मत्‍ती 6 - बुक्सा

दान दैनै की सिक्‍छा

¹ “चौकस रैहऔ! तुम लोगौ कै दिखानै के ताँई अपने धरम के काम ना करौ, ना तौ अपने सुरग के अब्बा सै कुछ बी ईनाम ना पाऔगे।

² “इसताँई जब तुम दान करौ तौ इसको ढिंडोरा ना पिटबाऔ जैसे सभाऔं और गलिऔं मै पाखंडी लोग करैं हैं, जिस्सै लोग उनकी बड़ाई करैं। मैं तुमसै सच कैरओ हौं बे अपनो ईनाम पा चुके हैं।

³ पर जब तू दान करै तौ, जो तेरो खानो हात करै है, उसकै तेरो बाँऐ हात बी ना जान्‍नै पाय।

⁴ तुमरो दान गुप्‍त रैह, और जब तुमरो अब्बा जो गुप्‍त कामौ कै बी देखै है, तुमकै ईनाम देगो।

पिराथना की ऐहमियत

⁵ “और जब तू पिराथना करै, तौ ढौंगिऔ के जैसे ना हो कैसेकै लोगौ कै दिखानै के ताँई सभाऔं मै और सड़कौं के मोड़ौ मै खड़े होकै पिराथना कन्‍नो उनकै अच्‍छो लगै है, मैं तुमसै सच कैरओ हौं, कै बे अपनो ईनाम पा चुके हैं।

⁶ पर जब तुम पिराथना करौ तौ, अपने कमरा मै जाकै किबाड़ बन्‍द कर लो और एकान्‍त मै अपने अब्बा सै पिराथना करौ। तुमरो अब्बा जो एकान्‍त मै बी देखै है तुमकै ईनाम देगो।

⁷ “पिराथना करते टैम परमेसर कै ना माननै बारौ के हाँई बक बक ना करौ, कैसेकै बे समजै हैं कै लम्बी-लम्बी पिराथना कन्‍नै सै हमरी सुनी जागी।

⁸ उनके जैसे ना बनौ, कैसेकै तुमरे माँगनै सै पैलेई तुमरो अब्बा जानै है कै तुमकै किन किन चीजौ की जरूरत है।

⁹ तौ तुम इस तरै सै पिराथना करे करौ, “हे सुरग मै रैहनै बारे हमरे अब्बा, तेरो नाम पबित्‍तर मानो जाय।

¹⁰ तेरो राज आय, तेरी मरजी जैसे सुरग मै पूरी होवै है, बैसेई धरती मै बी हो।

¹¹ हमरे दिनभर की रोटी आज हमकै दे।

¹² और जिस तरै हमनै अपने अपरादी माफ करे हैं, बैसेई तू बी हमरे अपरादौं कै माफ कर।

¹³ और हमकै पाप मै ना पड़न दे, पर बुराई सै बचा, (कैसेकै राज और पराकरम और महिमा हमेसा तेरेई हैं। ऐंसोई होए)।

¹⁴ “अगर तुम अपने खिलाप अपराद कन्‍नै बारौ के अपराद माफ करौगे, तौ तुमरो सुरग को अब्बा बी तुमकै माफ करैगो।

¹⁵ और अगर तुम दूसरौं कै माफ ना करौगे तौ तुमरो सुरग को अब्बा बी तुमरे अपराद माफ ना करैगो।

बरत को मतलब

¹⁶ “जब तुम बरत रक्‍खौ तौ, ढौंगिऔ के हाँई तुमरे मौह लटके भए ना दिखाई दैं, बे अपनो मौह इसताँई सुस्त रक्‍खै हैं कै बे लोगौ कै दिखाऐ कै बे बरत रख रए हैं, मैं तुमसै सच कैरओ हौं, कै बे अपनो ईनाम पा चुके हैं।

