लूका 24 - बुक्सा

ईसु को जी उठनो

¹ इतवार के दिन सकारो होतेई, बे बईयरैं उन खसबोईदार मसालौं कै जो उनौनै तईयार करे हे, कबर मै लेकै आँई।

² उनकै कबर के मौहड़े को पत्‍थर लुढ़को भओ मिलो।

³ और भीतर जाकै उनकै परभु ईसु मसी की लाहस ना मिली।

⁴ जब बे इस बात सै हैरान हो रई हीं तौ अचानक, दो आदमी चमचमाते लत्‍ता पैहरे भए उनके धौंरे आकै खड़े हो गए।

⁵ डर के मारे उन बईयरौं नै अपनी खोपड़ी जमीन की ओर झुका लई, तौ उन दो आदमिऔ नै उनसै कैई, “तुमकै जिन्‍दे कै मरे भए मै ना ढूंड़नो चँईऐ।

⁶ बौ हिंया ना है, पर जी उठो है, याद करौ, कै बानै गलील मै रैहते भए तुमसै कैई ही।

⁷ और बानै जौ कैई ही कै, ‘मैं’ आदमी के लौंड़ा कै, पापिऔं के हवाले कर दओ जानो होगो, कुरूस मै चढ़ाओ जानो और तीसरे दिन फिर जी उठनो होगो।”

⁸ तब उन बईयरौं कै ईसु की बात याद आँई।

⁹ और कबर सै लौहटकै उनौनै उन गियारै चेलौ कै, और बाकी सबकै जे बात सुनाई।

¹⁰ जिनौनै भेजे भए चेलौ सै जे बात कैंई, बे मरियम मगदलनी और योअन्‍ना और याकूब की अईया मरियम और उनके संग की और बी बईयरैं हीं।

¹¹ पर उनकी बात चेलौ कै बेकार जैसी लगीं, और उनौनै उनको बिसवास ना करो।

¹² तब पतरस कबर की ओर भाजो चलो गओ, और बानै नीचे झुक कै देखो तौ सिरप कफन को मखमली लत्‍ता दिखाई पड़ो, और जो कुछ भओ हो, बासै अचम्बो करतो भओ बापस लौहट गओ।

दो चेलौ सै ईसु की बातचीत

¹³ उसई दिन बाके चेलौ मै सै दो चेला, ऐरूसलेम सै कोई सात मील दूर बसे इम्माऊस नाम के गाम कै जा रए हे।

¹⁴ और बे इन सब बातौं कै जो भई हीं, आपस मै बातचीत करते जा रए हे।

¹⁵ और जब बे आपस मै बातचीत और पूँछताँछ कर रए हे, तबई ईसु उनके बीच मै खुदई पौंच कै उनके संग-संग चलल लगो।

¹⁶ उनौनै ईसु देखो पर पैचान ना सके, कैसेकै बाकै ना पैचान्‍नै के ताँई परमेसर नै उनकी नजर बन्‍द कर दई हीं।

¹⁷ ईसु नै उनसै कैई, “चलते चलते एक दूसरे सै तुम किन बातौं की चरचा कर रए हौ” बे चलते भए रुक गए, बे बड़े दुखी दिखाई दे रए हे।

¹⁸ उनमै सै किलिउपस नाम के एक आदमी नै बासै कैई, “सायद ऐरूसलेम मै आनै जानै बारो तू इकलोई परदेसी होगो जो पिछले दिनौ मै बात भई हैं, उनकै ना जानै है।”

¹⁹ ईसु नै उनसै पूँछी, “कौन सी बात?” उनौनै बासै कैई, “नासरत के ईसु के बारे मै है, बौ एक ऐंसो सकतिसाली आदमी हो जिसनै जो करो और कैओ बौ परमेसर और सबई लोगौं के सामने दिखा दओ कै बौ एक नबी हो।

²⁰ और हम इसई बारे मै बात कर रए हे कै हमरे मुक्‍ख पुजारिऔं और अधकारिऔं नै बौ कैसे मौत की सजा दैनै के ताँई सौंप दओ। और उनौनै बौ कुरूस मै चढ़ा दओ।

²¹ हम तौ उमीद करै हे कै बौई ईसराइल के लोगौं को छुटकारो कन्‍नै बारो है, पर इन बातौं के बीते जौ तीसरो दिन है।

²² जौ सच है कै हमरे संग की कुछ बईयरौं नै हम बड़े अचम्बे मै डार दए हैं। बे तड़के तड़के कबर के धौंरे गंई

²³ और उनकै ईसु की लाहस ना मिली। उनौनै लौहटकै कैई कै उनकै सुरगदूत दिखाई दए, जिनौनै जौ बताई कै ईसु जिन्‍दो है।

²⁴ तब हमरे सातिऔं मै सै कुछ लोग कबर मै गए, और जैसो बईयरौं नै कैओ हो, बैसोई देखो, पर उनौनै ईसु ना देखो।”

²⁵ तब ईसु नै उनसै कैई, “तुम कितने मूरख हौ; नबिऔ नै जो कुछ कैई, उसमै बिसवास कन्‍नै मै कितने कम हौ।

