मत्ती 22 - बुक्साबिहा की रोटी की दासतान ( लूका 14:15–24 ) 1 ईसु उनकै फिर दासतान सुनाल लगो, बौ बोलो, 2 “सुरग को राज उस राजा के जैसो है जिसनै अपने लौंड़ा के बिहा मै दाबत दई। 3 राजा नै अपने नौकर भेजे कै बे उन लोगौ कै बुला लाऐं जिनकै बिहा की दाबत को नौहता देओ गओ है। पर बे लोग ना आए। 4 राजा नै फिर दूसरे नौकर जौ कैते भए भेजे, ‘पौंहनेऔ सै कैह दो देखौ मैंनै अपनी दाबत की तईयारी कर लई है। पाले भए पसु काटे जा चुके हैं। सब कुछ तईयार है, बिहा की दाबत मै आ जाऔ।’ 5 “पौंहनेऔ नै इसकी परवा ना करी। कोई अपने खेत की ओर चलो गओ तौ कोई अपनो ब्यापार कन्नै चलो गओ। 6 दूसरे पौंहनेऔ नै राजा के नौकरौ कै पकड़कै उनको अपमान करो और बे मार डारे। 7 राजा कै भौत घुस्सा आई उसनै अपने सिपाई भेजकै बे हत्तियारे मौत के घाट उतार दए और उनके सैहर मै आग लगा दई। 8 तब राजा नै अपने नौकरौ सै कैई, ‘बिहा की रोटी तौ तईयार है, पर जो बुलाए गए हे बे इसके लायक ना लिकरे, 9 इसताँई चौराएऔ मै जाऔ और जितने बी लोग तुमकै मिल जाँय, सबकै बिहा की दाबत मै बुला लाऔ।’ 10 तब नौकर सड़कौं मै गए और भले बुरे जो बी मिले सबकै बटोरकै लिआए और बिहा को घर पौंहनेऔ सै भर गओ। 11 जब राजा पौंहनेऔ कै देखनै आओ, तौ बहाँ बाकी नजर एक ऐंसे आदमी मै पड़ी, जिसनै बिहा के लत्ता ना पैहरे हे। 12 तब राजा नै बासै कैई, ‘भईया, बिहा के लत्ता पैहरे बिना तू हिंया भीतर कैसे आ गओ? पर बौ आदमी चुप रैहओ। 13 तब राजा नै अपने नौकरौ सै कैई, इसके हात-पाँऐ बांधकै इन्धेरे मै फैंक दो। बहाँ बे लोग रोंगे और दाँत कटकटाते रैहंगे।’ 14 कैसेकै बुलाए भए तौ भौत हैं पर चुने भए थोड़े हैं।” यहूदी नेताऔं की चाल ( मरकुस 12:13–17 ; लूका 20:20–26 ) 15 उस टैम फरीसिऔं नै जाकै आपस मै सला करी कै हम किस तरै ईसु कै उसकी अपनी बात के फंदा मै फसाऐ। 16 उनौनै ईसु के धौंरे हेरोदिऔं के संग अपने चेला जौ सबाल पूँछनै भेजे, “गुरू! हम जानै हैं कै तू सच बोलै है और सच्चाई सै परमेसर के रस्ता की सिक्छा देवै है, और तू लोगौ की मौह देखी बात ना करै है। 17 इसताँई हमकै बता, तेरो का बिचार है, कैसर कै लगान देनो ठीक है कै ना?” 18 उनके बुरे इरादे कै जानकै ईसु नै कैई, “ढौंगिऔ! तुम मैंकै काए परखनो चाँहौ हौ? 19 मैंकै बौ सिक्का दिखाऔ जिस्सै लगान चुकाओ जावै है” और बे बाके धौंरे एक सिक्का ले आए, 20 तौ ईसु नै उनसै कैई, “इसमै किसकी मूरत और किसको नाम है?” 21 उनौनै उस्सै कैई, “कैसर को।” तब उसनै उनसै कैई, “तौ जो कैसर को है, उसकै कैसर कै दो और जो परमेसर को है, बौ परमेसर कै।” 22 जौ सुनकै बे लोग अचम्बे मै पड़ गए और ईसु कै छोड़कै चले गए। सदूकिऔं की चाल ( मरकुस 12:18–27 ; लूका 20:27–40 ) 23 उसई दिन कुछ सदूकी ईसु के धौंरे आए। उनको माननो है कै आदमी फिर सै जिन्दो ना होवै है। 