मत्‍ती 17 - बुक्सा

ईसु को रूप बदलनो

¹ छै दिन के बाद ईसु नै पतरस, याकूब और उसके भईया यहून्‍ना कै संग लओ और उनकै इकले मै किसी ऊँचे पहाड़ मै ले गओ।

² बहाँ उनके सामने बाको रूप बदल गओ। बाको मौह सूरज के हाँई चमकल लगो और बाके लत्‍ता ऐंसे चमचमाल लगे जैसे रौसनी।

³ फिर अचानक मूसा और एलिया बाके सामने परकट भए और ईसु सै बात करल लगे।

⁴ जौ देक्‍कै पतरस ईसु सै बोलो, “परभु, हिंया होनो हमरे ताँई कितनो अच्‍छो है, अगर तू चाँहै तौ मैं हिंया तीन तम्बू खड़े कर दौं, एक तेरे ताँई, एक मूसा के ताँई और एक एलिया के ताँई।”

⁵ पतरस अबी बात करई रओ हो कै एक चमकते भए बादर नै आकै बे ढक लए और बादर सै आकासवानी भई, “जौ मेरो पियारो लौंड़ा है, जिस्सै मैं भौत खुस हौं। जाकी सुनौ!”

⁶ जौ सुनकै चेला मौह के बल गिर पड़े और भौत डर गए।

⁷ तब ईसु उनके धौंरे गओ और उनकै छूँते भए बोलो, “डरौ मत, खड़े होबौ।”

⁸ जब उनौनै अपनी आँख उठांई, तौ उनकै ईसु के सिबा और कोई ना दिखाई पड़ो।

⁹ जब बे पहाड़ सै उतर रए हे तौ ईसु नै उनकै जौ हुकम दओ, “जब तक आदमी को लौंड़ा मरे भए मै सै ना जी उठै, तब तक तुम किसी सै बी इस दरसन की चरचा ना करौगे।”

¹⁰ फिर बाके चेलौ नै बासै पूँछी, “यहूदी सास्तरी फिर काए कैबै हैं, कै एलिया को पैले आनो जरूरी है?”

¹¹ ईसु नै जबाब दओ, “एलिया तौ आगो, और सब कुछ सुदारैगो।

¹² पर मैं तुमसै कैरओ हौं एलिया आ चुको है, और उनौनै बौ ना पैचानो और बाके संग मन मरजी को बरताब करो, इसई हाँई आदमी को लौंड़ा बी उनके हातौ सै दुख उठागो।”

¹³ तब चेला समज गए कै बौ हमकै यहून्‍ना जल संस्कार दैनै बारे के बारे मै कैरओ है।

दुसट आत्‍मा बारे लौंड़ा कै चंगाई

¹⁴ जब ईसु भीड़ मै बापस आओ तौ एक आदमी बाके धौंरे आओ, और घूंटे टेक्‍कै कैललगो।

¹⁵ “हे परभु, मेरे लौंड़ा के ऊपर दया कर, बाकै मिरगी को दौरा पड़ै है, बौ भौत तड़पै है और बौ बेरमबेर आग और पानी मै गिर जावै है।

¹⁶ मैं उसकै तेरे चेलौ के धौंरे लाओ, पर बे बाकै ठीक ना कर सके।”

¹⁷ ईसु नै कैई कै, “हे अबिसवासी और टेड़े लोगौ मैं कब तक तुमरे संग रैहंगो? कब तक तुमरी सैहंगो? बाकै हिंया मेरे धौंरे लाऔ।”

¹⁸ तब ईसु नै दुसट आत्‍मा कै फटकार लगाई और बौ लौंड़ा मै सै उसई टैम लिकर गई, और लौंड़ा ठीक हो गओ।

¹⁹ बाद मै इकले मै चेलौ नै ईसु के धौंरे आकै पूँछी, “हम उसकै काए ना लिकार सके?”

²⁰ ईसु नै उनसै कैई, “तुम्मै बिसवास की कमी है। मैं तुमसै सच कैरओ हौं, अगर तुमरो बिसवास राई के दाने के बराबर बी है, तौ तुम इस पहाड़ सै जौ कैऔ, हिंया सै हट कै बहाँ जा, तौ बौ हट जागो, और तुमरे ताँई कुछ बी मुसकल ना होगो।”

²¹ पर पिराथना और बरत के अलाबा किसी और उपाय सै दुसटौ की जौ जाति ना लिकारी जा सकै है।

ईसु को अपनी मौत के बारे मै बतानो

²² जब बे गलील मै हे, तौ ईसु नै उनसै कैई, “आदमी को लौंड़ा लोगौ के हात मै पकड़बाओ जागो।

²³ और बे उसकै मार डारंगे, और बौ तीसरे दिन जी उठैगो।” जौ सुनकै चेलौ कै भौत दुख भओ।

लगान को भुगतान

²⁴ जब बे कफरनहूम सैहर मै पौंचे, तौ मन्‍दर के ताँई लगान लैनै बारौ नै पतरस के धौंरे आकै पूँछी, “का तुमरो गुरू मन्‍दर की लगान ना देवै है?”

²⁵ उसनै कैई “हाँ देवै तौ है।” जब पतरस घर पौंचो, तौ उसके कुछ कैनै सै पैलेई ईसु नै पूँछी, “समौन तुमरो का बिचार है? दुनिया के राजा किन लोगौ सै चुंगी या लगान लेबै हैं? अपने बालकौ सै या पराएऔं सै?”

²⁶ पतरस नै उनसै कैई पराएऔं सै। तब ईसु नै उस्सै कैई, “तौ अपने बालक लगान सै बच गए।

²⁷ फिर बी हम उन लोगौ कै गलत उदाहरन ना दैं, इसताँई तुम झील के किनार जाकै काँटो डारौ, जो मच्‍छी पैले फसैगी, बाकै पकड़ लेईओ, और बाको मौह खोलौगे तौ तुमकै एक सिक्‍का मिलैगो, उसई कै लेकै मेरे और अपने बदले उनकै दे देईओ।”