मत्‍ती 26 - बुक्सा

ईसु कै मार डान्‍नै को साजिस

¹ जब ईसु जे सब बात कैह चुको, तौ अपने चेलौ सै कैललगो,

² “तुम जानौ हौ, कै दो दिन के बाद फसै को तौहार होगो, और आदमी को लौंड़ा कुरूस मै चढ़ाए जानै के ताँई पकड़बाओ जागो।”

³ तब मुक्‍ख पुजारी और बुजरग यहूदी नेता कैफा नाम के बड़े पुजारी के दारे मै इखट्‍टे भए।

⁴ और उनौनै आपस मै सला करी कै हम किस तरै ईसु कै धोके सै पकड़ लैं और मरवा डारैं।

⁵ फिर बी बे कैबै हे, “तौहार के दिनौ मै ना, कहीं ऐंसो ना हो कै लोगौ मै हंगामो मच जाय।”

ईसु के ऊपर ईत्‍तर लगानो

⁶ ईसु जब बैतनिया गाम मै समौन कोढ़ी के घर मै हो,

⁷ जब ईसु समौन कोढ़ी के घर रोटी खानै बैठो हो, तबई एक बईयर संगमरमर की सीसी मै भौत मैहंगो ईत्‍तर लेकै आई, उसनै बौ ईत्‍तर ईसु के खोपड़ी मै लगा दओ।

⁸ चेला जौ देखकै चिररापड़े और बोले, “ईत्‍तर की ऐंसी बरबादी काए करी गई?

⁹ जौ ईत्‍तर मैहंगे दामौ मै बिक सकै हो और जाकी कीमत गरीबौ मै बाँटी जा सकै ही।”

¹⁰ ईसु कै इसको पतो चलो और बानै उनसै कैई, “तुम इस बईयर कै तंग काए करौ हौ? इसनै तौ मेरे संग भलो काम करो है।

¹¹ गरीब तौ हमेसा तुम लोगौ के संग रैहंगे, पर मैं हमेसा तुमरे संग ना रैहंगो।

¹² इसनै मेरे दफनानै की तईयारी मै मेरे सरीर मै ईत्‍तर लगाओ।

¹³ मैं तुमसै सच कैरओ हौं, कै सैरी दुनिया मै जहाँ कहीं जौ अच्‍छी खबर को परचार करो जागो, बहाँ इसके इस काम की चरचा बी याद करी जागी।”

यहूदा को बिसवासघात

¹⁴ तब यहूदा इसकरोती जो बाके बारैह चेलौ मै सै एक हो, मुक्‍ख पुजारिऔं के धौंरे गओ और उनसै कैई,

¹⁵ “अगर मैं ईसु कै तुमरे हवाले कर दौं, तौ तुम लोग मैंकै का दोगे?” उनौनै बाकै चाँदी के तीस सिक्‍का दए।

¹⁶ उसई टैम सै यहूदा ईसु कै धोके सै पकड़बानै की ताख मै रैहल लगो।

फसै तौहार कै खानै की तईयारी

¹⁷ बिना खट्‍टे चून के तौहार के पैले दिन, चेला ईसु के धौंरे आकै पूँछल लगे, “तू कहाँ चाँहै है कै हम तेरे ताँई फसै खानै की तईयारी करैं?”

¹⁸ ईसु नै कैई, “सैहर मै उस आदमी के धौंरे जाकै बासै कैऔ, कै गुरू कैरओ है, ‘मेरो टैम धौंरे आ गओ है, मैं अपने चेलौ के संग तेरे घर तौहार मनांगो।’”

¹⁹ फिर चेलौ नै बैसोई करो जैसो ईसु नै बताओ हो और फसै तौहार की तईयारी करी।

²⁰ जब साँज भई, तौ बौ बारैह चेलौ के संग रोटी खानै के ताँई बैठो।

²¹ जब बे खा रए हे, तौ बानै कैई, “मैं तुमसै सच कैरओ हौं, कै तुम्मै सै एक मैंकै धोके सै पकड़बागो।”

²² बे भौत उदास हो गए और एक-एक करकै बासै पूँछल लगे, “परभु, कहीं बौ मैं तौ ना हौं?”