24 उनौनै ईसु के सामने जौ सबाल रक्खो, “गुरूजी! मूसा नै कैई है, अगर कोई बिना औलाद मर जाय, तौ बाको भईया उसकी राँड़ कै बिहा कै अपने भईया को बंस बढ़ानै के ताँई औलाद पैदा करै। 25 अब मानौ हमरे हिंया सात भईया हे। पैले को बिहा भओ और बाद मै बाकी मौत हो गई। और उसकी कोई औलाद ना भई, इसताँई उसके भईया नै बाकी बईयर अपना लई। 26 इसई तरै दूसरे, तीसरे नै बी करो और सातौं तक जौई होतो रैहओ। 27 और सबके बाद बौ बईयर बी मर गई। 28 अब हमरो सबाल जौ है कै फिर सै जिन्दे होनै के बाद उन सातौं मै सै बौ किसकी बईयर होगी कैसेकै बौ सातौंई नै अपनाई ही?” 29 ईसु नै उनकै जबाब दओ, “तुम लोग ना तौ पबित्तर सास्तर जानौ हौ और नाई परमेसर की सकति कै, इसताँई भरम मै पड़े भए हौ। 30 फिर सै जिन्दे होनै मै ना तौ आदमी बिहा करंगे और ना बईयरैं बिहा के ताँई देई जांगी, पर बे सुरग के दूतौ के जैसे हौंगे। 31 जहाँ तक मरे भएऔं के फिर सै जिन्दे होनै को सबाल है, का तुम लोगौ नै जौ कबी ना पढ़ो कै परमेसर नै तुमसै कैई, 32 मैं इब्राहिम को परमेसर, इसहाक को परमेसर और याकूब को परमेसर हौं? बौ मरे भएऔं को ना, जिन्देऔं को परमेसर है।” 33 जौ सुनकै लोग उसकी सिक्छा सै बड़े अचम्बे मै पड़ गए। सबसै बड़ो हुकम ( मरकुस 12:28–34 ; लूका 10:25–28 ) 34 जब फरीसिऔं नै जौ सुनो कै ईसु नै अपने जबाब सै सदूकिऔं को मौह बन्द कर दओ हो, तौ बे इखट्टे हो गए। 35 और उनमै सै एक सास्तरी नै ईसु कै परखनै के ताँई बासै पूँछी, 36 “गुरूजी, नियम के हिसाब सै सबसै बड़ो हुकम कौन सो है?” 37 ईसु नै उनसै कैई, “अपने परभु परमेसर कै अपने सैरे दिल, अपनी सैरी आत्मा और अपनी सैरी बुद्धि सै पियार करौ। 38 जौ सबसै बड़ो और पैलो हुकम है। 39 दूसरो हुकम इसई के जैसो है अपने पड़ोसी कै अपने जैसे पियार करौ। 40 सैरे हुकम, और नबिऔ की सिक्छा इनई दो हुकमौ मै टिके हैं।” ईसु को फरीसिऔं सै एक सबाल ( मरकुस 12:35–37 ; लूका 20:41–44 ) 41 जब फरीसी अबी इखट्टेई हे, तौ ईसु नै उनसै एक सबाल पूँछो कै, 42 “मसी के बारे मै तुम का सोचौ हौ कै बौ किसको लौंड़ा है?” उनौनै उस्सै कैई, “दाऊद को” 43 ईसु नै उनसै पूँछी, “तब दाऊद पबित्तर आत्मा सै भरकै उसकै परभु काए कैबै है? उसनै तौ लिखो है, 44 “‘परभु नै मेरे परभु सै कैई, तू तब तक मेरे खाने हात बैठे रैह, जब तक मैं तेरे दुसमनौ कै तेरे पाँऐऔं के नीचे ना डार दौं।’” 45 “अगर दाऊद बाकै परभु कैबै है, तौ बौ बाको लौंड़ा कैसे हो सकै है?” 46 इसके जबाब मै कोई ईसु सै कुछ ना कै सको और उस दिन सै किसी कै उस्सै और सबाल कन्नै की हिम्मत ना भई। |
New Life Compute Institute [NLCI] - CC BY-NC-ND 4.0