लूका 18 - बुक्सा

राँड़ बईयर और अधरमी जज की दासतान

¹ फिर ईसु नै उनकै जौ बतानै के ताँई कै बे लगातार पिराथना करते रैंह और हिम्मत ना हारैं, जौ दासतान सुनाई:

² ईसु बोलो “किसी सैहर मै एक जज रैहए करै हो। बौ ना तौ परमेसर सै डरै हो और नाई किसी आदमी की परवा करै हो।

³ उसई सैहर मै एक राँड़ बी रैहए करै ही। और बौ उसके धौंरे बेरमबेर आकै कैबै ही, मेरो नियाय कर।

⁴ पर लम्बे टैम तक तौ बौ जज आनाकानी करतो रैहओ पर आखरी मै उसनै अपने मन मै सोचो, ‘ना तौ मैं परमेसर सै डरौ हौं और ना लोगौं की परवा करौं हौं।’

⁵ तौबी जौ राँड़ मैंकै सताती रैहबै है, इसताँई मैं इसको फैसला करंगो कहीं ऐंसो ना हो कै जौ बेरमबेर आकै मेरे नाख मै दम ना कर दे।”

⁶ परभु ईसु नै कैई, “सुनौ, कै बौ अधरमी जज का कैबै है?

⁷ इसताँई का परमेसर अपने चुने भओ को फैसला ना करैगो, जो रात-दिन उसकी दुहाई देते रैहबैं हैं? का बौ उनके बारे मै देर करैगो?

⁸ मैं तुमसै कैरओ हौं; परमेसर तुरन्‍त उनको फैसला करैगो; तौबी जब आदमी को लौंड़ा बापस आगो, तौ का धरती के ऊपर भौत लोगौ कै बिसवास करते देखैगो?”

फरीसी और लगान लैनै बारे की दासतान

⁹ फिर ईसु नै उन लोगौ के ताँई बी जो अपने आपकै धरमी समजै हे, और किसी कै कुछ ना समजै हे, जौ दासतान सुनाई।

¹⁰ “एक दिन दो आदमी मन्‍दर मै पिराथना कन्‍नै के ताँई गए; एक फरीसी हो और दूसरो सब तरै की लगान लैनै बारो हो।

¹¹ बौ फरीसी अगल खड़ो होकै जौ पिराथना करल लगो, ‘हे परमेसर, मैं तेरो धन्‍नबाद करौं हौं कै मैं दूसरे लोगौं जैसो लालची, ठग और दूसरी बईयरौं सै गलत काम कन्‍नै बारो बी ना हौं, और ना इस लगान लैनै बारे के जैसो हौं।

¹² मैं हप्‍ता मै दो फेरी बरत रक्‍खौं हौं; और मैं अपनी सब कमाई को दसमो हिस्सा बी देवौ हौं।’

¹³ “पर लगान लैनै बारे नै दूर खड़े होकै, हिंया तक कै सुरग की ओर अपनी आँख तक ना उठांई, और अपनी छाती पीटते भए बोलो, ‘हे परमेसर, मैं पापी हौं मेरे ऊपर दया कर और मैंकै माफ कर दे।’”

¹⁴ फिर ईसु नै उनसै कैई, “जौई आदमी परमेसर की नजर मै धरमी होकै अपने घर लौहटो। ना कै बौ फरीसी कैसेकै जो कोई आदमी अपने आपकै बड़ो बनागो, बौ छोटो करो जागो; और जो अपने आपकै छोटो बनागो, बौ बड़ो करो जागो।”

छोटे बालकौ के जैसे नमर बनौ

¹⁵ फिर लोग अपने छोटे बालकौ कै बी उसके धौंरे लाललगे, कै बौ उनके ऊपर हात रक्‍खै; और चेलौ नै जौ देखकै उनकै डाँट लगाई।

¹⁶ ईसु नै बालकौ कै अपने धौंरे बुलाकै कैई, “बालकौ कै मेरे धौंरे आन दो, और उनकै मनैह मत करौ: कैसेकै जो लोग ऐंसे छोटे बालकौ जैसे अपने आपकै नमर बनांगे बेई परमेसर के राज के भागीदार बन सकंगे।

¹⁷ मैं तुमसै सच कैरओ हौं, कै जो कोई परमेसर के राज कै बालकौ के हाँई गिरैहन ना करैगो बौ उसमै कबी जा ना पागो।”

एक सेट कै ईसु सै सबाल

¹⁸ फिर किसी यहूदी नेता नै ईसु सै पूँछी, “ओ अच्‍छे गुरू, हमेसा की जिन्‍दगी पानै के ताँई मैंकै का कन्‍नो चँईऐ?”

