मरकुस 9 - बुक्सा

¹ और ईसु नै जौ बी कैई, “मैं तुमसै सच कैरओ हौं, हिंया कुछ ऐंसे लोग खड़े हैं, जो तब तक ना मरंगे, जब तक बे परमेसर कै राज कन्‍नै के ताँई सकति के संग आतो भओ ना देख लैं।”

ईसु को रूप बदल जानो

² छै दिन के बाद ईसु नै पतरस, याकूब और यहून्‍ना संग लए, और किसी ऊँचे पहाड़ के एकान्‍त मै ले गओ, और उनके सामने उसको रूप बदल गओ।

³ और उसके लत्‍ता ऐंसे चमकीले और सपेद चिट्‌ठा हो गए कै दुनिया को कोई बी धोबी उनकै इतने चमकीले और सपेद चिट्‌ठा ना कर सकै है।

⁴ तब उनकै मूसा और एलिया दिखाई दए, और बे ईसु के संग बातचीत कर रए हे।

⁵ फिर पतरस नै ईसु सै कैई, “हे गुरू, हमरो हिंया रैहनो अच्‍छो है; इसके ताँई हम तीन तम्बू खड़े करैं, एक तेरे ताँई, एक मूसा के ताँई और एक एलिया के ताँई।”

⁶ पतरस की समज मै ना आ रओ हो कै, बौ का कैऐ कैसेकै बे भौत डर गए हे।

⁷ तबई एक बादर आओ और उनके ऊपर छाँ गओ, और उस बादर मै सै जौ अबाज सुनाई दई, “जौ मेरो पियारो लौंड़ा है इसकी सुनौ।”

⁸ इसके तुरन्‍त बाद जब चेलौ नै अपने चारौ ओर नजर दौड़ाई, तौ उनकै ईसु के सिबा और कोई ना दिखाई पड़ो।

⁹ ईसु नै पहाड़ सै उतरते टैम उनकै आदेस दओ कै, “जब तक आदमी को लौंड़ा, मरे भए मै सै जी ना उठै, तब तक जो तुमनै देखो है, उसके बारे मै किसी कै ना बतइओ।”

¹⁰ उनौनै ईसु की जौ बात मान लई, पर बे आपस मै सोच-बिचार करकै कैललगे कै, “मरे भए मै सै जी उठनै” को अरथ का हो सकै है?

¹¹ फिर उनौनै ईसु सै पूँछी, “सास्तरी काए कैबै हैं कै एलिया को पैले आनो जरूरी है?”

¹² ईसु नै उनकै जबाब दओ कै, “एलिया सचमुच पैले आकै सब कुछ सुदारैगो, पर आदमी के लौंड़ा, के बारे मै पैले सै पबित्‍तर सास्तरौं मै जौ काए लिखो है कै बौ भौत दुख उठागो, और नकारो जागो?

¹³ पर मैं तुमसै कैरओ हौं कै एलिया आ चुको है, और जैसो बाके बारे मै लिखो है, उनौनै जो कुछ चाँहो बाके संग करो।”

दुसट आत्‍मा सै परेसान लौंड़ा कै ठीक कन्‍नो

¹⁴ और जब बे दूसरे चेलौ के धौंरे आए, तौ देखौ कै उनके चारौ लंग एक बड़ी भीड़ लगी पड़ी है और सास्तरी उनके संग बैहैस कर रए हैं।

¹⁵ ईसु कै देखतेई लोग अचम्बे मै पड़ गए और दौड़ते भए उसकै परनाम कन्‍नै आए।

¹⁶ ईसु नै उनसै पूँछी, “तुम लोग इनके संग का बैहैस कर रए हौ?”

