लूका 13 - बुक्सा

अपने पापौं सै मन फिराऔ या नास होओ

¹ उस टैम बहाँ खड़े भए कुछ लोगौ नै ईसु सै उन गलील देस मै रैहनै बारे लोगौ के बारे मै चरचा करी, जो पीलातुस नै मरवा डारे हे, जो उस टैम परमेसर के ताँई बलि चढ़ा रए हे।

² जौ सुनकै ईसु नै उनसै कैई, “तुम का सोचो हौ, कै जे गलीली लोग बाकी दूसरे सब गलीली लोगौं सै जादा पापी हे, कै उनके ऊपर ऐंसी बिपदा पड़ी?

³ बिलकुल ना, पर मैं तुमकै कैरओ हौं अगर तुम बी अपने पापौं कै ना छोड़ौगे तौ परमेसर तुम सबई कै बी बैसेई नास कर देगो।

⁴ तुम का समजौ हौ, कै बे अठारै आदमी जो ऐरूसलेम के बाहार सीलोम नाम जघै मै एक ऊँचे गुम्मट के गिन्‍नै सै दबकै मर गए हे, बे ऐरूसलेम के और सब रैहनै बारौं सै जादा पापी हे?

⁵ बिलकुल ना, पर मैं तुमकै कैरओ हौं अगर तुम बी अपने पापौं कै ना छोड़ौगे तौ, तुम बी ऐंसेई नास हो जाऔगे।”

फल ना दैनै बारे अंजीर के पेड़ की दासतान

⁶ फिर बानै एक दासतान कैई, “किसी के अंगूर के बगीचा मै एक अंजीर को पेड़ लगो पड़ो हो, बौ बामै फल ढूंड़नै आओ, पर बाकै कुछ बी ना मिलो।

⁷ तब बानै बगीचा के माली सै कैई, ‘देख, तीन साल सै मैं इस अंजीर के पेड़ मै फल ढूंड़नै आ रओ हौं, पर इसमै मैंकै एक बी फल ना मिलो, इसकै काट दे, कै जौ जमीन कै बी ना घेरे रैह?’

⁸ “माली नै जबाब दओ, ‘हे मालिक, इसकै इस साल तक और रैहन देए कै मैं इसके चारौ लंग गड्‍ढा खोदकै इसमै खात डारौं।

⁹ फिर अगर जौ अगले साल फल दे तौ अच्‍छो है और अगर ना दे तौ तू इसकै काट सकै है।’”

आराम कन्‍नै बारे दिन एक कुबड़ी बईयर को ठीक होनो

¹⁰ किसी पिराथना घर मै आराम कन्‍नै बारे दिन मै ईसु जब उपदेस देरओ हो।

¹¹ तौ बहीं एक बईयर ही जिसमै अठारै साल सै एक कमजोर कन्‍नै बारी गंदी आत्‍मा चिपटी पड़ी ही, जिस्सै बौ कुबड़ी हो गई ही, और किसी तरै सै सीदी खड़ी ना हो सकै ही।

¹² ईसु नै जौ कैते भए बौ अपने धौंरे बुलाई, “जा बेटी, तू अपनी बेमारी सै आजाद हो गई है।”

¹³ तब बानै उसके ऊपर हात रक्‍खे, और बौ तुरन्‍त सीदी खड़ी हो गई और परमेसर की बड़ाई करल लगी।

¹⁴ कैसेकै ईसु नै बौ आराम कन्‍नै बारे दिन ठीक करी ही, इसताँई पिराथना घर को मुखिया घुस्सा सै भरकै लोगौ सै कैललगो, “काम कन्‍नै के छै दिन होवै हैं तौ उनई दिनौ मै आकै ठीक हो जाऔ; पर आराम कन्‍नै बारे दिन मै ना।”

¹⁵ जौ सुनकै परभु जबाब देते भए बोलो, “हे कपटिऔ, का आराम कन्‍नै बारे दिन तुम मै सै हर एक आदमी बैल या गधा कै खूँटा सै खोलकै पानी पिबानै ना ले जावै है?

¹⁶ अब जौ बईयर जो इब्राहिम के बंस की है, जो सैतान नै अठारै साल सै जकड़ खाई ही, का इसकै आराम कन्‍नै बारे दिन बंधनौ सै आजाद ना करो जानो चँईऐ हो?”

¹⁷ जब बानै जे बात कैंई, तौ उसके सब बिरोदी सरमिन्‍दा हो गए। उतै सैरी भीड़ उन अचम्बे कामौ सै जो बौ करै हो, खुसी मनाल लगी।

राई के बीजा और खट्‍टे चून की दासतान

¹⁸ फिर ईसु नै कैई, “परमेसर को राज किसके जैसो है? और मैं उसकी तुलना किस्सै करौं?

