परकासन 16 - बुक्सा

परमेसर के कोप के सात कटोरा

¹ फिर मैंनै मन्‍दर मै सै एक तेज ऊँची अबाज सुनी, जो उन सातौं सुरगदूतौं सै जौ कैरई ही, “जाऔ! और परमेसर के कोप के सात कटोरा धरती के ऊपर डार दो।”

² और पैलो सुरगदूत गओ और उसनै धरती के ऊपर अपनो कटोरा लौटो। जिन लोगौ मै जनाबर को निसान लगो हो और जो उसकी मूरती की पूजा करै हे, उनके बदन मै भौत बुरे और दरद दैनै बारे फोड़ा लिकरे।

³ इसके बाद जब दूसरे सुरगदूत नै अपनो कटोरा समन्‍दर मै लौटो और समन्‍दर को पानी मरे भए आदमिऔ के खून के जैसो हो गओ और समन्‍दर मै रैहनै बारे सबई जनाबर मर गए।

⁴ फिर तीसरे सुरगदूत नै नद्‍दिऔं और पानी के सोतौं मै अपनो कटोरा लौट दओ। बे खून मै बदल गए।

⁵ तबई मैंनै पानी के सुरगदूत कै जौ कैते सुनी कै, “हे पबित्‍तर, जो है, और जो हो, तू नियाय कन्‍नै बारो है और तैनैई जौ नियाय करो है।

⁶ कैसेकै उनौनै पबित्‍तर लोगौ, और नबिऔ को खून बहाओ हो, और तैनै उनकै खून पिबाओ, कैसेकै बे इसी के हकदार हे।”

⁷ फिर मैंनै बेदी सै आते भए जौ अबाज सुनी, “हाँ, हे सरब सकतिमान परभु परमेसर! तेरो नियाय सच्‍चो और भलो है।”

⁸ फिर चौथे सुरगदूत नै अपनो कटोरा सूरज के ऊपर लौटो, और सूरज कै आदमिऔ कै जरानै को अधकार देओ गओ।

⁹ और आदमी भयानक गरमी सै जरल लगे, उनौनै परमेसर के नाम कै कोसो जिसको इन मुसीबतौं मै अधकार है। पर उनौनै गलत कामौ कै कन्‍नो ना छोड़ो और नाई परमेसर की महिमा करी।

¹⁰ इसके बाद पाँचमे सुरगदूत नै अपनो कटोरा उस जनाबर के सिंगासन मै लौट दओ और उसके राज मै इन्धेरो हो गओ और लोग दरद के मारे अपनी जीब चबाल लगे।

¹¹ और अपने दरद और फोड़ौ के कारन सुरग के परमेसर की बुराई करी, और अपने बुरे कामौ सै मन ना फिराओ।

¹² फिर छटमे सुरगदूत नै अपनो कटोरा फरात नाम की बड़ी नद्‍दी मै लौट दओ और उसको पानी सूक गओ। इस्सै पूरब की दिसा के राजाऔं के ताँई रस्ता बन गई।

¹³ और मैंनै देखो कै उस बड़े अजगर के मौह सै और जनाबर के मौह सै और झूँटे नबी के मौह सै तीन दुसट आत्‍मा लिकरीं, जो मिड़का के जैसे दिखाई दे रईं हीं।

¹⁴ जे सैतान की दुसट आत्‍मा हीं, और उनमै चमत्कार के चिन्‍नौ कै दिखानै की सकति ही। बे सिगरे दुनिया के राजाऔं के धौंरे इसताँई जावै हीं कै, सरब सकतिमान परमेसर के बड़े दिन की लड़ाई के ताँई उनकै इखट्‍टे कर सकैं।

¹⁵ “देखौ! मैं चोर के हाँई आ रओ हौं। धन्‍न है बौ, जो जगतो और अपने लत्‍तौ कै अपने संग रक्‍खै है, ताकि बौ नंगो ना फिरै और लोगौ के सामने उसकै सरमिन्‍दा ना होनो पड़ै।”

¹⁶ उनौनै राजाऔं कै उस जघै मै इखट्‍टो करो जो इबरानी भासा मै हरमगिदोन कैलाबै है।

¹⁷ और सातमे सुरगदूत नै जब अपनो कटोरा हवा मै लौट दओ, तौ मन्‍दर के सिंगासन मै सै एक ऊँची अबाज आई, “खतम हो गओ।”

¹⁸ फिर बिजली चमकी, ऊँची अबाज, बादरौं को गरजनो और एक ऐंसो हालोचालो आओ जैसो धरती मै आदमी कै बनाए जाने सै लेकै अब तक कबी ना आओ हो। बौ हालोचालो इत्‍तो बड़ो और सकतिसाली हो;

¹⁹ कै बौ महान सैहर तीन टुकड़ौ मै बिखर गओ और हर देसौ के सैहरौं को नास हो गओ। तब परमेसर नै बड़े बेबिलोन सैहर कै सजा दैनै के ताँई याद करो हो। ताकि बौ उसकै अपनी भबकते घुस्सा के रस सै भरो भओ कटोरा कै पिबाय।

²⁰ और हर एक टापू अपनी जघै सै गायब हो गए और पहाड़ौ को पतो तक ना रैहओ।

²¹ और चालीस किलो के ओरे, आसमान सै आदमिऔ के ऊपर गिर रए हे। और ओरौ की बड़ी मुसीबत के कारन आदमी परमेसर कै कोस रए हे कैसेकै जौ एक भयानक मुसीबत ही।