मरकुस 10 - बुक्सा

तलाक के बारे मै ईसु की सिक्‍छा

¹ फिर ईसु नै बौ जघै छोड़ दई और यहूदिया के इलाके मै यरदन नद्‍दी के पार आ गओ। भीड़ की भीड़ फिर उसके धौंरे आल लगी और बौ अपनी रीती के अनुसार उनकै फिर सिक्‍छा देल लगो।

² फिर कुछ फरीसी उसके धौंरे आए और उस्सै पूँछी, “का किसी आदमी के ताँई जौ सई है कै बौ अपनी बईयर कै तलाक दे?” उनौनै बाकै परखनै के ताँई उस्सै जौ सबाल पूँछो हो।

³ ईसु नै उनकै जबाब दओ, “मूसा नै तुमकै कौन सी आगियाँ दई है?”

⁴ उनौनै कैई, “मूसा नै आदमिऔ कै नियम दओ है कै बौ तियाग पत्‍तर लिखकै बईयर कै छोड़ सकै है।”

⁵ ईसु नै उनसै कैई, “मूसा नै जौ हुकम इसताँई लिखो हो कै तुम हटीले हौ।

⁶ पर दुनिया के सुरूआत सैई परमेसर नै नर और नारी करकै उनकै बनाओ।

⁷ इस बजै सै आदमी अपने अईया-अब्बा सै अगल होकै अपनी बईयर के संग रैहगो

⁸ और बे दौनौ एक तन हौंगे। इसताँई बे अब दो ना पर एक तन है।

⁹ इसताँई जिसकै परमेसर नै जोड़ो है उसकै कोई बी आदमी अगल ना करै।”

¹⁰ फिर जब बे उसई घर मै लौहटे तौ चेलौ नै ईसु सै इसके बारे मै फिर पूँछी।

¹¹ उसनै उनसै कैई, “जो कोई अपनी बईयर कै तलाक देकै दूसरी बईयर सै बिहा करै है तौ बौ उस पैली बारी बईयर के बिरोद मै दूसरी बईयर के संग गन्‍दो काम करै है।

¹² और अगर बईयर बी अपने आदमी कै तलाक देकै किसी दूसरे आदमी सै बिहा करै, तौ बौ बईयर बी गन्‍दो काम कर रई है।”

बालकौ कै आसीरबाद

¹³ फिर लोग बालकौ कै ईसु के धौंरे लाललगे, कै बौ उनके ऊपर हात रक्‍खै, पर चेलौ नै बे डाँटे।

¹⁴ जब ईसु नै जौ देखो तौ उसकै भौत घुस्सा आई। फिर उसनै उनसै कैई, “बालकौ कै मेरे धौंरे आन दो। उनकै मत रोकौ कैसेकै परमेसर को राज ऐंसोई को है।

¹⁵ मैं तुमसै सच कैरओ हौं जो कोई परमेसर के राज कै एक छोटे बालक के हाँई ना अपनागो, बौ उसमै कबी परबेस ना कन्‍नै पागो।”

¹⁶ फिर ईसु नै बे बालक गोदी मै उठा लए और उनके खोपड़ी मै हात रक्‍कै उनकै आसीरबाद दओ।

ईसु सै एक सेट आदमी को सबाल

¹⁷ ईसु जैसेई अपने सफर मै लिकरो, तौ एक आदमी उसके धौंरे दौड़ते भए आओ, और उसके अग्गे घूंटे टेक्‍कै उस्सै पूँछी, “हे भले गुरू, हमेसा की जिन्‍दगी पानै के ताँई मैं का करौं?”

