लूका 23 - बुक्सापीलातुस दुआरा ईसु सै पूँछताँछ ( मत्ती 27:1 , 2 , 11–14 ; मरकुस 15:1–5 ; यहून्ना 18:28–38 ) 1 तब सैरे पंचात के लोग उठकै ईसु कै पीलातुस के धौंरे ले गए। 2 और बे जौ कैह कै, उसमै दोस लगाल लगे, “जौ हमरे लोगौं कै बहकाते भए कैबै है कै कैसर समराट कै लगान मत देईओ और कैबै है कै मैंई मसी राजा हौं इसताँई हमनै जौ पकड़ो।” 3 इस बात मै पीलातुस नै ईसु सै पूँछी, “का तूई यहूदिऔं को राजा है?” ईसु नै जबाब दओ, “तैनैई कैई है।” 4 तब पीलातुस नै मुक्ख पुजारिऔं और लोगौं सै कैई, “मैंकै इस आदमी मै कोई बी दोस दिखाई ना देरओ है।” 5 पर बे जौ कैते भए दबाब डारते रैहए, “जानै पूरे यहूदिया परदेस मै लोग अपने उपदेस सै भड़काए हैं। जौ इसनै गलील परदेस मै सुरू करो हो और अब हिंया तक आ पौंचो है।” ईसु कै हेरोदेस के धौंरे भेजो जानो 6 जौ सुनकै पीलातुस नै पूँछी, “का जौ आदमी गलील परदेस को है?” 7 फिर जब बाकै जौ पतो चलो कै बौ हेरोदेस की रियासत को है, तौ उसनै ईसु कै हेरोदेस के धौंरे भेज दओ, उन दिनौ मै, बौ बी ऐरूसलेम सैहर मैई हो। 8 हेरोदेस ईसु कै देक्कै भौतई खुस भओ, कैसेकै बौ भौत टैम सै ईसु कै देखनो चाँहै हो: कैसेकै बौ उसके बारे मै सुन चुको हो और ईसु के दुआरा करे गए कुछ चमत्कारी कामौ कै देखनो चाँहै हो। 9 उसनै ईसु सै कई सबाल पूँछे पर ईसु नै बाकै कोई जबाब ना दओ। 10 तब मुक्ख पुजारिऔं और यहूदी सास्तरी बहीं खड़े होकै पूरे जोस के संग ईसु के ऊपर इलजाम लगा रए हे। 11 फिर हेरोदेस नै अपने सिपाईऔं के संग, मजाक उड़ाओ और मजाक मै राजा लोग पैहरनै बारे चमकीले लत्ता पैहराकै पीलातुस के धौंरे भेज दओ। 12 और इस्सै पैले पीलातुस और हेरोदेस एक दूसरे के दुसमन हे, पर उसई दिन सै बे दौनौ दोस्त हो गए। ईसु कै मौत की सजा सुनानो ( मत्ती 27:15–26 ; मरकुस 15:6–15 ; यहून्ना 18:39—19:16 ) 13 फिर पीलातुस नै मुक्ख पुजारिऔं, यहूदी नेताऔं और लोगौं कै एक संग बुलबाओ। 14 और उसनै उनसै कैई, “तुम इसकै लोगौं कै भड़कानै बारे एक आदमी के रूप मै मेरे धौंरे लाए हौ। और देखौ मैंनै हिंया तुमरेई सामने इसकी जाँच पड़ताल करी है। और तुमनै इसके ऊपर जो इलजाम लगाए हैं ऐंसो कोई बी इलजाम मैंकै दिखाई ना देओ है। 15 और हेरोदेस कै बी कोई गलती दिखाई ना दई। इसताँई उसनै, उसकै सजा ना देकै बापस हमरे धौंरे भेज दओ है। और देखौ इसनै ऐंसो कुछ बी काम ना करो है कै इसकै मौत की सजा देई जाय। 16 इसताँई मैं उसकै कोड़ा लगबाकै छोड़ दंगो।” 17 (उन दिनौ फसै तौहार मै पीलातुस कै एक कैदी रिहा कन्नो पड़ै हो।) 18 पर बे सब एक संग चिल्लाए, “जा आदमी कै मार डारौ। और हमरे ताँई बरअब्बा कै छोड़ दो।” 