²⁶ जौ जरूरी हो कै मसी जे दुख उठागो और बड़ी इज्‍जत के संग सुरग मै जागो।”

²⁷ तब ईसु नै मूसा सै लेकै और दूसरे नबिऔ को जिकर करते भए, अपने बारे मै जो कुछ पबित्‍तर सास्तर मै लिखो है, बौ सब उनकै समजाओ।

²⁸ बे जब बा गाम के धौंरे आए, जहाँ जा रए हे, उनके संग ईसु नै ऐंसो बरताब करो, जैसे बाकै अग्गे जानो हो।

²⁹ चेलौ नै जौ कैह कै बासै बिनती करी, “हमरे संग रैह, साँज हो रई है और अब दिन छप गओ है” और बौ उनके संग रैहनै भीतर गओ।

³⁰ जब बौ उनके संग रोटी खानै बैठो, और बानै रोटी लेकै परमेसर को धन्‍नबाद करो, और उसकै तोड़कै उनकै देल लगो।

³¹ तब उनकी आँख खुल गंई और उनौनै बौ पैचान लओ, और बौ उनके सामने सै गायब हो गओ।

³² फिर उनौनै आपस मै कैई, “जब बौ रस्ता मै हम सै बात कर रओ हो, और पबित्‍तर सास्तर को अरथ हमकै समजाबै हो, तौ का हमरे मन मै भौत जोस पैदा ना हो रओ हो?”

³³ फिर बे तुरन्‍त खड़े भए और बापस ऐरूसलेम सैहर कै चल दए। बहाँ उनकै गियारै चेला और उनके साती इखट्‍टे मिले।

³⁴ बे जौ कैरए हे, “परभु सचमुच जी उठो है, और समौन कै दिखाई दओ है।”

³⁵ फिर उन दौनौ नै रस्ता मै जो भओ हो बे सब बात उनकै बता दंई और जौ बी कै उनौनै ईसु कै रोटी तोड़ते टैम कैसे पैचान लओ हो।

ईसु को अपने चेलौ कै दरसन देनो

³⁶ अबी बे उनकै जे बात बताई रए हे कै ईसु उनके बीच मै आकै खड़ो हो गओ, और उनसै बोलो, “तुमकै सान्‍ति मिलै।”

³⁷ पर बे घबरा गए, और डर गए, और समजे कै हम किसी भूत कै देख रए हैं।

³⁸ पर बौ उनसै बोलो, “तुम ऐंसे घबराए भए काए हौ? तुमरे मनौ मै संका काए उठ रई है?

³⁹ मेरे हातौ और पाँऐऔं कै देखौ, कै मैं बौई हौं; मैंकै छूँकै देखौ, कैसेकै किसी भूत के मांस और हड्‍डी ना होवै हैं, और जैसो कै तुम देख रए हौ कै, मेरे बे हैं।”

⁴⁰ जौ कैते भए उसनै अपने हात और पाँऐ उनकै दिखाए।

⁴¹ पर अपने खुसी के मारे बे अब बी बिसवास ना कर सके। बे अचम्बे मै पड़ गए, तौ ईसु नै उनसै कैई, “का तुमरे धौंरे कुछ खानै कै है?”

⁴² उनौनै ईसु कै भुजी भई मच्‍छी को एक टुकड़ा दओ।

⁴³ बानै लेकै उनके सामने खाओ।

⁴⁴ फिर बानै उनसै कैई, “जे मेरी बेई बात हैं, जो मैंनै तुमरे संग रैहते भए तुमसै कैई हीं, कै जरूरी है कै जितनी बात मूसा के नियम और नबिऔ और भजनौ की किताबौ मै, मेरे बारे मै लिखी हैं, सब पूरी हौं।”

⁴⁵ फिर पबित्‍तर सास्तरौं कै समजनै के ताँई बानै उनको दिमाक खोल दओ।

⁴⁶ और उनसै कैई, “ऐंसो लिखो है, कै मसी दुख उठागो, और तीसरे दिन मरे भए मै सै जी उठैगो।

⁴⁷ और ऐरूसलेम सैहर सै लेकै सैरी दुनिया के लोगौं मै मन फिरानै को और पापौं की माफी को सन्देस, बाईके नाम सै करो जागो।

⁴⁸ तुम इन सब बातौं के गभा हौ।

⁴⁹ और देखौ, जिस पबित्‍तर आत्‍मा को बादो मेरे अब्बा नै करो है, उसकै मैं तुमरे ताँई भेजंगो और जब तक तुम सुरग सै सकति कै पा ना लो, तब तक तुम इसई सैहर मै रुके रैहईओ।”

ईसु को सुरग मै उठाओ जानो

⁵⁰ तब बौ सैहर के बाहार उनकै बैतनिया तक ले गओ, और अपने हात उठाकै उनकै आसीरबाद दओ।

⁵¹ और उनकै आसीरबाद देते भए बौ उनसै अगल हो गओ और सुरग मै उठा लओ गओ।

⁵² और बे उसकै झुक कै परनाम करकै बड़ी खुसी सै ऐरूसलेम सैहर कै लौहट गए।

⁵³ और मन्‍दर मै परमेसर की बड़ाई करते भए बे अपनो बखत बिताल लगे।