फैंके जाऔगे। 23 और अगर बे अबिसवास मै बने ना रैहए तौ उनकै बी फिर सै पेड़ मै जोड़ दओ जागो कैसेकै परमेसर के धौंरे उनकै फिर सै जोड़नै की सकति है। 24 तुम तौ जंगली जैतून पेड़ की डुग्गी हौ, इसके बाद बी तुमकै काटकै नियम के खिलाप अच्छे जैतून के पेड़ सै जोड़ दओ, तौ जो अच्छे पेड़ की कटी भई डुग्गी हैं, उनकै फिर सै काए ना जोड़ैगो? सिगरे ईसराइल कै मुक्ति 25 हे भईयौ, कहीं ऐंसो ना हो जाऐ, कै तुम अपने आपकै होसिआर समजल लगौ, इसताँई मैं ना चाँहौ हौं कै तुम इस राज सै अनजान रैहऔ, कै जब तक गैर यहूदी लोग पूरी तरै सै परमेसर के टब्बर के हिस्सा ना बन जावै हैं तब तक ईसराइली लोग ऐंसेई कठोर रैहंगे। 26 और ऐंसो हो जानै के बाद सिगरे ईसराइल की मुक्ति होगी। जैसो पबित्तर सास्तर मै लिखो है, “मुक्ति दैनै बारो सिओन सै आगो, बौ याकूब के टब्बर सै सबई अधरमौ कै दूर करैगो। 27 और उनके संग मेरो जौ बादो होगो, जब मैं उनके पापौं कै दूर कर दंगो।” 28 अच्छी खबर की ओर सै देखैं तौ, बे परमेसर के दुसमन हैं जौ तुमरे ताँई फाएदा की बात है, मगर परमेसर दुआरा चुने जानै की ओर सै देखैं तौ बे बापदादौं की बजै सै परमेसर के पियारे हैं। 29 कैसेकै परमेसर जिसकै बुलाबै है, और जिसकै बौ बरदान देवै है, उसकी ओर सै अपनो मन कबी ना बदलै है। 30 और जिस तरै तुम पैले परमेसर की आगियाँ ना मानै हे, पर अब ईसराइलिऔ के आगियाँ ना माननै सै तुमरे ऊपर दया भई है। 31 बैसेई अब ईसराइली लोग बी उसकी आगियाँ कै ना मानै हैं ताकि जैसे परमेसर की दया तुमरे ऊपर भई, बैसेई परमेसर की दया उनकै बी मिलै। 32 कैसेकै परमेसर नै सब लोगौ कै आगियाँ ना माननै को गुलाम बना दओ है ताकि बौ सबके ऊपर दया करै। परमेसर धन्न है 33 परमेसर की दौलत, बुद्धि और गियान कितने गैहरे हैं, उसके नियाय कन्नै को तरीका समज सै परे है, और बाके रस्तौं कै कौन समज सकै है? 34 पबित्तर सास्तर मै लिखो है, “परभु के मन कै कौन जानै है? और उसकै सला दैनै बारो कौन हो सकै है?” 35 “किसी नै परमेसर कै कुछ देओ है? कै बौ उसके बदले मै कुछ दे।” 36 कैसेकै सब कुछ बनानै बारो बौई है। उसई सै सब कुछ टिको है और बौ उसई के ताँई है। उसकी महिमा हमेसा होती रैह! ऐंसोई होए। |
New Life Compute Institute [NLCI] - CC BY-NC-ND 4.0