19 बरअब्बा कै, सैहर मै दंगा फसाद और खून कन्नै के जुरम मै जेल मै डारर खाओ हो। 20 पर पीलातुस नै ईसु कै छोड़नै की मरजी सै लोगौं सै फिर कैई। 21 पर बे नारे लगाते रैहए, “इसकै कुरूस मै चढ़ा दो, इसकै कुरूस मै चढ़ा दो।” 22 पीलातुस नै उनसै तीसरी दफै पूँछी, “पर इस आदमी नै का जुरम करो है? मैंकै इसके खिलाप कोई बात ना मिली है, जो इसकै मौत की सजा सुनाऔं। इसताँई मैं कोड़ा लगबाकै इसकै छोड़ दंगो।” 23 पर बे चिल्ला-चिल्लाकै पीछे पड़ गए, कै बौ कुरूस मै चढ़ाओ जाय, आखरी मै उनको चिल्लानोई जीत गओ। 24 पीलातुस नै फैसला दे दओ कै उनकी माँग मान लई जाय। 25 पीलातुस नै बौ आदमी छोड़ दओ जो दंगा फसाद और खून कन्नै के जुरम मै जेल मै डारो गओ हो जौ बौई हो जिसकै छोड़ दैनै की बे माँग कर रए हे और ईसु उनके हातौ मै सौंप दओ, कै बे जैसो चाँहै, बैसो करैं। ईसु को कुरूस मै चढ़ाओ जानो ( मत्ती 27:32–44 ; मरकुस 15:21–32 ; यहून्ना 19:17–27 ) 26 जब सिपाई ईसु कै ले जा रए हे तौ उनौनै कुरैन सैहर के रैहनै बारे समौन नाम के एक आदमी कै, जो अपने खेतौ सै आ रओ हो, पकड़ लओ और उसके ऊपर कुरूस लाद कै बौ ईसु के पीछे-पीछे चलनै कै मजबूर करो। 27 और लोगौं की एक बड़ी भीड़ उसके पीछे चल रई ही। इसमै कुछ ऐंसी बईयरैं बी हीं, जो भौत दुख के संग उसके ताँई रो रईं हीं। 28 ईसु उनकी ओर मुड़ो और बोलो, “ऐरूसलेम सैहर मै रैहनै बारी बईयरौं, मेरे ताँई मत रोबौ; पर अपने ताँई और अपने बालकौ के ताँई रोबौ। 29 कैसेकै ऐंसे दिन आ रए हैं जब लोग कैंगे, ‘किसमतबारी हैं, बे बईयरैं जो बाँज हैं और किसमतबारी है बौ कोख जिसनै किसी कै कबी जलमई ना दओ। और किसमतबारी हैं बे जिसके इस्तनौ नै कबी दूदई ना पिबाओ। 30 और उस टैम भयानक घटनाऔं सै बच जानै के ताँई लोग पहाड़ौ सै कैंगे, हमरे ऊपर गिर पड़ौ’ और टीलौं सै कैंगे हमकै ढक लो। 31 कैसेकै ‘मैं’ हरे पेड़ जैसे हौं, फिर बी लोग मेरे ऊपर ऐंसो कर रए हैं, तौ जो सूके पेड़ हैं उनको का होगो?” 32 दो और आदमी, जो दौनौई अपरादी हे, बाके संग मौत की सजा के ताँई बाहार ले जाय जा रए हे। 33 फिर बे खोपड़ी नाम की जघै मै आए, और बहाँ ईसु कै और उन दो अपरादिऔं कै कुरूस मै चढ़ाओ। उन अपरादिऔं मै सै एक ईसु के खाने हात की ओर और दूसरो बाँई हात की ओर चढ़ाओ 34 तब ईसु नै कैई, “हे पिता, इनकै माफ कर, कैसेकै जे ना जानै हैं कै, का कर रए हैं।” तब उनौनै परची डारकै ईसु के लत्ता आपस मै बाँट लए 35 तब लोग खड़े खड़े देख रए हे, यहूदी अधकारी जौ कैते भए बाकी मजाक उड़ा रए हे, “जानै दूसरे लोग बचाए। अगर जौ परमेसर को चुनो भओ मसी है, तौ अपने आपकै बचाय।” 