मरकुस 12 - बुक्सा

बुरे किसानौ की दासतान

¹ फिर बौ दासतान मै उनसै बात करल लगो कै, “किसी आदमी नै अंगूर को बगीचा लगाओ, और उसके चारौ लंग बेड़ा बांधी, और उसमै रस को कुन्ड खुदबाओ और पक्‍को मचान बनबाओ, और कुछ किसानौ कै उसको ठेका देकै दूसरे मुलक चलो गओ।

² “फिर अंगूर पकनै के मौसम मै उसनै उन किसानौ के धौंरे अपनो एक नौकर भेजो जिस्सै बौ किसानौ सै बगीचा मै जो अंगूर भए हैं, उनमै सै उसको हिस्सा लिआऐ।

³ पर उनौनै पकड़कै उस नौकर की पिटाई करी और खाली हात बहाँ सै भजा दओ।

⁴ फिर उसनै एक और नौकर उनके धौंरे भेजो और उनौनै उसकी खोपड़ी फोड़ डारी और उसकी बेजती करी।

⁵ उसनै फिर एक और नौकर भेजो पर उनौनै बौ मार डारो। इसके बाद उसनै और भौत से नौकर भेजे जिनमै सै उनौनै कुछ की पिटाई करी और कितने मार डारे।

⁶ अब उसके धौंरे भेजनै कै अपनो पियारो लौंड़ा बचो हो; आखरी मै उसनै उसकै जौ सोचकै उनके धौंरे भेजो कै बे मेरे लौंड़ा को तौ आदर करंगे।

⁷ पर उन किसानौ नै आपस मै कैई, जौई तौ बारिस है, आऔ, हम उसकै मार डारै, तब जाकी बिरासत हमरी हो जागी।

⁸ और उनौनै बौ पकड़कै मार डारो और अंगूरौं के बगीचा सै बाहार फैंक दओ।

⁹ “अब अंगूर के बगीचा को मालिक का करैगो? बौ आकै उन किसानौ कै मार डारैगो और बगीचा दूसरौं कै दे देगो।

¹⁰ का तुमनै पबित्‍तर सास्तर मै जौ बचन ना पढ़ो कै, “‘जो पत्‍थर राजमिस्तरिऔ नै बेकार समजकै लिकार दओ हो, बौई कौने को सबसै खास पत्‍थर बन गओ है।

¹¹ जौ परभु की ओर सै भओ, और हमरी नजरौ मै अचम्बे को है।’”

¹² बे मुक्‍ख पुजारी समज गए कै ईसु की जौ दासतान हमरेई बारे मै है और उसकै पकड़नै की तरकीब सोचल लगे, पर बे लोगौ सै डरै हे, और उसकै छोड़कै चले गए।

ईसु कै फसानै की कोसिस

¹³ तब उनौनै उसकै बातौं मै फसानै के ताँई कुछ फरीसिऔं और हेरोदिऔं कै बाके धौंरे भेजो।

¹⁴ बे उसके धौंरे आए और बोले, “गुरू, हम जौ जानै हैं कै तू सच बोलै है और किसी की परवा ना करै है। और तू मौह देखी बात बी ना करै है, पर परमेसर को रस्ता सच्‍चाई सै बताबै है, तौ बता कैसर समराट कै लगान देनो ठीक है या ना?”

¹⁵ हम दै या ना दैं? ईसु उनकी चाल समज गओ, उसनै उनसै कैई, “तुम मैंकै काए परखौ हौ? एक दिनार मेरे धौंरे लाकै दिखाऔ।”

¹⁶ बे एक दिनार लाए और ईसु नै उनसै पूँछी, “इसमै किसकी मूरत और नाम लिखो है? उनौनै कैई, कैसर समराट को।”

¹⁷ तब ईसु नै उनकै बताई, “जो कैसर को है, उसकै कैसर कै दो और जो परमेसर को है उसकै परमेसर कै दो।” तब बे जौ सुनकै भौत हैरान भए।

मर कै फिर सै जिन्‍दे होनै को सबाल

¹⁸ फिर सदूकिऔं मै बी, जौ कैबै हैं कै मरे भएऔं को जी उठनो हैई ना, ईसु के धौंरे आकै पूँछी,

¹⁹ “हे गुरू, मूसा नै हमरे ताँई नियम लिखो है कै अगर किसी को भईया मर जाय और उसकी बईयर के कोई बालक ना होए तौ उसके भईया कै चँईऐ कै बौ उसकै बिहाले और फिर अपने भईया के बंस कै बढ़ाऐ।

²⁰ एक दफै की बात है कै सात भईया हे। सबसै बड़े भईया नै बिहा करो और बिना औलाद करे बौ मर गओ।

²¹ फिर दूसरे भईया नै उस बईयर सै बिहा करो, पर बौ बी बिना औलाद के मर गओ, तीसरे भईया नै बी ऐंसोई करो।

²² और सातौं सै कोई औलाद ना भई, सबौ के बाद बौ बईयर बी मर गई।

²³ बौ तौ सातौं की बईयर रैह चुकी है। जब बे मरे भए मै सै जी उठंगे, तौ बता बौ किसकी बईयर होगी?”