²³ ईसु नै जबाब दओ, “जिसनै मेरे संग थरिया मै हात डारो है, बौई मैंकै धोके सै पकड़बा देगो।

²⁴ आदमी को लौंड़ा तौ मरैगोई, जैसो कै बाके बारे मै पबित्‍तर सास्तर मै लिखो है, पर धिक्‍कार है उस आदमी मै, जो आदमी के लौंड़ा कै पकड़बावै है, बा आदमी के ताँई कितनो अच्‍छो होतो कै बौ पैदाई ना भओ होतो।”

²⁵ तब उस धोके सै पकड़बानै बारे यहूदा नै ईसु सै पूँछी, “हे गुरू, का बौ मैं हौं?” ईसु नै बासै कैई, हाँ, “ऐंसोई है जैसो तैनै कैई है।”

परभु भोज

²⁶ जब बे खा रए हे, तौ ईसु नै रोटी लई, और आसीस माँगकै तोड़ी, और चेलौ कै देकै कैई, “लो, खाऔ, जौ मेरो सरीर है।”

²⁷ फिर बानै कटोरा उठाओ, और धन्‍नबाद करो और जौ कैते भए अपने चेलौ कै दओ, “तुम सब इसमै सै पिऔ।

²⁸ कैसेकै जौ मेरे खून को करारनामो है, जो भौतौं के पापौं की माफी के ताँई बहाओ जा रओ है।

²⁹ मैं तुमसै कैरओ हौं, कै आज के बाद, मैं उस दिन तक अंगूर को जौ रस ना चखंगो जब तक अपने परम पिता के राज मै तुमरे संग नओ अंगूर को रस ना पीलौं।”

³⁰ फिर बे भजन गाकै जैतून पहाड़ मै चले गए।

ईसु की भबिसबानी

³¹ तब ईसु नै चेलौ सै कैई, “आजई रात तुम सब मैंकै छोड़कै चले जाऔगे, कैसेकै पबित्‍तर सास्तर मै लिखो है, मैं भेड़ौ के गड़रिया कै मारंगो और झुन्ड की भेड़ तितर बितर हो जांगी।

³² पर फिर सै जी उठनै के बाद मैं तुमसै पैलेई गलील चलो जांगो।”

³³ पर पतरस नै बासै कैई, “चाँए सब तेकै छोड़कै चले जाँय, पर मैं कबी ना छोड़ंगो।”

³⁴ ईसु नै बासै कैई, “मैं तुमसै सच कैरओ हौं, कै आजई रात मुरगा के बाँक दैनै सै पैले, तू तीन दफै मेरो इनकार कर देगो।”

³⁵ तब पतरस नै बासै कैई, “अगर तेरे संग मरनो बी पड़ै, मैं तेरो कबी इनकार ना करंगो।” और सबई चेलौ नै बी जौई कैई।

ईसु की इकले मै पिराथना

³⁶ तब ईसु अपने चेलौ के संग गतसमनी नाम की एक जघै मै आओ और अपने चेलौ सै कैललगो कै “हिंयई बैठे रैहईओ, जब तक कै मैं बहाँ जाकै पिराथना करौं।”

³⁷ फिर ईसु पतरस और जबदी के दौनौ लौंड़ा कै अपने संग ले गओ, और उदास और बियाकुल होल लगो।

³⁸ तब बानै उनसै कैई, “मेरो जी बेसानी घबराओ भओ है, जैसे मेरे पिरान लिकन्‍नै बारे हैं, तुम मेरे संग हिंयई रुकौ, और मेरे संग जगते रौह।”

³⁹ फिर बौ थोड़ो अग्गे बढ़ो और मौह के बल गिरो, और जौ पिराथना करल लगो कै, “हे मेरे अब्बा, अगर हो सकै तौ, जौ दुख को कटोरा मैंसै टल जाय, तौबी जैसो मैं चाँहौ हौं बैसो ना, पर जैसो तू चाँहै है बैसोई हो।”

⁴⁰ तब बौ अपने चेलौ के धौंरे आओ और उनकै सोओ भओ देक्‍कै पतरस सै कैई, “का तुम मेरे संग एक घड़ी बी ना जग सके?

