लूका 7 - बुक्सा

बिसवास मै सकति

¹ जब ईसु लोगौ कै अपनी सैरी बात सुना चुको तौ, कफरनहूम सैहर मै आओ।

² बहाँ एक सैनापति हो, बाको एक नौकर इत्‍तो बेमार हो कै मरनै बारो हो, बौ नौकर सैनापति को भौत पियारो हो।

³ सैनापति नै जब ईसु के बारे मै सुनो तौ, उसनै कुछ बुजरग यहूदी मुखियौं कै जौ बिनती के संग ईसु के धौंरे भेजो, कै बौ आकै उसके नौकर की जान बचा ले।

⁴ जब बे ईसु के धौंरे पौंचे तौ बे सच्‍चे मन सै बिनती करकै कैललगे, “कै बौ इस लायक है कै तू उसके ताँई ऐंसो करै।

⁵ कैसेकै बौ हमरे लोगौं सै पियार करै है, और उसई नै हमरो पिराथना घर बनबाओ है।”

⁶ ईसु उनके संग चल दओ, पर जब ईसु सैनापति के घर सै जादा दूर ना हो, तौ सैनापति नै बाके धौंरे अपने दोस्तौ कै जौ कैनै के ताँई भेजो, “हे परभु, अपने आपकै कसट मत दे, कैसेकै मैं इस लायक ना हौं कै तू मेरे घर मै आय।

⁷ इसताँई मैंनै तेरे धौंरे आनै तक की बी ना सोची। पर तू बस बहाँ सै हुकम दे दे और मेरो नौकर ठीक हो जागो।

⁸ मैं खुद किसी अधकारी के नीचे काम कन्‍नै बारो आदमी हौं और मेरे नीचे बी कुछ सिपाई हैं। जब मैं किसी सै कैबौ हौं ‘जा’ तौ बौ चलो जावै है और जब दूसरे सै ‘आ’ तौ बौ आ जावै है। और जब मैं अपने नौकर सै कैबौ हौं, ‘जौ कर’ तौ बौ उसई कै करै है।”

⁹ ईसु नै जब जौ सुनो तौ उसकै बड़ो अचम्बो भओ, और बानै पीछे मुड़कै उस भीड़ सै जो उसके पीछे आ रई ही बोलो, “मैं तुमकै बता रओ हौं ऐंसो बिसवास मैंनै ईसराइल मै बी कहीं ना देखो।”

¹⁰ फिर भेजे भए बे लोग जब बापस घर पौंचे तौ उनौनै बौ नौकर ठीक देखो।

राँड़ के लौंड़ा कै जिन्‍दगी दान

¹¹ दूसरे दिन ईसु नाईन नाम के एक सैहर मै गओ; बाके चेला और एक बड़ी भीड़ बाके संग ही।

¹² और जैसेई बौ सैहर के फाटक के धौंरे पौंचो तौ लोग एक मुरदे कै बाहार लेकै जा रए हे, जो अपनी राँड़ अईया को इकलौतो लौंड़ा हो, और सैहर के भौत से लोग उसके संग हे।

¹³ बाकी अईया कै देखकै परभु कै बड़ो तरस आओ, और उसनै कैई, “मत रो।”

¹⁴ तब ईसु नै धौंरे आकै, अरथी छुँई, और कंधा दैनै बारे रुक गए, तब ईसु नै कैई, “ऐ जमान, मैं तेसै कैरओ हौं, उठ।”

¹⁵ तब बौ मुरदो उठ बैठो, और बोलल लगो और ईसु नै बौ उसकी अईया कै सौंप दओ।

¹⁶ इसके बाद बे सबई डर गए, और बे परमेसर की बड़ाई करकै कैललगे कै हमरे बीच मै एक बड़ो भबिसबानी कन्‍नै बारो उठो है, “और परमेसर के लोगौं की सायता कन्‍नै के ताँई आ गओ है”

¹⁷ ईसु की जौ खबर यहूदिया और आस पास के सैरे गामौ मै फैल गई।

यहून्‍ना जल संस्कार दैनै बारे को सबाल

¹⁸ और यहून्‍ना कै उसके चेलौ नै इन सब बातौं की खबर सुनाई।

¹⁹ तब यहून्‍ना नै अपने चेलौ मै सै दो कै बुलाकै परभु के धौंरे जौ पूँछनै के ताँई भेजो, कै “का आनै बारो मसी तूई है, या हम किसी और दूसरे को पैंड़ो देखैं?”

