लूका 14 - बुक्सा

फरीसी के घर मै ईसु

¹ एक दफै ईसु फिर आराम कन्‍नै बारे दिन फरीसिऔं के सरदारौं मै सै किसी एक के घर मै रोटी खानै गओ और बे उसकी ताख मै हे कै कब गलती करै।

² और देखौ, एक आदमी उसके सामने हो, जिसकै हात-पाँऐ फूलनै बारी बेमारी ही।

³ तब ईसु यहूदी सास्तरिऔं और फरीसिऔं सै बोलो कै, “आराम कन्‍नै बारे दिन नियम के अनुसार किसी कै ठीक कन्‍नो अच्‍छो है, कै ना?” पर बे चुप रैहए।

⁴ तब ईसु नै बौ हात सै छूँकै ठीक कर दओ और बहाँ सै जान दओ।

⁵ फिर बानै उनसै कैई, “कै तुम्मै सै ऐंसो कौन है, जिसको लौंड़ा या बैल कुँआ मै गिर जाय, तौ का आराम कन्‍नै बारे दिन तुम उसकै बाहार ना लिकारौगे?”

⁶ बे इन बातौं को कोई जबाब ना दे सके।

पौंहनेऔ की खातरदारी और नमरता

⁷ कैसेकै ईसु नै जौ देखो कै पौंहने लोग अपने बैठनै के ताँई इज्जतदार जघै चुन रए हे, तौ बानै एक दासतान सुनाई। और बोलो,

⁸ “जब तुमकै कोई बिहा की दाबत मै बुलाए तौ बहाँ किसी आदर बारी जघै मै मत बैठिओ। कैसेकै हो सकै है कै बहाँ कोई तुमसै जादा बड़ो आदमी बानै बुलार खाओ होए।

⁹ फिर तुम दौनौ कै बुलानै बारो तुमरे धौंरे आकै तुमसै कैगो, ‘अपनी जौ जघै इस आदमी कै दे, दे।’ और फिर सरम के मारे तेकै सबसै नीची बारी जघै मै बैठनो पड़ैगो।

¹⁰ और जब तुमकै बुलाओ जावै है तौ जाकै सबसै नीची बारी जघै मै बैठौ, जिस्सै जब तुमकै बुलानै बारो आगो तौ तुमसै कैगो, ‘हे दोस्त, उठ और ऊपर बैठ।’ फिर उन सबके सामने, जो तेरे संग बहाँ पौंहने हौंगे, तेरी इज्‍जत बढ़ैगी।

¹¹ कैसेकै जो कोई अपने आपकै बड़ो बनागो, बौ छोटो करौ जागो; और जो कोई अपने आपकै छोटो बनागो, बौ बड़ो करो जागो।”

ईनाम

¹² तब ईसु नै नौहतो दैनै बारे सै बी कैई, “जब तू दिन कै या रात कै दाबत करै, तौ अपने दोस्तौ या भईया या टब्बर या सेट पड़ोसिऔं कै ना बुला, कहीं ऐंसो ना हो, कै बे बी तेकै नौहतो दैं, और तेरो बदलो हो जाय।

¹³ पर जब तू दाबत करै तौ, दीन दुखिऔं, अपाहिजौ, लंगड़ौं और अन्धौ कै बुला।

¹⁴ तब तू धन्‍न होगो, कैसेकै उनके धौंरे तेरो बदलो चुकानै के ताँई कुछ बी ना है, पर तेकै धरमी लोगौं के फिर जी उठनै के टैम मै इस बात को ईनाम मिलैगो।”

बड़ी दाबत की दासतान

¹⁵ फिर उसके संग रोटी खा रए लोगौ मै सै एक नै जौ सुनकै ईसु सै कैई, “हर बौ आदमी धन्‍न है, जो परमेसर के राज मै रोटी खागो।”

¹⁶ तब ईसु नै उस्सै कैई, “एक आदमी किसी बड़ी दाबत की तईयारी कर रओ हो, उसनै भौत से लोगौ कै नौहतो दओ।

¹⁷ जब रोटी तईयार हो गई, तौ बानै अपने नौकर के हात नौहतरिऔं कै बुलाबो भेजो कै, ‘आ जाऔ; अब रोटी तईयार है।’