¹⁹ बौ राई के बीजा जैसो है, जिसकै किसी नै लेकै अपने खेत मै बो दओ। और बौ बड़ो भओ और एक पेड़ बन गओ। फिर आसमान की चिरईयौ नै उसके डुग्गेऔ मै अपने घोस बना लए।”

²⁰ उसनै फिर कैई, “परमेसर के राज की तुलना मैं किस्सै करौं?

²¹ “जौ उस खट्‍टे चून के हाँई है, जिसकै एक बईयर नै तीन हिस्सा नए चून मै थोड़ो सो मिला लओ और बौ सैरो चून, खट्‍टो हो गओ।”

कुट्‍ट मौहड़ो

²² ईसु सैहरौं और गामौ सै होकै उपदेस करतो भओ ऐरूसलेम की ओर जा रओ हो।

²³ तब किसी नै उस्सै पूँछी, “परभु, का थोड़े सेई आदमिऔ की मुक्‍ति होगी?” बानै उनसै कैई,

²⁴ “कुट्‍ट मौहड़े सै परमेसर के राज मै घुसनै की हर कोसिस करौ, मैं तुमकै बता रओ हौं कै भौस्से लोग भीतर जानै की कोसिस करंगे पर जा ना सकंगे।

²⁵ जब घर के मालिक नै उठकै मौहड़ो बंद कर दओ है, और तुम बाहार खड़े होकै किबाड़ खटखटाकै कैललगौ, ‘हे परभु, हमरे ताँई किबाड़ खोल दे, और बौ जबाब दे, मैं तुमकै ना जानौ हौं, तुम कहाँ के हौ?

²⁶ तब तुम कैललगौगे, कै हमनै तेरे संग खाओ पिओ, और तैनै हमरी गलिऔं मै हमकै उपदेस दओ।

²⁷ पर बौ कैगो, मैं तुमसै कैरओ हौं, मैं तुमकै ना जानौ हौं तुम कहाँ के हौ? हे सब कुकरम कन्‍नै बारौ, तुम सब मैंसै दूर हो जाऔ।’

²⁸ तुम इब्राहिम, इसहाक, याकूब और दूसरे सबई भबिसबानी कन्‍नै बारौं कै परमेसर के राज मै देखौगे, पर तुमकै बाहार ढकेल दओ जागो, जहाँ रोनो और दाँत कटकटानोई होगो।

²⁹ तब पूरब और पच्छिम; उत्तर और दक्‍खन सै लोग परमेसर के राज मै आकै परमेसर के राज की दाबत मै सामिल हौंगे।

³⁰ पर भौत से लोग जिनकी अबी ऐहमियत है उसकी ऐहमियत खतम हो जागी। पर जिनकी ऐहमियत ना है उनकी ऐहमियत होल लगैगी।”

ऐरूसलेम मै ईसु की मौत

³¹ उसई टैम ईसु के धौंरे कुछ फरीसी आए और बासै बोले, “हेरोदेस राजपाल तेकै मार डान्‍नो चाँह रओ है, इसताँई हिंया सै कहीं और चलो जा।”

³² तब बानै उनसै कैई, “तुम जाऔ और उस लौमड़ी हाँई चालाँक हेरोदेस राजपाल कै बतादो, ‘सुन मैं लोगौं मै सै दुसट आत्‍माऔ कै लिकारंगो, मैं आज बी ठीक करंगो और कल बी। फिर तीसरे दिन तक अपनो काम पूरो करंगो।’

³³ फिर बी मैंकै आज, कल और परसौं चलतेई रैहनो होगो। कैसेकै जौ होई ना सकै है कै कोई भबिसबानी कन्‍नै बारो, ऐरूसलेम के बाहार मारो जाय।

³⁴ “हे ऐरूसलेम मै रैहनै बारौं, हे ऐरूसलेम मै रैहनै बारौं, तुम तौ भबिसबानी कन्‍नै बारौं कै मार डारौ हौ, जो तुमरे धौंरे भेजे गए उन लोगौं कै मरते टैम तक पत्‍थर मारौ हौ। कितने फेरी मैंनै जौ चाँहो कै, जैसे मुरगी अपने बच्‍चौं कै अपने पंखौ के नीचे इखट्‍टो करै है, बैसेई मैं बी तेरे बालकौ कै इखट्‍टे करौं, पर तुमनै जौ ना चाँहो।

³⁵ देखौ, अब परमेसर तुमरे ताँई तुमरो मन्‍दर उजड़ो भओ छोड़ रओ है, और मैं तुमसै कैरओ हौं; जब तक तुम ना कैऔगे कै, ‘धन्‍न है बौ, जो परभु के नाम सै आवै है,’ तब तक तुम मैंकै फिर कबी ना देखौगे।”