लूका 9 - बुक्सा

ईसु के दुआरा बारैह चेलौ को भेजो जानो

¹ फिर ईसु नै बारैह चेलौ कै बुलाकै उनकै सब दुसट आत्‍माऔ कै लिकारनै और बेमारिऔ कै ठीक कन्‍नै की सकति और अधकार दओ।

² और बे परमेसर के राज की अच्‍छी खबर सुनानै और बेमारौं कै ठीक कन्‍नै के ताँई भेजे।

³ और बानै उनसै कैई, “रस्ता के ताँई कुछ बी ना ले जाऔ ना लठिया, ना झोला, ना रोटी, ना रुपिया और ना दो-दो कुरता।

⁴ और जिस किसी के घर मै तुम रुकौ, बहीं रैहऔ, और बहीं सै बिदा होओ।”

⁵ अगर लोग तुमरो सुआगत ना करैं, तौ बा सैहर सै लिकरते भए अपने पाँऐऔं की धूदर झार डारौ, कै उनके खिलाप गभाई हो।

⁶ बे बहाँ सै लिकरकै गामौ-गामौ अच्‍छी खबर सुनाते, और हर कहीं लोगौ कै ठीक करते भए फिरते रैहए।

हेरोदेस राजपाल को घबरानो

⁷ एक चौथाई देस को राजपाल हेरोदेस, जौ सब सुनकै घबरा गओ, कैसेकै कुछ लोग कैबै हे कै “यहून्‍ना मरे भएऔं मै सै जी उठो है।”

⁸ और दूसरे कैरए हे, “एलिया परकट भओ है।” कुछ और कैरए हे, पुराने नबिऔ मै सै कोई जी उठो है।

⁹ पर हेरोदेस नै कैई, “यहून्‍ना की तौ मैंनै गरदन कटबा दई। फिर जौ कौन है, जिसके बारे मै ऐंसी बात सुन रओ हौं?” इसताँई बौ ईसु सै मिलनै की कोसिस करल लगो।

पाँच हजार लोगौ के रोटी खवाई

¹⁰ फिर भेजे भए चेलौ नै लौहटकै जो कुछ उनौनै करो हो, ईसु कै सब बता दओ, और बौ उनकै अगल करकै चुपचाप बैतसैदा नाम एक सैहर मै ले गओ।

¹¹ पर भीड़ कै इसको पतो चल गओ और बौ बी उसके पीछे हो लई, ईसु नै उनको सुआगत करो और परमेसर के राज के बारे मै उनकै सिक्‍छा दई। और जिनकै ठीक होनै की जरूरत ही, बे ठीक करे।

¹² जब दिन छिपल लगो, तौ भेजे भए बारौंह चेलौ नै आकै उस्सै कैई, “भीड़ कै बिदा कर, जिस्सै बे आस पास के गामौ और बस्तिऔं मै जाकै रैहनै और खानै को इन्‍तजाम कर सकैं, कैसेकै हिंया तौ हम लोग सुनसान जघै मै हैं।”

¹³ ईसु नै उनकै जबाब दओ, “तुमई उनकै खानै कै दो,” उनौनै कैई, “हमरे धौंरे तौ पाँच रोटी और दो मच्‍छी के अलाबा कुछ बी ना है, पर हाँ, अगर हम जाकै इन सब लोगौ के ताँई रोटी मोल लैं, तौ हो सकै है।”

¹⁴ बहाँ करिबन पाँच हजार तौ सिरप आदमी हे। ईसु नै अपने चेलौ सै कैई, “उनकै पचास-पचास के समू मै बिठा दो।”

¹⁵ उनौनै ऐंसोई करो, और सब बिठा दए।

¹⁶ तब ईसु नै बे पाँच रोटी और दो मच्‍छी लंई, और सुरग की ओर देखते भए उनके ताँई परमेसर को धन्‍नबाद करो, और तोड़-तोड़कै चेलौ कै देतो गओ, कै लोगौं कै परसैं।

¹⁷ तब सब लोग खाकै रज गए और बचे भए टुकड़ौ सै बारैह पल्‍ला भरकै उठाए।

पतरस को ईसु कै मसी माननो

¹⁸ जब बौ इकले मै पिराथना कर रओ हो, तब चेला बाके धौंरे आए, तौ बानै उनसै पूँछी, “कै लोग मैंकै का कैबै हैं?”