⁴¹ जगते रौह और पिराथना करते रौह, कै तुम पाप कन्‍नै की परिक्‍छा मै ना पड़ौ, आत्‍मा तौ तईयार है पर सरीर कमजोर है।”

⁴² फिर बानै दूसरी दफै जाकै जौ पिराथना करी कै, “हे मेरे अब्बा अगर जौ पियालो मेरे पिए बिना ना टल सकै है तौ तेरी मरजी पूरी हो।”

⁴³ जब बौ लौहटकै आओ तौ बानै फिर अपने चेला सोते भए पाए, कैसेकै उनकी आँख नींद सै भरी हीं।

⁴⁴ और उनकै छोड़कै फिर चलो गओ और तीसरी दफै बी पैले के हाँई बेई बात दौहराते भए पिराथना करी।

⁴⁵ इसके बाद उसनै अपने चेलौ के धौंरे आकै उनसै कैई, “का तुम अब तक सो रए और आराम कर रए हौ? देखौ! बौ घड़ी आ पौंची है, जब आदमी को लौंड़ा धोके सै पापिऔं के हवाले कर दओ जागो।

⁴⁶ उठौ, चलैं, देखौ, मेरो धोको दैनै बारो धौंरे आ पौंचो है।”

ईसु कै बन्‍दी बनानो

⁴⁷ ईसु जब बोलई रओ हो, यहूदा जो बारैह चेलौ मै सै एक हो आ गओ बाके संग तरवार और लठिया लए भए एक बड़ी भीड़ ही, जो मुक्‍ख पुजारिऔं और यहूदी नेताऔं नै भेजी ही।

⁴⁸ बाके पकड़नै बारे नै उनकै जौ पतो दओ हो कै जिसकै मैं चूमौ बौई ईसु है, बाकै पकड़ लेईओ।

⁴⁹ फिर बौ ईसु के धौंरे गओ और बोलो, “हे गुरू, परनाम, और उसनै ईसु को चुम्मा लओ।”

⁵⁰ ईसु नै बासै कैई, “हे दोस्त जिस काम के ताँई तू आओ है, बाकै कर ले,” फिर भीड़ के लोगौ नै ईसु पकड़कै गिरप्‍तार कर लओ।

⁵¹ और देखौ, ईसु के सातिऔं मै सै एक नै हात बढ़ाकै अपनी तरवार खैंच लई और बड़े पुजारी के नौकर मै चलाकै उसको कान काट दओ।

⁵² तब ईसु नै बासै कैई, “अपनी तरवार मिआन मै रख ले, कैसेकै जो तरवार चलावै हैं बे सब तरवार सै मारे जांगे।

⁵³ का तू जौ ना समजै है कै अगर मैं अपने अब्बा सै सायता माँगौ तौ बौ सुरगदूतौं की बारैह पलटन सै जादा मेरे धौंरे अबी भेज देगो?

⁵⁴ पर तब पबित्‍तर सास्तर को लेख कैसे पूरो होगो? बामै तौ लिखो है कै ऐंसोई होनो जरूरी है।”

⁵⁵ उसई घड़ी ईसु नै भीड़ सै कैई, “का तुम तरवार और लठिया लेकै मैंकै डाँकू के हाँई पकड़नै के ताँई आए हौ? मैं रोज मन्‍दर मै बैठकै सिक्‍छा देवै हो, फिर बी तुमनै मैं ना पकड़ो।

⁵⁶ पर जौ सब इसताँई भओ है, कै नबिऔ नै जो लिखो है बौ पूरो हो जाय,” तब सब चेला ईसु कै छोड़कै भाज गए।

ईसु की पेसी

⁵⁷ और ईसु के पकड़नै बारे, ईसु कै कैफा नाम के बड़े पुजारी के धौंरे ले गए, जहाँ सास्तरी और यहूदी नेता इखट्‍टे भए हे।

