लूका 20 - बुक्साईसु सै यहूदिऔं को एक सबाल ( मत्ती 21:23–27 ; मरकुस 11:27–33 ) 1 एक दिन जब ईसु मन्दर मै लोगौं कै उपदेस देते भए अच्छी खबर सुना रओ हो, तौ मुक्ख पुजारिऔं और यहूदी सास्तरिऔं बुजरग यहूदी नेताऔं के संग उसके धौंरे आए। 2 और कैललगे, “कै हमकै बता, तू इन कामौ कै किनके हक सै करै है? और बौ कौन है जिसनै तेकै जौ हक दओ है?” 3 ईसु नै उनकै जबाब दओ, “मैं बी तुमसै एक बात पूँछौं हौं; तुम मैंकै बताऔ। 4 यहून्ना को जल संस्कार परमेसर की ओर सै हो या आदमिऔ की ओर सै?” 5 तब बे आपस मै कैललगे कै, “अगर हम कैंगे परमेसर की ओर सै, तौ बौ कैगो; फिर तुमनै बाके बचन मै काए ना बिसवास करो? 6 और अगर हम कैंगे, आदमिऔ की ओर सै, तौ सब लोग हमरे ऊपर पत्थर मारंगे, कैसेकै बे सच्ची मै जानै हे, कै यहून्ना परमेसर की भबिसबानी कन्नै बारो हो।” 7 तौ उनौनै जबाब दओ, हम ना जानते, कै बौ किसकी ओर सै हो। 8 ईसु नै उनसै कैई, “तौ मैं बी तुमकै ना बतातो, कै मैं जौ काम किस हक सै कर रओ हौं।” दुसट किसानौ की दासतान ( मत्ती 21:33–46 ; मरकुस 12:1–12 ) 9 ईसु फिर लोगौ सै एक दासतान कैललगो, “कै किसी आदमी नै अंगूर को बगीचा लगाओ, और कुछ किसानौ कै उसको ठेका दे दओ, और भौत दिनौ के ताँई परदेस चलो गओ। 10 जब अंगूर पकनै को टैम आओ, तौ बानै अपनो एक नौकर किसानौ के धौंरे भेजो, कै बे अंगूर के बगीचा के ठेका को हिस्सा उसकै दैं, पर किसानौ नै नौकर पीटकै खाली हात लौहटा दओ। 11 फिर उसनै एक और नौकर भेजो, पर उनौनै बाकी बी पिटाई कर डारी, और उसकी बेजती करी और बौ बी खाली हात बापस लौहटा दओ। 12 फिर उसनै तीसरो नौकर भेजो पर उनौनै बौ बी अदमरो करकै बाहार फैंक दओ। 13 तब अंगूर के बगीचा के मालिक नै कैई, ‘मैं का करौं? मैं अपने पियारे लौंड़ा कै भेजंगो, कै बे उसको आदर करैं।’ 14 ऐंसो सोचकै बानै अपनो लौंड़ा भेजो, पर किसानौ नै बाको लौंड़ा देखो तौ बे सब आपस मै सोचल लगे, कै जौ तौ बारिस आ रओ है; आऔ हम उसकै मार डारै, जिस्सै जाको बगीचा हमरो हो जाय। 15 और उनौनै बौ बगीचा सै बाहार खदेड़ कै मार डारो। “तौ फिर अब बगीचा को मालिक उनके संग का करैगो? 16 बौ आकै उन किसानौ कै मार डारैगो, और अंगूरौं को बगीचा दूसरौं कै सौंप देगो।” लोगौं नै जब ऐंसो सुनो तौ बे बोले, “ऐंसो कबी ना हो।” 17 तब ईसु उनकी ओर देखते भए बोलो, “फिर जौ का, लिखो है, जो पत्थर राजमिस्तरिऔ नै बेकार समज लओ हो बौई कौने को खास पत्थर बन गओ। 18 जो कोई उस पत्थर के ऊपर गिरैगो उसके टुकड़ा-टुकड़ा हो जांगे और जिसके ऊपर बौ पत्थर गिरैगो बौ चकनाचूर हो जागो।” ( मत्ती 22:15–22 ; मरकुस 12:13–17 ) 19 उसई टैम यहूदी सास्तरिऔं और मुक्ख पुजारिऔं नै बौ पकड़नो चाँहो, कैसेकै बे समज गए कै बानै जौ दासतान हमरे बिरोद मै कैई है, पर बे लोगौं सै डर गए। यहूदी नेताऔं की चाल 20 इसताँई बे उसकी ताख मै लगे और जासूस बी भेजे, कै धरमी को भेस धरकै ईसु की कोई ना कोई बात पकड़ैं, और उसकै किसी बात मै फसाकै रोमी राजपाल के हात मै सौंप दैं। 21 उनौनै जाकै उस्सै जौ पूँछी कै, “हे गुरू, हम जानै हैं कै तू ठीक कैबै है, और सिकाबै बी है, और किसी को भेदभाब बी ना करै है, पर परमेसर की मरजी कै सच्चाई सै सिकाबै है। 22 का हमकै परमेसर के नियम के अनुसार कैसर कै लगान देनो सई है, कै ना?” 