मत्ती 10 - बुक्साभेजे भए चेलौ के नाम ( मरकुस 3:13–19 ; लूका 6:12–16 ) 1 फिर ईसु नै अपने बारैह चेलौ कै अपने धौंरे बुलाकै, उनकै दुसट आत्माऔ के ऊपर हक दओ कै उनकै लिकारैं और सब तरै की बेमारिऔ और सब तरै की कमजोरिऔं कै ठीक करैं। 2 और बारैह खास भेजे भए चेलौ के जे नाम हैं, पैलो समौन, जो पतरस कैह लाओ और उसको भईया अन्दरयास, जबदी को लौंड़ा याकूब, और उसको भईया यहून्ना, 3 फिलिप्पुस और बरतुलमै, थौमा और चुंगी लैनै बारो मत्ती, हलफई को लौंड़ा याकूब और तदै। 4 समौन कनानी, और यहूदा इसकरोती, जिसनै ईसु पकड़बा बी दओ। अच्छी खबर के ताँई भेजे भए चेलौ को जानो ( मरकुस 6:7–13 ; लूका 9:1–6 ) 5 इन बारौंह कै ईसु नै जौ आगियाँ देकै भेजो कै, “गैर यहूदिऔं की ओर ना जईओ, और ना सामरी लोगौ के किसी सैहर मै जईओ। 6 पर ईसराइल केई घराने की खोई भई भेड़ौ के धौंरे जईओ। 7 और चलते चलते परचार करकै कैओ कै सुरग को राज धौंरे आ गओ है। 8 बेमारौं कै ठीक करौ, मरे भए कै जिन्दगी दो, कोढ़िऔं कै सुद्द करौ, दुसट आत्माऔ कै लिकारौ, तुमकै मुफत मै मिलो है मुफत मै दे दो। 9 अपने थैलिया मै सौनो, चाँदी या पैसा ना रक्खौ 10 रस्ता के ताँई ना झोला, ना दो कुरता, ना जूता, ना लठिया ले जाऔ कैसेकै मजदूर कै रोटी को हक है। 11 “जिस किसी सैहर या गाम मै जाऔ तौ पतो लगाऔ कै बहाँ कौन बिसवास लायक है? और जब तक बहाँ सै ना लिकरौ, उसई के हिंया रैहऔ। 12 उस घर मै घुसते टैम उसकै सान्ति की आसीस दो। 13 अगर उस घर के लोग इस लायक हौंगे तौ तुमरी सान्ति उस घर मै उतरैगी, अगर बौ घर इस लायक ना होगो, तौ तुमरी सान्ति तुमरे धौंरे लौहट आगी। 14 अगर कोई तुमरो सुआगत ना करै या तुमरी बात ना सुनै, तौ उस घर या सैहर सै लिकरते भए अपने पाँऐऔं की धूदर झाड़ दो। 15 मैं तुमसै सच कैरओ हौं, कै नियाय के दिन उस सैहर की हालत सदोम और अमोरा देस की हालत सै जादा बुरी होगी। भेजे भए चेलौ कै ईसु की चितौनी ( मरकुस 13:9–13 ; लूका 21:12–17 ) 16 “देखौ, मैं तुमकै भिड़ियौ के बीच भेड़ौ की हाँई भेज रओ हौं, इसताँई साँप के हाँई चालाँक और कबूतर के हाँई भोले बनौ। 17 पर लोगौ सै चौकस रैहऔ, कैसेकै बे तुमकै अदालतौं के हवाले कर दंगे, और अपनी पंचातौ मै तुमकै कोड़ा मारंगे। 18 तुम मेरे कारन अधकारिऔं और राजाऔं के सामने पेस करे जाऔगे, जिस्सै मेरे बारे मै तुम उनकै और गैर यहूदिऔं कै गभाई दे सकौ। 19 जब बे तुमकै अदालत के हवाले कर रए हौं, तौ जौ चिन्ता ना करिओ कै हम कैसे बोलंगे और का कैंगे, कैसेकै जो कुछ तुमकै कैनो होगो, बौ उसई घड़ी तुमकै बता दओ जागो। 20 कैसेकै बोलनै बारे तुम ना हौ, पर अब्बा को आत्मा है, जो तुमरे दुआरा बोलै है। 21 “भईया अपने भईया कै धोके सै पकड़बाकै मरवा डारंगे और अब्बा अपने बालक कै, औलाद अपने अईया-अब्बा के खिलाप उठ खड़ी हौंगी और उनकै मरवा डारंगी। 