मरकुस 3 - बुक्सासूके हात बारे आदमी को ठीक होनो ( मत्ती 12:9–14 ; लूका 6:6–11 ) 1 और फिर ईसु पिराथना घर मै गओ। बहाँ एक आदमी हो जिसको हात सूक गओ हो। 2 और कुछ लोग इस बात की ताख मै हे कै ईसु आराम कन्नै बारे दिन उसकै ठीक करै, और बे ईसु के ऊपर दोस लगाऐ। 3 ईसु नै सूके हात बारे आदमी सै कैई, “बीच मै खड़ो हो जा।” 4 तब ईसु नै उन लोगौ सै पूँछी, “हमरे नियमौ के अनुसार का आराम कन्नै बारे दिन भलो कन्नो ठीक है या बुरो कन्नो, जान बचानो या मारनो?” पर बे चुप रैहए। 5 उनके मन की कठोरता देक्कै ईसु कै दुख भओ फिर ईसु नै घुस्सा मै भरकै चारौ ओर देखो और उस आदमी सै कैई, “अपनो हात बढ़ा,” उसनै ऐंसोई करो और बाको हात ठीक हो गओ। 6 तब फरीसी दल के लोग बाहार लिकरकै हेरोदी लोगौ, के संग ईसु के बिरोद मै सला करल लगे, कै उसकै कैसे मार डारै। ईसु के पिच्छे भौत लोगौ को आनो 7 और ईसु अपने चेलौ के संग झील की ओर चलो गओ। और गलील मुलक सै एक बड़ी भीड़ उसके पीछे हो लई, जिसमै यहूदिया, 8 ऐरूसलेम, इदूमिया, और यरदन नद्दी के पार के और सूर और सैदा के लोग बी हे। लोगौ की जौ भीड़ उन कामौ के बारे मै सुनकै बाके धौंरे आई ही जिनकै बौ करै हो। 9 और भीड़ के मारे ईसु नै अपने चेलौ सै कैई, कै बे उसके ताँई एक छोटी किसती तईयार रक्खैं जिस्सै भीड़ बाकै दबा ना सकै। 10 कैसेकै बानै भौत से लोग ठीक करे हे, और बेमार बाकै छूनै के ताँई उसके ऊपर गिरे पड़ै हे। 11 और दुसट आत्मा बी जब बाकै देखै हीं, तौ बाके अग्गे गिर पड़ै हीं, और चिल्लाकै कैबै हीं कै तूई परमेसर को लौंड़ा है। 12 और बानै उनकै चितौनी दई कै तुम मेरे बारे मै कुछ मत बताऔ कै मैं कौन हौं? बारैह खास चेलौ को चुनो जानो ( मत्ती 10:1–4 ; लूका 6:12–16 ) 13 उसके बाद फिर ईसु एक पहाड़ मै चलो गओ और जिनकै बौ चाँहै हो, बे अपने धौंरे बुलाए और बे बाके धौंरे आए। 14 जिनमै सै बानै बारैह खास लोग चुने और उनकै भेजे भए चेलौ के नाम सै बुलाओ गओ, बानै बे चुने जिस्सै बे बाके संग रैहऐ और बौ उनकै उपदेस के ताँई भेजै। 15 और बे दुसट आत्माऔ कै बाहार लिकारनै को अधकार रक्खैं। 16 और बे जे हैं: समौन जिसको नाम ईसु नै पतरस रक्खो। 17 और जबदी को लौंड़ा याकूब और याकूब को भईया यहून्ना (जिसको नाम बानै बूअनरगिस रक्खो, जिसको मतलब है “गरजनै बारो लौंड़ा”), 18 और अन्दरयास, फिलिप्पुस, बरतुलमै, मत्ती, थौमा, हलफई को लौंड़ा याकूब, और तदै और समौन देसभक्त। 19 और यहूदा इसकरोती, जिसनै ईसु धोके सै पकड़बाओ हो। ईसु और दुसट आत्मा को मुखिया ( मत्ती 12:22–32 ; लूका 11:14–23 ; 12:10 ) 20 और जब बे घर लौहटे और फिर इत्ती भीड़ इखट्टी हो गई कै ईसु और उसके चेलौ कै रोटी खानै की फुरसत बी ना रैहई। 21 जब बाके परिबार के लोगौ नै जौ सुनो तौ बे बाकै लैनै चल दए और कैललगे कै बाको दिमाक ठीक ना है। 22 और सास्तरी जो ऐरूसलेम सै आए हे, जौ कैबै हे कै ईसु मै सैतान समाओ भओ है, और जौ बी कै, ईसु दुसट आत्माऔ के मुखिया बालजबूल की सकति सै दुसट आत्माऔ कै लिकारै है। 23 ईसु नै उनकै अपने धौंरे बुलाकै जौ दासतान सुनाई कै, “सैतान, सैतान कै कैसे लिकार सकै है? 24 अगर किसी मुलक मै अपनेई खिलाप फूट पड़ जाय, तौ बौ मुलक टिक ना सकै है। 25 और अगर किसी घर मै अपनेई भीतर फूट पड़ जाय तौ बौ घर बी ना टिक सकै है। 26 और अगर सैतान अपनोई बिरोदी होकै अपने मैई फूट डारै, तौ बौ कैसे टिक सकै है? और बाको सरबनास हो जागो। 27 कोई आदमी किसी बलबान के घर मै घुसकै बाकी धन-दौलत तब तक ना लूट सकै है, जब तक बौ उस बलबान कै बांध ना ले, इसके बादई बौ बाको घर लूट सकै है। 28 मैं तुम लोगौ सै सच कैरओ हौं कै, आदमी चाँहै जो बी पाप करै या बुरी बात बोलै उनकै सबकी माफी मिल जागी। 29 पर पबित्तर आत्मा की बुराई कन्नै बारौ कै कबी बी माफी ना मिलैगी, बौ हमेसा के पाप को भागी है।” 30 ईसु नै जौ इसताँई कैओ हो कै कुछ लोग कैरए हे कै इसमै कोई दुसट आत्मा समाई भई है। ईसु को सच्चो परिबार ( मत्ती 12:46–50 ; लूका 8:19–21 ) 31 तबई बाकी अईया और बाके भईया बहाँ आए, और बाहार खड़े होकै उसकै बुलाबो भेजो। 32 ईसु के चारौ लंग भीड़ बैठी पड़ी ही। उनौनै ईसु सै कैई, “देख तेरी अईया, और तेरे भईया और तेरी बहन तेकै बाहार बुला रए हैं।” 33 ईसु नै उनसै कैई कै, “मेरी अईया और मेरे भईया कौन है?” 34 ईसु नै अपने चारौ लंग बैठे भए लोगौ के ऊपर अपनी नजर दौड़ाई और कैई, “जे है मेरे अईया और मेरे भईया। 35 जो कोई परमेसर की मरजी मै चलै है, बौई मेरो भईया, बहन और अईया है।” |
New Life Compute Institute [NLCI] - CC BY-NC-ND 4.0