23 ईसु उनकी चाल कै समज गओ हो, तौ बानै उनसै कैई, 24 “मैंकै एक चाँदी को सिक्का दिखाओ, इसमै किसकी मूरत और नाम है?” उनौनै कैई, “कैसर को।” 25 इस बात मै बानै उनसै कैई, “तौ फिर जो कैसर को है, बाकै कैसर कै दो और जो परमेसर को है उसकै परमेसर कै दो।” 26 बे ईसु के जबाब सै अचम्बे मै पड़ गए और चुप रैहए और बानै लोगौ के सामने जो कुछ कैओ हो, उस बात मै बे उसकै पकड़ ना सके। मर कै जिन्दे होनै के बारे मै सदूकिऔं को सबाल ( मत्ती 22:23–33 ; मरकुस 12:18–27 ) 27 सदूकी जो कैबै हैं, कै मरे भओ को जी उठनो हैई ना, उनमै सै कई सदूकिऔं नै बाके धौंरे आकै पूँछी। 28 “गुरूजी, मूसा के नियम सास्तर मै इस तरै सै लिखो है कै, ‘अगर किसी को बिहालो भईया बिना औलाद के मर जाय तौ बाकी बईयर सै बाको छोटो भईया बिहा करकै अपने भईया के ताँई, उस बईयर सै बालक पैदा करै।’ 29 एक गाम मै सात भईया हे, पैलो भईया बिहा करकै बिना औलाद करे मर गओ। 30 फिर दूसरे और तीसरे नै बी उस बईयर सै बिहा कर लओ। 31 इस तरै सै सातौं भईया बिना औलाद करे मर गए। 32 और सबके बाद बौ बईयर बी मर गई। 33 अब बताऔ, जी उठनै मै बौ उनमै सै किसकी बईयर होगी, कैसेकै बौ तौ सातौं की बईयर हो चुकी ही।” 34 तब ईसु नै उनसै कैई, “कैसेकै इस दुनिया मै जीनै बारे लोग बिहा करैं हैं और बिहा करकै बिदा होवै हैं। 35 पर मरे भएऔं मै सै जी उठनै और आनै बारे नए युग मै रैहनै के ताँई जिन लोगौं कै परमेसर लायक बनागो, उनके बीच मै बिहा-सादी ना हौंगे। 36 बे फिर मरनै के बी ना हैं, कैसेकै बे सुरगदूतौं के जैसे हौंगे, और मरे भए मै सै जी उठनै सै परमेसर की बी औलाद हौंगे। 37 पर इस बात को, कै मरे भए मै सै जी उठै हैं, मूसा नै बी झाँड़ी की कथा मै इसके ओर इसारो करो है, जहाँ बौ परभु कै इब्राहिम को परमेसर, इसहाक को परमेसर, और याकूब को परमेसर कैबै है। 38 परमेसर तौ मुरदौं को ना पर जिन्देऔं को परमेसर है। कैसेकै बाके ताँई सब जिन्दे हैं।” 39 तब जौ सुनकै कुछ यहूदी सास्तरिऔं नै कैई कै “हे गुरू, तैनै अच्छी बात कैई।” 40 इसके बाद उनकै ईसु सै और कोई सबाल पूँछनै की हिम्मत ना भई। मसी किसको लौंड़ा है? ( मत्ती 22:41–46 ; मरकुस 12:35–37 ) 41 ईसु नै उनसै कैई, “बे कैबै हैं कै मसी दाऊद को लौंड़ा है। जौ कैसे हो सकै है? 42 कैसेकै भजन किरतन की किताब मै दाऊद खुद कैबै है, ‘परभु परमेसर नै मेरे परभु सै कैई, मेरे खाने हात बैठ, 43 जब तक मैं तेरे दुसमनौ कै तेरे पाँऐ रखनै की पिड़िया ना बना दौं।’ 44 इसताँई जब दाऊद मसी कै ‘परभु’ कैबै है तौ मसी दाऊद को लौंड़ा कैसे हो सकै है?” यहूदी सास्तरिऔं के बिरोद मै ईसु की चितौनी ( मत्ती 23:1–36 ; मरकुस 12:38–40 ) 45 जब सब लोग सुन रए हे, तौ बानै अपने चेलौ सै कैई। 46 “यहूदी सास्तरिऔं सै चौकस रैहऔ। बे लम्बे लम्बे लत्ता पैहरकै टैहलनै लिकरै हैं, और बजारौं मै परनाम सुन्नो, और यहूदी पिराथना घरौं मै उनकै सबसै जादा खास जघै, और दाबतौं मै आदर बारी जघै चाँहै हैं। 47 बे राँड़ौ कै फसाकै उनको घर लूट लेबै हैं, और दिखानै के ताँई बड़ी लम्बी-लम्बी और देर तक पिराथना करते रैहबैं हैं: परभु इनकै भौत डन्ड देगो।” |
New Life Compute Institute [NLCI] - CC BY-NC-ND 4.0