22 मेरे नाम के कारन सब लोग तुमसै बैर करंगे, पर जो अन्त तक बिसवास मै बनो रैहगो उसई कै मुक्ति मिलैगी। 23 जब बे तुमकै एक सैहर मै सताँऐ, तौ दूसरे सैहर कै भाज जईओ, मैं तुमसै सच कैरओ हौं कै तुम ईसराइल के सैहरौं के चक्कर पूरे बी ना कर सकौगे कै आदमी को लौंड़ा आ जागो। 24 “ना चेला गुरू सै बड़ो होवै है और ना नौकर अपने मालिक सै 25 चेला के ताँई अपने गुरू जैसो और नौकर कै अपने मालिक जैसो बन जानोई भौत है, जब उनौनै घर के मालिक कै सैतान कैई तौ उसके घर बारौ कै का ना कैंगे? परभु सै डरौ लोगौ सै ना ( लूका 12:2–7 ) 26 “इसताँई उनसै ना डरौ, ऐंसो कुछ बी गुप्त ना है, जो उज्जेरे मै ना लाओ जागो और ऐंसो कुछ बी छिपो भओ ना है, जो जानो ना जागो। 27 मैं जो तुमकै इन्धेरे मै कैरओ हौं उसकै तुम उज्जेरे मै सुनाऔ और जो कानौ कान सुनौ हौ, उसकै मकान की छत सै परचार करौ। 28 “उनसै ना डरौ, जो सरीर कै मार डारै हैं, पर आत्मा कै ना मार सकैं हैं; पर उस्सै डरौ, जो आत्मा और सरीर दौनौ कै नरक मै नास कर सकै है। 29 का एक पैसा मै दो चिरईया ना बिकै हैं? फिर बी तुमरे अब्बा की इच्छा के बिना उनमै सै एक बी जमीन मै ना गिरै है। 30 हाँ, तुमरे खोपड़ी के बार बी सब गिने भए हैं। 31 इसताँई, डरौ ना, तुम तौ भौत सी चिरईयौ सै जादा कीमती हौ। ( लूका 12:8 , 9 ) 32 “जो कोई सब लोगौ के सामने मैंकै मान लेगो, उसकै मैं बी सुरग मै रैहनै बारे अपने अब्बा के सामने मान लंगो। 33 पर जो कोई सब लोगौ के सामने मेरो इनकार करैगो बाको मैं बी अपने सुरग मै रैहनै बारे अब्बा के सामने इनकार करंगो। ईसु के पिच्छे चलनै सै होनै बारी परेसानी ( लूका 12:51–53 ; 14:26 , 27 ) 34 “जौ ना सोचौ कै मैं, धरती मै सान्ति लेकै आऔं हौं, मैं सान्ति ना पर तरवार चलवानै आऔं हौं। 35 मैं लौंड़ा और अब्बा मै, लौंड़िया और अईया मै, बहू और सास मै फूट डान्नै आऔं हौं। 36 आदमी के बैरी उसके अपने घर केई लोग हौंगे। 37 “जो अपने अईया-अब्बा और लौंड़ा लौंड़िया कै मैंसै जादा पियार करै है, बौ मेरे लायक ना है। 38 और जो अपनो कुरूस लेकै मेरे पीछे ना चलै बौ मेरे लायक ना है। 39 जो अपने पिरान बचावै है, बौ बाकै खोगो, और जो मेरे कारन अपनो पिरान खोवै है, बौ बाकै पागो। ईनाम ( मरकुस 9:41 ) 40 “जो तुमरी इज्जत करै है, बौ मेरी इज्जत करै है, और जो मेरी इज्जत करै है, बौ बाकी इज्जत करै है, जिसनै मैं भेजो हौं। 41 जो नबी की इज्जत इसताँई करै है, कै बौ नबी है, बौ नबी को ईनाम पागो, और जो धरमी की इज्जत इसताँई करै है, कै बौ धरमी है, बौ धरमी को ईनाम पागो। 42 जो कोई इन छोटो मै सै एक कै चेला जानकै सिरप एक गिलास ठंडो पानी पिबाय, मैं तुमसै सच कैरओ हौं, बौ किसी तरै सै अपनो ईनाम ना खोगो।” |
New Life Compute Institute [NLCI] - CC BY-NC-ND 4.0