²⁴ ईसु नै उनसै कैई, “तुम ना तौ पबित्‍तर सास्तरौं कै जानौ हौ, और नाई परमेसर की सकति कै, इसई कारन सै तुम भरम मै पड़े हौ?

²⁵ कैसेकै बे लोग जब मरे भए मै सै जी उठंगे तौ उनमै बिहा-सादी ना हौंगे; पर सुरग मै सुरगदूतौं के जैसे हौंगे।

²⁶ मरे भए के जी उठनै के बारे मै का तुमनै मूसा की किताब मै झाँड़ी जरनै बारी बात ना पढ़ी, कै परमेसर नै उस्सै का कैई, मैं इब्राहिम को परमेसर, और इसहाक को परमेसर, और याकूब को परमेसर हौं?

²⁷ परमेसर मरे भएऔं को ना, बौ जिन्‍देऔं को परमेसर है। तुम लोग भौत बड़ी भूल मै पड़े हौ।”

सबसै बड़ो हुकम

²⁸ एक यहूदी सास्तरी ईसु के धौंरे आओ, उसनै सदूकिऔं और ईसु की बैहैस सुनी और जौ देखकै कै ईसु नै सदूकिऔं कै कैसे ठीक जबाब दओ है, उसनै ईसु सै पूँछी, सबसै बड़ो हुकम कौन सो है?

²⁹ ईसु नै उसकै जबाब दओ, “सबसै बड़ो हुकम जौ है कै, ‘ओ ईसराइल सुन, हमरो परभु परमेसर एकई है।’

³⁰ और तू परभु अपने परमेसर सै अपने सैरे दिल सै और अपने सैरे पिरान सै, और अपनी सैरी समज सै, और अपनी सैरी तागत सै पियार रखिए।

³¹ और दूसरो हुकम जौ है, कै तू अपने पड़ोसी सै अपने जैसो पियार रखिए, इस्सै बड़ो और कोई हुकम ना है।”

³² इस बात मै यहूदी सास्तरी नै उस्सै कैई, “गुरू, तेरो जौ कैनो ठीक है कै परमेसर एक है, उसके अलाबा और दूसरो कोई ना है।

³³ और उस्सै सैरे दिल सै और सैरी समज सै और सैरी तागत के संग पियार रखिए; और अपने पड़ोसी सै अपने जैसो पियार रखनो हर तरै कै हबन बलिऔ और बलिदानौ सै बढ़कै है।”

³⁴ जब ईसु नै देखो कै उसनै समज सै जबाब दओ है, तौ उस्सै कैई, “तू परमेसर के राज सै दूर ना है,” और किसी कै फिर ईसु सै कुछ पूँछनै की हिम्मत ना भई।

मसी किसको लौंड़ा है?

³⁵ फिर ईसु नै मन्‍दर मै सिकाते भए कैई, “सास्तरी काए कैबै हैं, कै मसी, दाऊद के खानदान को लौंड़ा है?

³⁶ दाऊद नै खुद पबित्‍तर आत्‍मा सै भरकै कैई, परभु नै मेरे परभु सै कैई, मेरे खाने हात बैठ, जब तक मैं तेरे बैरिऔ कै तेरे पाँऐऔं के नीचे ना डार दौं।

³⁷ दाऊद तौ खुदई उसकै परभु कैरओ है, तौ मसी उसको लौंड़ा कैसे हो सकै है?” एक बड़ी भीड़ खुसी के संग ईसु की बात सुन रई ही।

सास्तरिऔं के बिरोद मै ईसु की चितौनी

³⁸ उसनै अपने उपदेस मै उनसै कैई, “सास्तरिऔं सै बचकै रैहऔ, जिनकै लम्बे-लम्बे चोला पैहरे भए इतै-उतै घूमनो, और बजारौं मै परनाम सुन्‍नो अच्‍छो लगै है।

³⁹ पिराथना घरौं मै मुक्‍ख जघै मै, और दाबतौं मै पैली जघै मै बिराजमान होनो उनकै भौत परसन्‍द है।

⁴⁰ बे राँड़ौ के घरौ कै जावै हैं और दिखावे के ताँई लम्बी-लम्बी पिराथना करैं हैं, इन लोगौ कै कड़ी सै कड़ी सजा मिलैगी।”

सच्‍चो दान

⁴¹ ईसु दान-पेटी के सामने बैठो भओ देख रओ हो कै लोग दान-पेटी मै कैसे पैसा डार रए हैं। भौस्से सेट लोगौ नै भौत कुछ डारो।

⁴² फिर बहाँ एक गरीब राँड़ आई और उसनै दो दमड़ी डारी जो एक पैसा के बराबर बी ना ही।

⁴³ तब उसनै अपने चेलौ कै धौंरे बुलाकै उनसै कैई, “मैं तुमसै सच कैरओ हौं दान-पेटी मै पैसा डान्‍नै बारौ मै सै इस राँड़ नै सबसै जादा डारो है।

⁴⁴ कैसेकै सबनै अपने धन की बढ़ती मै सै डारो है, पर इसनै तंगी मै रैहते भए बी जीनै के ताँई जो कुछ बी हो, बौ सब कुछ दे डारो।”