¹⁹ ईसु नै उस्सै कैई, “तू मैंकै अच्‍छो काए कैबै है? सिरप परमेसर कै छोड़कै और कोई बी अच्‍छो ना है।

²⁰ तू परमेसर के हुकमौ कै तौ जानै है, कै बईयरौं के संग गलत काम मत कर, खून ना कर, चोरी मत कर, झूँटी गभाई मत दे, और अपने अब्बा और अईया को आदर कर।”

²¹ बौ यहूदी नेता बोलो, “मैं इन सब बातौं कै तौ बालक सैई करतो आँऔं हौं।”

²² जौ सुन ईसु नै उस्सै कैई, “तैमै अबी बी एक बात की कमी है, अपनो सब कुछ बेचकै बौ पैसा गरीबौ मै बाँट दे; इस्सै तेकै सुरग मै धन मिलैगो।”

²³ जब उस यहूदी नेता नै जौ सुनी तौ बौ भौत दुखी भओ, कैसेकै बौ भौत सेट हो।

²⁴ ईसु नै जब जौ देखो कै बौ भौत दुखी है तौ उस्सै कैई, “जो आदमी अपने धन-दौलत के ऊपर भरोसो रक्‍खै है, बाको परमेसर के राज मै भीतर जानो कितनो मुसकल है।

²⁵ हाँ, किसी ऊँट के ताँई सूंई के छेद मै सै लिकन्‍नो तौ सरल है पर किसी सेट को परमेसर के राज मै भीतर जानो भौत मुसकल है।”

किसकै मुक्‍ति मिलैगी

²⁶ और सुन्‍नै बारौं नै कैई, “तौ फिर कौन बच सकै है?”

²⁷ ईसु नै कैई, “जो आदमी सै ना हो सकै है, बौ परमेसर सै हो सकै है।”

²⁸ फिर पतरस नै कैई, “देख, हम तौ घर-बार छोड़कै तेरे पीछे चल पड़े हैं।”

²⁹ तब ईसु उनसै बोलो, “मैं तुमसै सच कैरओ हौं, जिसनै परमेसर के राज के ताँई घर-बार या बईयर या भईया और बहन या अईया-अब्बा या बाल-बच्‍चे छोड़ दए हौं।

³⁰ और इसई टैम मै भौत कुछ मिलैगो और आनै बारे युग मै, उसकै सुरग मै हमेसा की जिन्‍दगी बी मिलैगी।”

ईसु मर कै जी उठैगो

³¹ फिर ईसु उन बारैह चेलौ कै संग ले जाकै उनसै बोलो; देखौ, “हम ऐरूसलेम सैहर कै जा रए हैं, और जितनी बात मेरे बारे मै परमेसर की भबिसबानी कन्‍नै बारौं के दुआरा लिखी गई हैं बे सब पूरी हौंगी।

³² कैसेकै बौ गैर यहूदिऔं के हातौ मै सौंपो जागो, और बे उसकी मजाक उड़ांगे; और उसकी बेजती करंगे, और उसके ऊपर थूकंगे।

³³ और उसकै कोड़ा मारंगे, और मार डारंगे, लेकन बौ तीसरे दिन जिन्‍दो उठ जागो।”

³⁴ और चेलौ नै इन बातौं मै सै कोई बात ना समजी और जौ बात उनमै छिपी रैहई, और जो कैओ गओ हो बौ उनकी समज मै ना आओ।

अन्धे भिकारी को देखनो

³⁵ जब ईसु यरीहो सैहर के धौंरे पौंचो, तौ एक अन्धो आदमी सड़क के किनारे बैठो भओ भीक माँग रओ हो।

³⁶ जब अन्धे नै अपने धौंरे सै भीड़ की चलनै की अबाज सुनी तौ उसनै पूँछी, “जौ का हो रओ है?”

³⁷ लोगौं नै उसकै बताई, “नासरत सैहर को ईसु जा रओ है।”

³⁸ तब उसनै चिल्‍लाकै कैई, “हे ईसु, दाऊद के बंस, मेरे ऊपर दया कर।”

³⁹ बे जो अग्गे चल रए हे, उसकै डाँटल लगे कै चुप रैह; पर बौ और बी जोर सै चिल्‍लाल लगो, “हे दाऊद की औलाद, मेरे ऊपर दया कर।”

⁴⁰ तब ईसु रुक गओ उसनै हुकम दओ कै, “उस अन्धे कै मेरे धौंरे लाओ जाय।” और जब बौ उसके धौंरे आओ, तौ ईसु नै उस्सै जौ पूँछो,

⁴¹ “तू का चाँहै है, कै मैं तेरे ताँई करौं?” उसनै कैई, “हे परभु, मैं फिर सै देखनो चाँहौ हौं।”

⁴² ईसु नै कैई, “देखल लग, तैनै मेरे ऊपर बिसवास करो है, इसताँई तू ठीक हो गओ है।”

⁴³ और बौ तुरन्‍त देखल लगो, और परमेसर की बड़ाई करतो भओ उसके पीछे हो लओ, और सब लोगौ नै देखकै परमेसर की बड़ाई करी।