¹⁸ पर बे सबके सब आनाकानी करल लगे, पैले नै उस्सै कैई, ‘मैंनै एक खेत मोल लओ है, मैंकै बौ बी देखनो है, मैं तेसै बिनती कर रओ हौं, मैंकै माफ कर दे।’

¹⁹ फिर दूसरे नै कैई, ‘मैंनै पाँच जोड़ी बैल मोल लए हैं, मैं तौ बस उनकै परखनै जाई रओ हौं, मैं तेसै बिनती कर रओ हौं, मैंकै माफ कर दे।’

²⁰ एक और नै कैई, ‘मैंनै अबी बिहा करो है, इसताँई मैं ना आ सकतो।’

²¹ उस नौकर नै आकै अपने मालिक कै जे बात कैह सुनाई, तब घर के मालिक नै घुस्सा मै आकै अपने नौकर सै कैई, ‘जल्दी सैहर के गली मौहल्‍लौ मै जा और कंगालौ, अपाहिजौ, लंगड़ौं और अन्धौ कै हिंया ले आऔ।’

²² नौकर नै फिर कैई, ‘हे मालिक, जैसे तैनै कैई ही, बैसेई करो गओ है; फिर बी जघै बची है।’

²³ फिर मालिक नै नौकर सै कैई, ‘सड़कौं और खेतौ की मैड़ौ तक जाकै लोगौ सै बिनती करौ और हिंया बुला लाऔ, जिस्सै मेरो घर भर जाय।

²⁴ और मैं तुमसै कैरओ हौं जो पैले बुलाए गए हे उनमै सै एक बी मेरी दाबत कै चख बी ना सकैगो।’”

चेला बन्‍नै की कीमत

²⁵ और ईसु के संग बड़ी भीड़ जा रई ही, तौ बानै पीछे मुड़कै उनसै कैई।

²⁶ “अगर कोई मेरे धौंरे आनो चाँहै है, और अपने अईया-अब्बा, बईयर और बालकौ, और अपने भईया और बहनौ, और अपनी जान कै बी मैंसै जादा पियार करै है, तौ बौ मेरो चेला ना बन सकै है।

²⁷ और जो अपनो कुरूस लेकै मेरे पीछे ना चलै है, तौ बौ मेरो चेला ना हो सकै है।

²⁸ तुम्मै सै कौन है कै बड़ो घर बनानो चाहतो हो, और पैले बैठकै खरचा ना जोड़ ले, कै पूरो कन्‍नै के ताँई मेरे धौंरे हिसाब किताब है कै ना?

²⁹ कहीं ऐंसो ना हो, कै जब नीह डारकै पूरो ना कर सकै, तौ सब देखनै बारे जौ कैह कै मजाक ना उड़ाल लगैं कै,

³⁰ ‘जौ आदमी बनानै तौ लगो, पर पूरो ना कर सको?’

³¹ या कौन ऐंसो राजा है, कै दूसरे राजा सै लड़ाई कन्‍नै जा रओ हो, और पैले बैठकै बिचार ना कल्‍ले कै अपने दस हजार सिपाईऔं के संग लेकै दूसरे बीस हजार सिपाईऔं के संग सामनो कर सकौं हौं, कै ना?

³² अगर बौ लड़ाई ना कर सकै है तौ, उसको दुसमन राजा अबी रस्ता मैई होगो, तौ बौ सान्‍ति दूत भेजकै मेल-मिलाब कन्‍नो चाँहैगो।

³³ इसई रीती सै तुम्मै सै जो कोई अपनो सब कुछ ना छोड़ैगो, तौ बौ मेरो चेला ना हो सकै है।

नौन की दासतान

³⁴ “नौन तौ अच्‍छो है, लेकन अगर नौन को सबाद बिगड़ जाय, तौ उसकै नमकीन किस चीज सै करो जागो?

³⁵ बौ ना तौ खेत के ताँई और ना खात के ताँई काम मै आवै है: उसकै लोग ऐंसेई बाहार फैंक देवै हैं, जिसके सुन्‍नै के कान हौं बौ सुन ले।”