¹⁹ उनौनै जबाब दओ, “कुछ लोग कैबै हैं जल संस्कार दैनै बारो यहून्‍ना, कुछ एलिया, पर कुछ दूसरे लोग कैबै हैं, पुराने नबिऔ मै सै कोई फिर जिन्‍दो हो गओ है।”

²⁰ ईसु नै उनसै पूँछी, “पर तुम मैंकै का कैबौ हौ?” पतरस नै जबाब दओ, “तू परमेसर को चुनो भओ मसी है।”

²¹ तब बानै चेलौ कै कड़ी चितौनी देकै कैई, “जौ बात किसी कै ना कैईयो।”

ईसु दुआरा अपनी मौत की भबिसबानी

²² और बानै अपने चेलौ सै कैई, “आदमी के लौंड़ा के ताँई जरूरी है, कै ‘मैं’ भौत दुख उठाऔं, और ‘मैं’ बुजरग यहूदी मुखियौं, मुक्‍ख पुजारिऔं और सास्तरिऔं दुआरा ठुकराओ जाकै, मार डारो जांऔ, और ‘मैं’ तीसरे दिन जी उठौं।”

²³ इसके बाद ईसु नै सबसै कैई, “जो कोई मेरे पीछे आनो चाँहै, तौ अपने आप को इनकार करै और रोज अपने दुख और मुसीबत उठाय चाँए मौत बी आ जाय। बौई मेरे पीछे चल सकै है।

²⁴ अगर जो कोई अपनी जान बचानी चाँहैगो बौ बाकै खोगो, पर जो कोई मेरे ताँई अपनी जान खोगो, बौई उसकै बचागो।

²⁵ अगर आदमी सैरी दुनिया कै पाले, पर अपनी जिन्‍दगी खो दे, या अपनो सरबनास कल्‍ले, तौ बाकै इस्सै का फाएदा होगो?

²⁶ जो कोई मैंकै और मेरी बातौं कै लोगौ के बीच मै माननै सै सरमागो तौ ‘मैं’ आदमी को लौंड़ा बी, जब अपनी और अपने अब्बा की, और पबित्‍तर सुरगदूतौं की महिमा के संग आंगो, तौ मैं बी उसकै ना मानंगो।

²⁷ मैं तुम लोगौं सै सच कैरओ हौं, कै जो हिंया खड़े हैं, उनमै सै कुछ ऐंसे हैं, कै जब तक परमेसर को राज ना देख लैं, तब तक ना मरंगे।”

ईसु को रूप बदलनो

²⁸ इन बातौं के करिबन आठ दिनौ बाद बौ पतरस और यहून्‍ना और याकूब कै संग लेकै पिराथना कन्‍नै के ताँई पहाड़ मै गओ।

²⁹ जब बौ पिराथना करई रओ हो, तौ बाके मौह को रूप बदल गओ और बाके लत्‍ता सपेद होकै जगमगाल लगे।

³⁰ तब जे दो आदमी मूसा और एलिया परकट होकै उसके संग बात कर रए हे।

³¹ जो अपनी महिमा के संग दिखाई दए, और बाके मरनै की चरचा कर रए हे, जो ऐरूसलेम मै पूरी होनै बारी ही।

³² पतरस और बाके साती गैहरी नींद मै हे, जब बे जगे तौ उनौनै ईसु की महिमा देखी और उनौनै बे दो आदमी बी देखे जो उसके संग खड़े हे।

³³ जब बे बाके धौंरे सै जाल लगे, तौ पतरस नै ईसु सै कैई, “हे मालिक, हमरो हिंया रैहनो कितनो अच्‍छो है, हम तीन तम्बू बनाऐ, एक तेरे ताँई, एक मूसा के ताँई और एक एलिया के ताँई।” उसकै पतो ना हो कै बौ का कैरओ है।

³⁴ बौ जौ कैई रओ हो, कै एक बादर नै आकै बे छाँ लए, और जब बे उस बादर सै घिरललगे, तौ डर गए।

³⁵ और उस बादर मै सै जौ अबाज आई, “जौ मेरो चुनो भओ लौंड़ा है, इसकी सुनौ।”

³⁶ अबाज खतम होतेई ईसु इकलो रैह गओ, और चेला चुप रैहए, और उनौनै जो कुछ देखो हो, बाकी कोई बात उन दिनौ मै किसी सै ना कैई।

एक लौंड़ा कै दुसट आत्‍मा सै छुटकारो

³⁷ और अगले दिन जब बे पहाड़ सै उतरे तौ एक बड़ी भीड़ ईसु सै आ मिली।

³⁸ तब भीड़ मै सै एक आदमी नै चिल्‍लाकै कैई, “हे गुरू, मैं तेसै बिनती कर रओ हौं, मेरे लौंड़ा के ऊपर रैहम कर, कैसेकै बौ मेरो इकलौतो लौंड़ा है।

³⁹ एक दुसट आत्‍मा बाकै पकड़ै है, और बौ अचानक चिल्‍ला पड़ै है, और बौ बाकै ऐंसो मरोड़ै है कै बाके मौह मै झाग लिकरल लगै है, और बाको सरीर ऐंठल लगै है, और बाकी नस नस तोड़कै बड़ी मुसकल सै छोड़ै है।

⁴⁰ और मैंनै तेरे चेलौ सै बिनती करी, कै बे बाकै लिकारै, पर बे ना लिकार सके।”