⁵⁸ पतरस उस्सै कुछ दूर-दूर रैहते भए उसके पीछे-पीछे बड़े पुजारी के घर के दारे के भीतर तक चलो गओ। कै ईसु के संग का होगो देखनै बहाँ पैहरेदार के संग बैठ गओ।

⁵⁹ मुक्‍ख पुजारिऔं और सैरी महासभा ईसु कै मार डान्‍नै के ताँई बाके बिरोद मै झूँटी गभाई की ताख मै हे।

⁶⁰ और भौत से झूँटे गभा सामने आए। पर झूँटी गभाई ना मिली, अन्‍त मै दो आदमी अग्गे आए

⁶¹ और बोले “इसनै कैई ही कै मैं परमेसर के मन्‍दर कै ढा सकौं हौं और बाकै तीन दिन मै बना सकौं हौं।”

⁶² फिर बड़े पुजारी नै खड़े होकै ईसु सै पूँछी, “जे लोग तेरे खिलाप का का कैरए हैं, का इसको कोई जबाब तेरे धौंरे ना है?”

⁶³ पर ईसु चुप रैहओ। फिर बड़े पुजारी नै बासै पूँछी, “मैं तेकै जिन्‍दे परमेसर की कसम देवौ हौं, अगर तू परमेसर को लौंड़ा मसी है तौ हमकै बता?”

⁶⁴ ईसु नै उस्सै कैई, “तैनै खुदई कैदई, पर मैं तुम लोगौ सै जौ बी कैरओ हौं, कै अब सै तुम आदमी के लौंड़ा कै सरब सकतिमान परमेसर के दाँय ओर बैठे भए, और आसमान के बादरौं मै आते भए देखौगे।”

⁶⁵ तब बड़े पुजारी नै अपने लत्‍ता फाड़कै कैई, “जानै परमेसर की बुराई करी है, अब हमकै गभाऔ की जरूरतई काए है? अबी-अबी तुम लोगौ नै जाकै परमेसर की निन्‍दा करते सुनो है।

⁶⁶ तुम लोग का सोचौ हौ?” जबाब मै बे बोले, “जौ अपरादी है, जौ मौत की सजा के लायक है।”

⁶⁷ फिर उनौनै बाके मौह मै थूको और बाकै घूंसा मारे। कुछ नै चाँट मारे और कैई,

⁶⁸ “हे मसी! भबिसबानी कर कै बौ कौन है जिसनै तेकै मारो?”

पतरस को इनकार

⁶⁹ पतरस अबी नीचे दारे मै बाहार बैठो हो कै एक नौकन्‍नी उसके धौंरे आई और बोली, “तू बी तौ बाई गलीली ईसु के संग हो।”

⁷⁰ पर सबके सामने पतरस मुकर गओ। उसनै कैई, “मैंकै पतो ना है तू का कैरई है।”

⁷¹ इसके बाद पतरस फाटक की ओर लिकर गओ, पर एक दूसरी नौकन्‍नी नै बौ देख लओ और जो लोग बहाँ हे, उनसै बोली, “जौ आदमी बी ईसु नासरी के संग हो।”

⁷² एक दफै फिर पतरस नै इनकार करो और कसम खाते भए कैई, “मैं बा आदमी कै ना जानौ हौं”

⁷³ थोड़ी देर बाद बहाँ खड़े लोग पतरस के धौंरे गए और उस्सै बोले, “तेरी बोली साप बता रई है कै, तू सच्‍ची मैई उनई मै सै एक है।”

⁷⁴ तब पतरस खुद कै कोसनै और कसम खाल लगो, “मैं उस आदमी कै जानौई ना हौं।” तबई मुरगा नै बाँक दे दई।

⁷⁵ तब पतरस कै ईसु की कैई भई बात याद आई कै, मुरगा के बाँक दैनै सै पैले तू तीन दफै मेरो इनकार करैगो। और बौ बाहार जाकै फूट-फूटकै रोल लगो।