¹⁸ ईसु नै उस्सै कैई, “तू मैंकै भलो काए कैबै है? सिरप परमेसर के सिबा कोई भलो ना है।

¹⁹ तू आगियाँऔ कै तौ जानै है, कतल ना कन्‍नो, बईयरौं के संग गलत काम ना कन्‍नो, चोरी ना कन्‍नी, झूँटी गभाई ना देनी, छल ना कन्‍नो, अपने अब्बा और अईया को आदर कन्‍नो।”

²⁰ उस आदमी नै ईसु सै कैई, “हे गुरू, इन सबकै तौ मैं बचपन सैई मानतो आओ हौं।”

²¹ उसकै देखकै ईसु कै पियार आओ और उसनै कैई, “तैमै अबी बी एक बात की कमी है। जा, जो कुछ तेरो है उसकै बेचकै गरीबौ मै बाँट दे तौ तेकै सुरग मै धन मिलैगो, और आकै मेरे पीछे हो ले।”

²² ईसु के ऐंसे कैनै मै बौ आदमी भौत निरास भओ और दुखी होकै चलो गओ कैसेकै बौ भौत सेट हो।

²³ ईसु नै चारौ लंग देखकै अपने चेलौ सै कैई, “सेटौं को परमेसर के राज मै परबेस कन्‍नो कितनो मुसकल होगो!”

²⁴ जा बात सै बाके चेला अचम्बे मै पड़ गए, पर ईसु नै उनसै फिर कैई, “मेरे बालकौ, परमेसर के राज मै परबेस कन्‍नो कितनो मुसकल है।”

²⁵ सूंई के नाके सै होकै ऊँट को लिकन्‍नो जादा सरल है, पर सेटौं को परमेसर के राज मै परबेस कन्‍नो कठिन है।

²⁶ बे भौतई हैरान होकै आपस मै कैललगे तौ फिर किसकी मुक्‍ति हो सकै है।

²⁷ ईसु नै उनकी ओर देखकै कैई, “आदमिऔ के ताँई तौ जौ मुसकल है, पर परमेसर के ताँई ना, कैसेकै परमेसर सबई कुछ कर सकै है।”

²⁸ फिर पतरस उस्सै कैललगो कै, “देख, हम तौ सब कुछ छोड़कै तेरे पीछे चल पड़े हैं।”

²⁹ ईसु नै कैई, “मैं तुमसै सच कैरओ हौं किसी नै बी मेरे और अच्‍छी खबर के ताँई घर, भईयौ या बहनौ, अईया या अब्बा, बाल-बच्‍चे या खेत छोड़ दए हौं।

³⁰ और बे इस टैम सौ गुना जादा घरौं, भईयौ, बहनौ, और अईऔं और बाल-बच्‍चौं और खेतौ कै पांगे। पर उनके ऊपर मुसीबत बी आंगी और आनै बारे युग मै परमेसर उसकै हमेसा की जिन्‍दगी देगो।

³¹ पर भौत से लोग जिनकी अबी ऐहमियत है बे पीछे हो जांगे पर जिनकी ऐहमियत ना है उनकी ऐहमियत होल लगैगी।”

ईसु दुआरा अपनी मौत की भबिसबानी

³² और बे ऐरूसलेम कै जाते भए रस्ता मै हे, और ईसु उनके अग्गे-अग्गे जा रओ हो; बे बड़े हैरान हे और जो उनके पीछे चल रए हे, बे डरे भए हे। फिर सै ईसु बारैह खास चेलौ कै अगल ले गओ और उनकै बताल लगो कै उसके संग का होनै बारो है।

³³ “देखौ, हम ऐरूसलेम जा रए हैं, आदमी के लौंड़ा कै धोके सै पकड़बाकै, मुक्‍ख पुजारिऔं और सास्तरिऔं कै सौंप दओ जागो और बे उसकै मौत की सजा सुनाकै गैर यहूदिऔं के हवाले कर दंगे।

³⁴ और बे बाकी हसी उड़ांगे और उसके ऊपर थूकंगे। बे उसकै कोड़ा मारंगे और फिर मार डारंगे। पर तीन दिन के बाद बौ जी उठैगो।”

याकूब और यहून्‍ना की बिनती

³⁵ फिर जबदी को लौंड़ा याकूब और यहून्‍ना ईसु के धौंरे आए और उस्सै बोले, “गुरू, हम चाँहै हैं कै हम जो कुछ तेसै माँगै, तू हमरे ताँई बौ कर।”

³⁶ ईसु नै उनसै कैई, “तुम मैंसै अपने ताँई का करबानो चाँहौ हौ?”