⁴¹ तब ईसु नै जबाब दओ, “हे अबिसवासी और भरस्ट पीड़ी के लोगौं मैं कब तक तुमरे संग रैहंगो, और कब तक तुमकै सैहंगो? अपने लौंड़ा कै हिंया ले आ।”

⁴² अबी बौ लौंड़ा धौंरे आई रओ हो कै दुसट आत्‍मा नै बौ जमीन मै पटक कै मरोड़ दओ, पर ईसु नै दुसट आत्‍मा कै डाँट लगाई और लौंड़ा कै अच्‍छो करकै बाके अब्बा कै सौंप दओ।

⁴³ तब सब आदमी परमेसर की महासकति देक्‍कै हैरान भए। ईसु जो कुछ कर रओ हो उस काम कै देक्‍कै सब आदमी हैरान हो रए हे तबई ईसु नै अपने चेलौ सै कैई,

अपनी मौत के बारे मै ईसु कै दुबारा कैनो

⁴⁴ “अब जो मैं तुमसै कैरओ हौं, उन बातौं मै धियान दो। आदमी को लौंड़ा, लोगौ के हातौ मै सौंप दओ जागो।”

⁴⁵ पर बे इस बात कै समज ना सके। इसको अरथ उनसै छिपो रैह गओ और बे उसकै जान ना सके और बे बा बात के बारे मै बासै पूँछनै सै डरै बी हे।

सबसै बड़ो कौन?

⁴⁶ एक दफै चेलौ मै जौ बैहैस छिड़ गई, कै हम्मै सबसै बड़ो कौन है?

⁴⁷ पर ईसु नै उनके मन को बिचार जानकै एक बालक लओ और बाकै अपने धौंरे खड़ो करो और

⁴⁸ उनसै कैई, “जो मेरे नाम मै इस बालक को सुआगत करै है, बौ मेरो सुआगत करै है और बौ बाको बी सुआगत करै है, जिसनै मैं भेजो हौं। तुम्मै सै जो सबसै छोटो है, बौई सबसै बड़ो है।”

⁴⁹ तब यहून्‍ना नै कैई, “हे मालिक, हमनै एक आदमी कै तेरे नाम सै दुसट आत्‍मा कै लिकारते देखो, और हमनै बाकै मनैह करी, कैसेकै बौ हमरे जैसे तेरो चेला ना है।”

⁵⁰ ईसु नै उनसै कैई, “बाकै मनैह मत करौ, जो तुमरे खिलाप ना है, बौ तुमरे संग है।”

एक सामरी सैहर

⁵¹ फिर ऐंसो भओ कै जब ईसु को सुरग जानै को टैम धौंरे आल लगो तौ बानै ऐरूसलेम जानै को पक्‍को फैसला करो।

⁵² और बानै सन्देस दैनै बारे दूत अपने अग्गे भेजे, बे सामरी लोगौ के एक गाम मै गए, कै ईसु के ताँई रैहनै को इन्‍तजाम करैं।

⁵³ लोगौं नै ईसु को सुआगत कन्‍नै सै इनकार कर दओ, कैसेकै बौ ऐरूसलेम जा रओ हो।

⁵⁴ बाके चेला याकूब और यहून्‍ना जौ सुनकै बोल पड़े, “परभु, तू चाँहै तौ, हम जौ कैह दैं कै सुरग सै आग गिरै और उनकै भसम कर दे।”

⁵⁵ पर ईसु नै उनकी ओर मुड़कै बे डाँटे,

⁵⁶ फिर बे दूसरे गाम चले गए।

चेला बन्‍नै की सरत

⁵⁷ ईसु अपने चेलौ के संग रस्ता के किनारे चलो जा रओ हो तौ किसी नै बासै कैई, “तू जहाँ कहीं बी जाय, मैं तेरे पीछे चलंगो।”

⁵⁸ ईसु नै बासै कैई, “लौमड़िऔं के भिट्‍टे और आसमान के पंछिऔ के बसेरा होवै हैं, पर आदमी के लौंड़ा के ताँई खोपड़ी छुपानै की बी जघै ना है।”

⁵⁹ बानै किसी दूसरे सै कैई, “मेरे पीछे चलो आ।” पर बानै जबाब दओ, “हे परभु, पैले मैंकै अपने अब्बा कै दफनानै के ताँई जान दे।”

⁶⁰ तब ईसु नै बासै कैई, “मुरदौं कै अपने मुरदे दफनान दो, तू जा और परमेसर के राज को परचार कर।”

⁶¹ फिर एक और नै बी कैई, “हे परभु, मैं तेरे पीछे चलंगो पर पैले मैंकै अपने घर बारौं सै बिदा लैन दे।”

⁶² ईसु नै बासै कैई, “हर की मुठिया पकड़नै के बाद जो मुड़कै पीछे देखै है, बौ परमेसर के राज के लायक ना है।”