²⁰ उनौनै उसके धौंरे आकै कैई, “यहून्‍ना जल संस्कार दैनै बारे नै हम तेरे धौंरे जौ पूँछनै भेजे हैं, कै जो आनै बारो हो, बौ तूई है, या हम किसी और दूसरे को पैंड़ो देखैं?”

²¹ उसई टैम बानै भौत से रोगी ठीक करे, और उनकै कसटौ और दुसट आत्‍माऔ सै छुटकारो दिब्बाओ। और भौस्से अन्धौ कै देखनै के ताँई आँख दंई

²² और ईसु नै उनसै कैई, “जो कुछ तुमनै देखो और सुनो है, यहून्‍ना सै जाकै कै दो, कै अन्धे देख रए हैं, लंगड़े चल फिर रए हैं, कोढ़ी ठीक करे जा रए हैं, बैहरे सुन रए हैं, मरे भए जियाए जा रए हैं और कंगालौ कै अच्‍छी खबर सुनाई जा रई है।

²³ और धन्‍न है बौ, जो मेरे बजै सै ठोकर ना खाय।”

²⁴ जब यहून्‍ना को सन्‍देसो लानै बारे दूत चले गए, तौ ईसु यहून्‍ना के बारे मै लोगौ कै बताल लगो, “तुम बियाबान मै का देखनै गए हे? का हवा सै झूलती भई ढरसल कै?

²⁵ फिर तुम का देखनै गए हे? का किसी मखमली लत्‍ता पैहरे भए आदमी कै? देखौ, जो चमकीलो लत्‍ता पैहरै हैं, और सुक विलास सै रैहबैं हैं, बे तौ महलौ मै रैहबैं हैं

²⁶ तौ फिर का देखनै गए हे? का किसी भबिसबानी कन्‍नै बारे कै? हाँ, मैं तुमकै बता रओ हौं जो तुमनै देखो है बौ भबिसबानी कन्‍नै बारे सै बी बड़ो है।

²⁷ जौ बौई है जिसके बारे मै लिखो गओ है ‘देख मैं तेसै पैलेई अपनो दूत भेज रओ हौं, और बौ तेसै पैलेई रस्ता तईयार करैगो।’

²⁸ मैं तुमसै कैरओ हौं, कै जो बईयरौं सै जलमे हैं, उनमै यहून्‍ना सै बड़ो कोई ना है फिर बी परमेसर के राज को छोटो सै छोटो आदमी बी उस्सै बड़ो है।”

²⁹ तब हर किसी नै, हिंया तक की सब तरै की लगान लैनै बारौं नै बी यहून्‍ना को जल संस्कार लेकै जौ मान लओ कै परमेसर को रस्ता सच्‍चो है।

³⁰ पर फरीसिऔं और मूसा के नियमौ के जानकारौ नै उसको जल संस्कार ना लेकै अपने बारे मै परमेसर की मरजी टाल दई।

³¹ फिर ईसु बोलो “तौ फिर मैं इस पीड़ी के लोगौ की तुलना किस्सै करौं, कै बे किसके जैसे हैं?

