लूका 8 - बुक्सा

ईसु की सेवा कन्‍नै बारी बईयरैं

¹ इसके बाद ईसु सैहर-सैहर और गाम-गाम मै परमेसर के राज की अच्‍छी खबर को परचार सुनातो भओ, फिरल लगो और उसके बारैह चेला बी संग हे।

² उसके संग कुछ बईयरैं बी हीं, जिनकै बानै बेमारिऔ और दुसट आत्‍माऔ सै छुटकारो दिब्बाओ हो। इनमै मरियम मगदलनी नाम की एक बईयर ही जिसकै सात दुसट आत्‍माऔ सै छुटकारो मिलो हो।

³ और हेरोदेस को इन्‍तजाम कन्‍नै बारो भन्डारी खोजा की बईयर योअन्‍ना, संग मै सुसन्‍ना और भौस्सी बईयरैं बी हीं, जे बईयरैं अपनेई पैसौ सै ईसु और बाके चेलौ की सेवा करै हीं।

बीज बोनै बारे की दासतान

⁴ जब सैहर-सैहर सै आकै लोगौं की बड़ी भीड़ ईसु के धौंरे इखट्‍टी होती जा रई ही, तौ बानै उनसै एक दासतान कैई,

⁵ “एक किसान अपने बीज बोनै लिकरो। जब बानै बीज बोए तौ कुछ बीज मैड़ मै पड़े और पाँऐऔं के नीचे खूँदे गए, और आसमान के पंछिऔ नै बे चुंग लए।

⁶ कुछ बीज पथरीली जमीन मै गिरे, जब बे जमे तौ नमी ना मिलनै सै मुरझा गए।

⁷ कुछ बीज कटीली झाँड़िऔं मै गिरे। और झाँड़िऔं नै संग-संग बढ़कै बे दबा लए।

⁸ कुछ बीज अच्‍छी जमीन मै गिरे, बे जमकै सौ गुना फल लाए,” इतनो कैनै के बाद बौ ऊँची अबाज सै बोलो, “जिसके सुन्‍नै के कान हौं बौ सुन ले।”

⁹ उसके चेलौ नै बासै पूँछी, कै “इस दासतान को अरथ का है।”

¹⁰ ईसु नै उनसै कैई, “तुमकै परमेसर के राज के भेदौं की समज देई गई है, पर औरौं कै दासतानौ मै सुनाओ जावै है, जिस्सै बे देखते भए बी ना देखैं, और सुनते भए बी ना समजैं।

बीज बोनै बारी दासतान को अरथ

¹¹ “इस दासतान को अरथ जौ है, बीज परमेसर को बचन है।

¹² मैड़ मै गिरे भए बीज बे लोग हैं, जो बचन सुनै हैं, तब सैतान आकै उनके मनौ मै सै बचन लिकार ले जावै है कै कहीं ऐंसो ना हो कै बे बिसवास करैं और मुक्‍ति पाँऐ।

¹³ पथरीली जमीन मै गिरे भए बीज बे लोग हैं, जो बचन सुनतेई बाकै खुसी सै मानै हैं, पर जड़ ना पकड़ै हैं, बे कुछई टैम तक बिसवास करैं हैं और मुसीबत के टैम मै बे बहक जावै हैं।

¹⁴ “कटीली झाँड़िऔं मै गिरे भए बे लोग हैं, जो बचन सुनै हैं, पर अग्गे चलकै बे चिन्‍ता और धन और जिन्‍दगी के सुख विलास मै फसकै दब जावै हैं और पकनै के ताँई कोई अच्‍छे फल ना लाबैं हैं।

¹⁵ पर अच्‍छी जमीन मै गिरे भए बे लोग हैं, जो बचन सुनकै उसकै अच्‍छे और सच्‍चे मन सै मानै हैं, और अपने धीरज के मारे बे फल लाबैं हैं।

दिया की दासतान

¹⁶ “दिया पजारकै कोई बी बाकै बरतन सै ना ढकै है, नाई खटिया के नीचे रक्‍खै है, पर बौ बाकै आरे मै रख देवै है, जिस्सै भीतर आनै जानै बारे बाको उज्‍जेरो देख सकैं।

¹⁷ ऐंसो कुछ बी लुको भओ ना है, जो परकट ना होगो और ऐंसी कुछ बी गुप्‍त बात ना है, जो जानी ना जाऐ और परकट ना हो।

¹⁸ इसताँई चौकस रैहऔ, कै तुम किस रीती सै सुनौ हौ, कैसेकै जिसके धौंरे कुछ है, उसई कै और दओ जागो और जिसके धौंरे कुछ ना है, बासै बौ बी ले लओ जागो, जिसकै बौ अपनो समजै है।”