¹⁷ पर जब तुम बरत रक्‍खौ हौ, तौ अपनी खोपड़ी मै तेल लगाऔ और अपनो मौह धो लो।

¹⁸ जिस्सै लोग ना पर तेरो अब्बा जो गुप्‍त मै है, तेकै बरत रखनै बारो जानै, इस हालत मै तेरो अब्बा जो गुप्‍त मै देखै है, तेकै ईनाम देगो।

सच्‍चो धन

¹⁹ “धरती मै अपने ताँई धन-दौलत जमा ना करौ, जहाँ कीड़ा और काई बिगाड़ै हैं, और जहाँ चोर कूमल लगाबैं और चुरामै हैं।

²⁰ सुरग मै अपने ताँई धन इखट्‍टो करौ, जहाँ ना तौ कीड़ा, और ना काई बिगाड़ै हैं और जहाँ चोर ना कूमल लगाबैं और ना चुरामै हैं।

²¹ कैसेकै जहाँ तुमरो धन है बहीं तुमरो मन बी लगो रैहगो।

²² “सरीर को दिया आँख है, अगर तुमरी आँख अच्‍छी है, तौ तुमरो सैरो सरीर बी उज्‍जेरो होगो।

²³ अगर तुमरी आँख बुरी है तौ तुमरो सैरो सरीर इन्‍धेरे बारो होगो। इसताँई जो रौसनी तुम्मै है, अगर बौई इन्‍धेरे बारी है तौ जौ कितनो कुप्‍प इन्धेरो होगो।

²⁴ “कोई बी एक संग दो मालिकौं की सेवा ना कर सकै है, बौ या तौ एक सै बैर और दूसरे सै पियार करैगो, या एक को आदर और दूसरे की बेजती करैगो, तुम परमेसर और धन दौनौ की सेवा एक संग ना कर सकौ हौ।

चिन्‍ता छोड़ौ

²⁵ “इसताँई मैं तुमसै कैरओ हौं, चिन्‍ता मत करौ, ना अपनी जिन्‍दगी की, कै हम का खांगे, और ना अपने सरीर की, कै हम का पैहरंगे, का जिन्‍दगी खाने सै बढ़कै ना है? और का सरीर लत्‍ता सै बढ़कै ना है?

²⁶ आसमान के पंछिऔ कै देखौ, बे ना तौ बोबै हैं ना काटै हैं और ना खलियानौ मै बटोरै हैं, तौबी तुमरो सुरग को अब्बा उनकै खबावै है। का तुम उनसै बढ़कै ना हौ?

²⁷ चिन्‍ता कन्‍नै सै तुम्मै सै कौन अपनी उमर घड़ी भर बी बढ़ा सकै है?

²⁸ और लत्‍तौ के ताँई काए चिन्‍ता करौ हौ, जंगली फूलौ कै देखौ, बे कैसे बढ़ै हैं, बे ना तौ मैहनत करैं हैं, ना अपने ताँई लत्‍ता बनाबैं हैं।

²⁹ फिर बी मैं तुमसै कैरओ हौं कै सुलेमान बी अपने पूरे ठाट बाट मै उनमै सै एक की बी बराबरी ना कर सकै हो।

³⁰ इसताँई अगर परमेसर बन की घाँस कै जो आज है और कल भट्‍टी मै झौंक दई जागी, इस तरै सजाबै है, तौ हे अल्प बिसवासिऔ, बौ तुमरे ताँई इस्सै जादा काए ना करैगो?

³¹ “इसताँई जौ कैते भए चिन्‍ता मत करौ, कै हम का खांगे, का पींगे, या का पैहरंगे।

³² कैसेकै परमेसर कै ना माननै बारे इन सब चीजौ की खोज मै लगे रैहबैं हैं, तुमरो सुरग को अब्बा जानै है कै तुमकै इन सब चीजौ की जरूरत है।

³³ इसताँई पैले तुम परमेसर के राज और धारमिकता की खोज करौ तौ जे सबई चीज तुमकै मिल जांगी।

³⁴ कल की चिन्‍ता मत करौ। कल अपनी चिन्‍ता खुद कर लेगो, आज की मुसीबत आज के ताँई भौत है।