³² बे उन बालकौ के जैसे हैं, जो बजार मै बैठे भए एक दूसरे कै बुलाकै कैबै हैं, ‘हमनै तुमरे ताँई बांसरी बजाई, पर तुम ना नाचे, हमनै तुमरे ताँई दुखी गीत गाओ, पर तुम ना रोए।’

³³ कैसेकै यहून्‍ना जल संस्कार दैनै बारो ना तौ रोटी खातो आओ, ना अंगूरौं को रस पीतो आओ, और तुम कैबौ हौ, बामै दुसट आत्‍मा है।

³⁴ आदमी को लौंड़ा, सुरग सै आओ और खावै-पीवै है; और तुम कैबौ हौ, देखौ, पेटू और पियक्‍कड़ आदमी, सब तरै की लगान लैनै बारौं और पापिऔं को दोस्त है।

³⁵ पर परमेसर के अकल के अनुसार चलनै बारे लोग परमेसर कै सच्‍चो बताबै हैं।”

पापी बईयर कै माफी मिलनी

³⁶ एक फरीसी नै ईसु कै अपने संग रोटी खानै को नौहतो दओ। फिर बौ उस फरीसी के घर मै जाकै रोटी खानै बैठो।

³⁷ और देखौ, उस सैहर की एक पापन बईयर जौ जानकै कै बौ फरीसी के घर मै रोटी खानै बैठो है, संगमरमर की सीसी मै ईत्‍तर लाई।

³⁸ और बाके पाँऐऔं के धौंरे, पीछे खड़ी होकै, रोती भई, और बाके पाँऐऔं कै असुआ सै भिजैल लगी और अपने खोपड़ी के बारौं सै पछौनल लगी, और बाके पाँऐ बेरमबेर चूमकै उनमै ईत्‍तर लगाल लगी।

³⁹ जौ देक्‍कै, “बौ फरीसी जिसनै ईसु बुलाओ हो, अपने मन मै सोचल लगो, अगर जौ भबिसबानी कन्‍नै बारो होतो तौ जान लेतो, कै जो उसकै छूँ रई है, बौ कौन और कैसी बईयर है? कैसेकै बौ तौ पापन है।”

⁴⁰ जौ सुनकै ईसु नै उसकै जबाब दओ, “समौन, मैंकै तेसै कुछ कैनो है।” बौ बोलो, “हे गुरू कैह।”

⁴¹ ईसु नै कैई, “किसी साहूकार के दो करजदार हे। एक मै उसके पाँच सौ चाँदी के सिक्‍का लिकर रए हे और दूसरे मै पचास।

⁴² कैसेकै बे करजा ना लौहटा सकै हे, इसताँई उसनै दया करकै दौनौ के करज माफ कर दए। अब बता दौनौ मै सै उस्सै जादा पियार कौन करैगो?”

⁴³ समौन नै जबाब दओ, “मेरे हिसाब सै, बौई जिसको बानै जादा करजा माफ कर दओ।” ईसु नै कैई, “तैनै ठीक जबाब दओ।”

⁴⁴ फिर उस बईयर की ओर मुड़कै बौ समौन सै बोलो, “तू जा बईयर कै देख रओ है? मैं तेरे घर मै आओ, तैनै मेरे पाँऐ धोनै के ताँई पानी बी ना दओ पर इसनै मेरे पाँऐ अपने असुआ सै तर कर दए, और फिर अपने बारौं सै पछौने।

⁴⁵ तैनै मैं चूमो तक ना, पर जब सै मैं भीतर आऔ हौं तब सै इसनै मेरे पाँऐ चूमने ना छोड़े।

⁴⁶ तैनै मेरे मूड़ मै तेल ना मिसलो; पर इसनै मेरे पाँऐऔं मै ईत्‍तर लगाओ है।

⁴⁷ इसताँई मैं तेकै कैरओ हौं कै इसको जादा पियार बता रओ है कै इसके भौस्से पाप माफ कर दए गए हैं। पर बौ जिसकै थोड़े पापौं की माफी मिली है, बौ थोड़ो पियार करैगो।”

⁴⁸ तब ईसु नै बा बईयर सै कैई, “तेरे पाप माफ कर दए गए हैं।”

⁴⁹ तब जो आदमी उसके संग रोटी खानै बैठे हे, बे अपने अपने मन मै सोचल लगे, “जौ कौन है जो पापौं कै बी माफ करै है?”

⁵⁰ तब ईसु नै बा बईयर सै कैई, “तेरे बिसवास नै तू बचा लई है, कुसल सै चली जा।”