³⁷ फिर उनौनै उस्सै कैई, “हम तेरे राज की महिमा मै तेरे संग बैठैं, हम्मै सै एक तेरे खाने हात और दूसरो बाँऐ हात।”

³⁸ ईसु नै उनसै कैई, “तुम ना जानौ हौ तुम का माँग रए हौ। जो परमेसर के घुस्सा के कटोरा कै मैं पीनै कै हौं, का तुम उसकै पी सकौ हौ? या जो दुख को जल संस्कार मैं लैनै कै हौं, तुम उसकै ले सकौ हौ?”

³⁹ उनौनै उस्सै कैई, “हम बैसो कर सकै हैं” फिर ईसु नै उनसै कैई, “तुम बौ कटोरा पिऔगे, जो मैं पीनै बारो हौं और जो जल संस्कार मैं लैनै बारो हौं, उसकै तुम बी लोगे।

⁴⁰ पर मेरे खाने हात और बाँऐ हात बैठनै की जघै देनो मेरो काम ना है। जौ उनई आदमिऔ के ताँई है, जिनके ताँई परमेसर नै जौ जघै तईयार करी है।”

सेवाभाव को मैहतब

⁴¹ जब बाकी दस चेलौ नै जौ सुनो तौ बे याकूब और यहून्‍ना सै घुस्सा भए।

⁴² और फिर ईसु नै उनकै अपने धौंरे बुलाकै उनसै कैई, “तुम जानौ हौ कै जो गैर यहूदिऔं के सासक माने जावै हैं, बे उनके ऊपर राज करै हैं; और जो उनमै बड़े हैं, उनके ऊपर हुकम चलावै हैं।

⁴³ पर तुम्मै ऐंसी बात ना हौंगी, जो तुम लोगौ मै बड़ो होनो चाँहै है, बौ तुमरो नौकर बनै।

⁴⁴ और जो तुम्मै परधान बन्‍नो चाँहै, बौ सबको दास बनै।

⁴⁵ कैसेकै आदमी को लौंड़ा बी अपनी सेवा करानै ना, पर सेवा कन्‍नै और भौतौं के छुटकारे के ताँई अपनी जान दैनै आओ है।”

ईसु दुआरा अन्धे बरतिमाई की चंगाई

⁴⁶ और बे यरीहो सैहर मै आए, और जब बौ और बाके चेला, और एक बड़ी भीड़ यरीहो सैहर सै लिकर रई ही, तौ तिमाई को लौंड़ा बरतिमाई नाम को एक अन्धो भिकारी सड़क के किनारे बैठो हो

⁴⁷ जब उसकै पतो चलो कै बौ ईसु नासरी है, तौ बौ चिल्‍ला-चिल्‍लाकै कैललगो कै, “हे दाऊद की औलाद ईसु, मेरे ऊपर दया कर।”

⁴⁸ भौस्से लोगौ नै डाँटकै उसकै चुप रैहनै कै कैई, पर बौ और बी जोर सै चिल्‍लातो रैहओ कै, “हे दाऊद की औलाद, मेरे ऊपर दया कर।”

⁴⁹ तब ईसु रुको और बोलो, “उसकै मेरे धौंरे लाऔ।” और लोगौ नै उस अन्धे कै बुलाकै उस्सै कैई, “हिम्मत रख, खड़ो हो, बौ तेकै बुला रओ है।”

⁵⁰ बौ अपनी चद्‍दर फैंक कै कूद पड़ो और ईसु के धौंरे आओ।

⁵¹ और ईसु नै उस्सै कैई, “तू का चाँहै है कै मैं तेरे ताँई करौं?” अन्धे नै उस्सै कैई, “हे गुरू, मैं फिर सै देख सकौं।”

⁵² ईसु नै उस्सै कैई, “चलो जा, तेरे बिसवास नै तू ठीक कर दओ है।” और बौ तुरन्‍त देखल लगो, और रस्ता मै ईसु के पीछे हो लओ।