ईसु के भईया और बाकी अईया

¹⁹ तब ईसु की अईया और बाके भईया उस्सै मिलनै आए, पर भीड़ के मारे बाके धौंरे तक ना पौंच सके।

²⁰ लोगौ नै ईसु सै कैई, “कै तेरी अईया और तेरे भईया बाहार खड़े हैं और तेसै मिलनो चाँह रए हैं।”

²¹ बानै जबाब दओ, “मेरी अईया और मेरे भईया बेई हैं, जो परमेसर को बचन सुनै और बाकै मानै हैं।”

ईसु के दुआरा आँधी कै रोकनो

²² फिर एक दिन ईसु और बाके चेला किसती मै चढ़े, और बानै उनसै कैई कै, “आऔ, झील के पल्‍ली पार चलैं”

²³ जब किसती चल रई ही, तौ बौ सो गओ। तब झील मै भयंकर आँधी तोफान आ गओ और किसती पानी सै भरल लगी और बे खतरा मै पड़ गए।

²⁴ चेलौ नै ईसु के धौंरे आकै बौ जगाओ, और कैई, “ओ सुआमी, ओ सुआमी, हम डूब रए हैं।” तब ईसु नै उठकै आँधी और पानी की लहरौं कै डाँट लगाई और बे थम गंई, और सब सान्‍त हो गओ।

²⁵ तब बानै अपने चेलौ सै कैई, “तुमरो बिसवास कहाँ है?” पर बे डर गए, और अचम्बे मै पड़कै आपस मै कैललगे, “जौ कौन है? जो आँधी और पानी कै बी हुकम देवै है, और बे बाको हुकम मानै हैं?”

दुसट आत्‍मा सै घिरे भए को छुटकारो

²⁶ फिर बे किसती सै उतरकै गिरासेनिओ के देस मै पौंचे, जो झील के पल्‍ली पार गलील के सामने है।

²⁷ ईसु जैसेई जमीन मै उतरो, बा सैहर को दुसट आत्‍माऔ सै घिरो भओ एक आदमी बाके धौंरे आओ। जो भौत दिनौ सै ना तौ लत्‍ता पैहरै हो और ना घर मै रैहबै हो, बौ कबरौं मै रैह करै हो।

²⁸ बौ ईसु कै देखकै चिल्‍लाओ, और उसके सामने गिरकै ऊँची अबाज मै बोलो, “हे परमपरधान परमेसर के लौंड़ा ईसु, मैंकै तेसै का काम! मैं तेसै बिनती करौं हौं, मैंकै ना सता।”

²⁹ कैसेकै ईसु दुसट आत्‍माऔ कै उस आदमी सै लिकर जानै को हुकम देरओ हो। कैसेकै दुसट आत्‍मा बाकै बेरमबेरा चिपट जावै हीं और बस मै रखनै के ताँई लोग बाकै साँकरौ और बेड़िऔ सै बांध देवै हे, फिर बी बौ इन बंधनौ कै तोड़ देवै हो और दुसट आत्‍मा बाकै बिराने मै भजाऐ फिरै हीं।

³⁰ ईसु नै दुसट आत्‍मा सै पूँछी, “तेरो नाम का है?” बानै कैई, “सैना” कैसेकै भौत सी दुसट आत्‍मा बामै चिपटी पड़ी हीं।

³¹ बे उस्सै बिनती कर रई हीं कै बौ उनकै कुन्ड मै जानै को हुकम ना दे।

³² बहीं पहाड़ मै सूअरौ को एक बड़ो झुन्ड चुंग रओ हो, दुसट आत्‍माऔ नै ईसु सै बिनती करी कै बौ उनकै सूअरौ मै जान दे, ईसु नै बे जान दंई।

³³ तब दुसट आत्‍मा उस आदमी मै सै लिकरकै सूअरौ मै जा समाई और बौ झुन्ड ढलान मै सै लुढ़कते भए झील मै जा गिरो और डूबकै मर गओ।

³⁴ जौ देखकै सूअर चुंगानै बारे भाज गए और उनौनै इसकी खबर सैहर और गामौ मै फैला दई।

³⁵ तब लोग जो कुछ भओ हो उसकै देखनै लिकरे और ईसु के धौंरे आए। और उनौनै उस आदमी कै जिसमै सै दुसट आत्‍मा लिकरी हीं सान्‍ति सै लत्‍ता पैहरे भए ईसु के चरनौ मै बैठे भए देखो। बाको दिमाक एकदम सई हो, इस्सै बे सबई डर गए।

³⁶ जिनौनै जौ सब अपनी आँखौं सै देखो हो, उनौनै लोगौ कै बताई कै किस तरै बौ दुसट आत्‍मा को सताओ भओ आदमी कैसे अच्‍छो भओ हो।