¹⁷ भीड़ मै सै एक नै बाकै जबाब दओ कै, “गुरू, मैं अपने लौंड़ा कै, तेरे धौंरे लाओ हो। जिसमै गूँगी दुसट आत्‍मा समाई भई है।

¹⁸ जहाँ कहीं बौ दुसट आत्‍मा उसके ऊपर आवै है बहीं पटक देवै है और लौंड़ा मौह सै झाग लिकारल लगै है और दाँत कटकटाते भए ऐंठ जावै है और मैंनै तेरे चेलौ सै कैई कै बे उसकै लिकार दैं, पर बे लिकार ना सके।”

¹⁹ ईसु नै उनकै जबाब देकै कैई कै, “हे अबिसवासी लोगौ, मैं कब तक तुमरे संग रैहंगो? और कब तक तुमरी सैहंगो? बा लौंड़ा कै मेरे धौंरे लिआऔ।”

²⁰ तब बे बा लौंड़ा कै ईसु के धौंरे ले आए और जब दुसट आत्‍मा नै ईसु देखो, तौ उस दुसट आत्‍मा नै बौ लौंड़ा तुरन्‍त मरोड़ो, और बौ लौंड़ा जमीन मै गिर पड़ो, और मौह सै झाग लिकारते भए लोटल लगो।

²¹ ईसु नै उसके अब्बा सै पूँछी, “इसकै ऐंसो कितने दिनौ सै है?” उसके अब्बा नै जबाब दओ, “बचपन सैई।”

²² “दुसट आत्‍मा इसकै मार डान्‍नै के ताँई कबी आग मै गिरा देवै है तौ कबी पानी मै। का तू कुछ कर सकै है? तौ हमरे ऊपर तरस खाकै हमरी सायता कर।”

²³ ईसु नै उस्सै कैई, “अगर तू कर सकै है? जौ का बात है? बिसवास कन्‍नै बारौ के ताँई सब कुछ हो सकै है।”

²⁴ लौंड़ा के अब्बा नै तुरन्‍त गिड़गिड़ाकै कैई, “हे परभु, मैं बिसवास कर रओ हौं, मेरे अबिसवास कै हटा।”

²⁵ ईसु नै देखो कै भीड़ बढ़ती जा रई है, तौ उसनै दुसट आत्‍मा जौ कैह कै डाँटी कै, “ऐ गूँगी और बैहरी आत्‍मा, मैं तेकै हुकम देरओ हौं कै इसमै सै लिकर जा, और फिर इसमै कबी ना घुसिए।”

²⁶ तब बौ चिल्‍लाकै और उसकै जोर सै मरोड़कै लिकर गई, और लौंड़ा मरो भओ सो हो गओ, हिंया तक कै भौत से लोग कैललगे, कै बौ मर गओ

²⁷ फिर ईसु नै लौंड़ा कै हात पकड़कै उठाओ, और बौ खड़ो हो गओ।

²⁸ जब ईसु घर मै आओ, तौ उसके चेलौ नै एकान्‍त मै उस्सै पूँछी, हम उसकै काए ना लिकार सके?

²⁹ ईसु नै उनसै कैई, “ऐंसी दुसट आत्‍मा पिराथना के सिबाए और किसी तरीका सै ना लिकारी जा सकै हैं।”

अपनी मौत के बारे मै ईसु को कैनो

³⁰ फिर उनौनै बौ जघै छोड़ दई, और जब बे गलील मुलक होते भए जा रए हे तौ ईसु ना चाँहै हो कै किसी कै जाको पतो चलै,

³¹ कैसेकै बौ सिरप अपने खास चेलौ कै सिका रओ हो। ईसु नै उनसै कैई, “आदमी को लौंड़ा, आदमिऔ के हवाले धोके सै पकड़बाओ जागो और बे उसकै मार डारंगे। मारे जानै के तीन दिन बाद बौ जी उठैगो।”

³² पर बे इस बात कै समज ना सके और ईसु सै पूँछनै सै डरै हे।

सबसै बड़ो कौन है

³³ फिर बे कफरनहूम सैहर आए। ईसु जब एक घर मै हो, बानै अपने चेलौ सै पूँछी, “रस्ता मै तुम किस बात मै सोच-बिचार कर रए हे?”