36 सिपाईऔं नै बी उसकी मजाक बनाई, और खट्टो अंगूर को रस देते भए बोले, 37 “अगर तू यहूदिऔं को राजा है, तौ अपने आपकै बचा।” 38 और ईसु के कुरूस के ऊपर एक तक्ती लगाई गई ही, जिसमै लिखो हो “जौ यहूदिऔं को राजा है।” 39 बहाँ लटकाए गए अपरादिऔं मै सै एक नै ईसु की बेजती करते भए कैई, “का तू मसी ना है? तौ अपने आपकै और हमकै बी बचा।” 40 पर दूसरे नै उस पैले अपरादी कै डाँट लगाते भए कैई, “का तू परमेसर सै ना डरै है? तेकै बी तौ बौई सजा मिल रई है। 41 हमकै तौ नियाय के हिसाब सै सजा मिली है, कैसेकै हम तौ अपनी करनी को फल भोग रए हैं, पर जानै कोई बी अपराद ना करो है।” 42 फिर बानै ईसु सै कैई, “ईसु जब तू अपने राज मै आय तौ मैंकै याद रखिए।” 43 ईसु नै उस्सै कैई, “मैं तेसै सच कैरओ हौं, आजई तू मेरे संग सुरग लोक मै होगो।” ईसु की मौत ( मत्ती 27:45–56 ; मरकुस 15:33–41 ; यहून्ना 19:28–30 ) 44 और तकरीबन दिन के बारैह बजे सै तीन बजे तक सैरी दुनिया मै इन्धेरो छा गओ। 45 सूरज बी ना चमक रओ हो। उतै मन्दर मै परदा फटकै दो टुकड़ा हो गए। 46 ईसु ऊँची अबाज मै बोलो, “हे पिता, मैं अपनी आत्मा तेरे हातौ मै सौंप रओ हौं।” और इतनो कैह कै अपने पिरान छोड़ दए। 47 जब रोमी सैनापति नै, जो कुछ भओ हो देखो तौ परमेसर की बड़ाई करते भए बोलो, “जौ जरूर एक धरमी आदमी हो।” 48 जब बहाँ देखनै आए इखट्टे लोगौं नै, जो कुछ भओ हो, देखो तौ अपनी छाती पीटते भए लौहट गए। 49 पर बे सबई जो बाकै जानै हे, उन बईयरौं समेत, जो गलील सै बाके पीछे-पीछे आ रई हीं, इन बातौं कै कुछ दूर सै खड़े होकै देख रए हे। ईसु कै दफनानो ( मत्ती 27:57–61 ; मरकुस 15:42–47 ; यहून्ना 19:38–42 ) 50 अब बहीं यूसप नाम को एक आदमी हो जो यहूदी महासभा को एक सदस्य हो। बौ एक अच्छो धरमी आदमी हो। 51 बौ पंचात की योजना और उनकी धोकेबाजी सै सैहमत ना भओ हो। बौ यहूदिया के अरमतिआ सैहर को रैहनै बारो हो। और परमेसर के राज को पैंड़ो देख रओ हो। 52 बानै पीलातुस के धौंरे जाकै ईसु की लाहस माँगी। 53 बानै लाहस कुरूस सै नीचे उतारी और मखमल के बढ़िया रेसम सै बने लत्ता मै लपेटी, और चट्टान मै खुदी भई एक कबर मै रक्खी, जिसमै पैले कोई बी ना रक्खो गओ हो। 54 बौ दिन सुक्कर को हो और सब्त को दिन सुरू होनै बारो हो। 55 बे बईयरैं जो गलील सै ईसु के संग आई हीं, यूसप के पीछे हो लंई। उनौनै बौ कबर देखी, और देखो कै बाकी लाहस कबर मै कैसे रक्खी गई। 56 फिर उनौनै घर लौहटकै खसबोईदार चीजौ और लेप तईयार करे। सब्त के दिन नियम के अनुसार उनौनै आराम करो। |
New Life Compute Institute [NLCI] - CC BY-NC-ND 4.0