³⁷ तब गिरासेनिओ परदेस के आस पास के सब लोग डर गए, इसताँई ईसु सै बिनती करी, कै हमरे हिंया सै चलो जा, तब ईसु बापस जानै के ताँई किसती मै चढ़ गओ।

³⁸ जिस आदमी सै दुसट आत्‍मा लिकरी हीं बौ ईसु सै बिनती करल लगो, कै मैंकै अपने संग रैहन दे, पर ईसु नै बाकै बिदा करकै कैई,

³⁹ “अपने घर मै लौहट जा और लोगौ सै कैह दे, कै परमेसर नै तेरे ताँई कैसे बड़े काम करे हैं।” बौ जाकै सैरे सैहर मै सबसै कैतो फिरो, कै ईसु नै मेरे ताँई कैसे बड़े काम करे।

मरी भई लौंड़िया और बेमार बईयर

⁴⁰ अब देखौ जब ईसु लौहटो तौ भौत से लोगौ नै बाको सुआगत करो, कैसेकै बे सबई बाको पैंड़ो देख रए हे।

⁴¹ और देखौ, याईर नाम को एक आदमी जो पिराथना घर को मुखिया हो, आओ, और ईसु के पाँऐऔं मै गिरकै उस्सै बिनती करल लगो, कै मेरे घर चल।

⁴² कैसेकै उसकी कम सै कम बारैह साल की इकलौती लौंड़िया ही, और बौ मरनै बारी ही। जब ईसु बाके घर जा रओ हो तौ रस्ता मै चारौ लंग सै भीड़ उसके ऊपर गिरी जावै ही।

⁴³ और एक बईयर नै जिसकै बारैह साल सै खून बहनै को रोग हो, जिसनै अपनी सैरी दौलत बैदौ-हकीमौ के पीछे खरच कर दई ही तौबी किसी के हात सै ठीक ना हो सकी ही।

⁴⁴ बानै पीछे सै आकै ईसु के लत्‍ता को एक धोरो छूँ लओ, उसई टैम बाको खून बहनो रुक गओ।

⁴⁵ तब ईसु नै पूँछी, “मैं किन्‍नै छुँओ?” जब सब मुकरल लगे, तौ पतरस नै कैई, “हे मालिक, सबई लोगौ नै तौ तू घेर खाओ है और तेरे ऊपर गिरे जावै हैं।”

⁴⁶ पर ईसु नै कैई, “किसी नै मैं छुँओ हौं कैसेकै मैंनै जान लओ है कै मैंसै सकति लिकरी है।”

⁴⁷ जब उस बईयर नै देखो, कै मैं छिप ना सकौ हौं, तब बौ डरती काँपती भई आई और उसके पाँऐऔं मै गिरकै सब लोगौं के सामने बताओ, कै मैंनै किस बजै सै तू छुँओ, और मैं कैसे उसई टैम ठीक हो गई।

⁴⁸ ईसु नै बासै कैई, “बेटी, तैनै बिसवास करो इसताँई तू ठीक हो गई है, सान्‍ति सै चली जा।”

⁴⁹ ईसु जौ कैई रओ हो कै, पिराथना घर के मुखिया याईर के हिंया सै कोई जौ कैनै आओ, “तेरी लौंड़िया मर गई है। अब गुरू कै और कसट मत दे।”

⁵⁰ पर जौ सुनकै ईसु नै याईर सै कैई, “मत डर, सिरप बिसवास रख, तौ बौ बच जागी।”

⁵¹ जब ईसु उस घर मै आओ तौ बानै अपने संग पतरस, यहून्‍ना, याकूब और लौंड़िया के अईया-अब्बा के अलाबा और कोई बी अपने संग भीतर ना आन दए।

⁵² और सब उस लौंड़िया के ताँई रोबा-राट कर रए हे। पर ईसु नै कैई, “मत रोबौ, बौ मरी ना है पर सो रई है।”

⁵³ पर लोगौ नै उसकी हसी उड़ाई, कैसेकै बे जानै हे कै लौंड़िया मर चुकी है।

⁵⁴ पर ईसु नै बाको हात पकड़ो, और जोर सै कैई, “ऐ लौंड़िया उठ!”

⁵⁵ तब बाके पिरान लौहट आए और बौ उसई घड़ी उठकै खड़ी हो गई, फिर ईसु नै हुकम दओ “कै बाकै कुछ खानै कै देओ जाय।”

⁵⁶ बाके अईया-अब्बा दंग रैह गए, पर ईसु नै आदेस दओ कै हिंया जो भओ है, बाके बारे मै किसी सै मत कैईयो।