³⁴ पर बे चुप रैहए, कैसेकै बे रस्ता मै चलते भए जौ बिचार कर रए हे कै हम्मै सबसै बड़ो कौन है?

³⁵ तब उसनै बैठकै बारौंह चेलौ कै बुलाकै उनसै कैई कै, “अगर कोई बड़ो होनो चाँहै, तौ सबसै छोटो होकै सबकी सेवा कन्‍नी होगी।”

³⁶ और उसनै एक बालक कै लेकै चेलौ के बीच मै खड़ो करो और उसकै गोदी मै लेकै उनसै कैई,

³⁷ “मेरे नाम मै जो कोई किसी बी एक बालक कै अपनाबै है, बौ मैंकै अपना रओ है, और जो कोई मैंकै अपनाबै है, बौ ना सिरप मैंकै अपना रओ है, पर मेरे अब्बा कै बी अपना रओ है, जिसनै मै भेजो हौं।”

³⁸ तब यहून्‍ना नै उस्सै कैई, हे गुरू, हमनै एक आदमी कै तेरे नाम सै दुसट आत्‍मा कै लिकारते भए देखो और हम उसकै मनैह करल लगे, कैसेकै बौ हमरे संग को ना हो।

³⁹ ईसु नै कैई, “उसकै मत रोकौ, ऐंसो कोई बी ना है, जो मेरो नाम लेकै चमत्कार दिखाकै और तुरन्‍त बाद मै मेरी बुराई करै।

⁴⁰ कैसेकै जो हमरे बिरोद मै ना है, बौ हमरी ओर है।

⁴¹ मैं तुमसै सच कैरओ हौं कै जो तुमकै एक गिलास पानी मेरे नाम सै इसताँई पिबाय कै तुम मसी के चेला हौ, तौ बौ अपनो ईनाम किसी रीती सै ना खोगो।

ठोकर की बजै बननै बारौ कै चितौनी

⁴² “पर इन छोटौ मै सै जो मेरे ऊपर बिसवास करै हैं, अगर उनकै कोई पाप के रस्ता मै ले जावै है, तौ उसके ताँई परमेसर की सजा सै जौ अच्‍छो होतो कै एक बड़ी चक्‍की को पटा उसकी गरदन मै लटकाओ जाय और बौ समन्‍दर मै फैंक दओ जाय।

⁴³ टुंटा होकै परमेसर के संग हमेसा की जिन्‍दगी मै परबेस कन्‍नो, तेरे ताँई इस्सै भलो है कै दो हात रैहते भए नरक के बीच उस आग मै डारो जाय जो कबी बुतनै की ना है। इसताँई अगर तेरो हात तेरे ताँई पाप की बजै बनै है तौ उसकै काट डार।

⁴⁵ लंगड़ो होकै सुरग मै परबेस कन्‍नो तुमरे ताँई दो पाँऐ रैहते भए नरक मै डारनै सै अच्‍छो है। इसताँई अगर तेरो पाँऐ तेकै पाप के रस्ता मै ले जाय तौ उसकै काट दे।

⁴⁷ कांड़ो होकै परमेसर के राज मै परबेस कन्‍नो तुमरे ताँई दो आँख रैहते भए नरक मै डारनै सै अच्‍छो है। इसताँई अगर तेरी आँख तेसै पाप करबाय तौ उसकै लिकार दे।

⁴⁸ जहाँ के कीड़ा कबी ना मरै है और जहाँ की आग कबी ना बुतै है।

⁴⁹ कैसेकै हर आदमी कै आग सै नमकीन करो जागो।

⁵⁰ नौन अच्‍छो है, पर अगर बाको सबाद बिगड़ जाय, तौ तुम उसकै किस्सै नमकीन बनाऔगे? अपने आपकै नमकीन बनाए रक्‍खौ और आपस मै मेल-जोल रक्‍खौ।”