यहून्‍ना 19 - बुक्सा

ईसु कै सतानो

¹ तब पीलातुस नै ईसु कै पकड़बाकै कोड़ा लगबाऐ।

² और सिपाईऔं नै काँटौ को मुकट बनाकै बाके खोपड़ी मै रक्‍खो और बाकै बैंगनी रंग के लत्‍ता पैहराए,

³ और बे ईसु के धौंरे आकै कैललगे, “हे यहूदिऔं के राजा, परनाम!” और बाकै चाँट मारल लगे।

⁴ और पीलातुस फिर बाहार आओ और बानै कैई, “देखौ, मैं बाकै बाहार तुमरे धौंरे ला रओ हौं, जिस्सै कै तुम जानलो कै मैं बामै कोई दोस ना पावौं हौं।”

⁵ तब ईसु कै काँटौ को मुकट और बैंगनी रंग के लत्‍ता पैहराकै बाहार लाओ गओ और पीलातुस नै लोगौ सै कैई, “देखौ, जौ आदमी।”

⁶ जब मुक्‍ख पुजारिऔं और मन्‍दर के सिपाईऔं नै बौ देखो, तौ जौ कैह कै चिल्‍लाए, “बाकै कुरूस मै चढ़ाऔ, कुरूस मै।” पीलातुस नै उनसै कैई, “तुमई बाकै ले जाऔ और कुरूस मै चढ़ाऔ, कैसेकै मैं बामै कोई दोस ना पावौं हौं।”

⁷ यहूदिऔं नै बाकै जबाब दओ, “हमरो बी एक नियम है और बा नियम के अनुसार जाकै मौत की सजा मिलनी चँईऐ, कैसेकै जौ अपने आपकै परमेसर को लौंड़ा बताबै है।”

⁸ जब पीलातुस नै जौ बात सुनी तौ बौ और बी डर गओ,

⁹ तब बानै फिर महल के भीतर जाकै ईसु सै कैई, “तू कहाँ को है?” पर ईसु नै बाकै कोई जबाब ना दओ।

¹⁰ तब पीलातुस नै बासै कैई, “का तू मैंसै ना बोलैगो? का तू ना जानै है कै मैंकै तेकै छोड़ दैनै को अधकार है और तेकै कुरूस मै चढ़ानै को बी अधकार है?”

¹¹ ईसु नै जबाब दओ, “अगर तेकै परमेसर की ओर सै ना देओ जातो तौ तेरो मेरे ऊपर कोई अधकार ना होतो, इसताँई जिस आदमी नै मैंकै तेरे हात मै दओ है, बाको पाप जादा है।”

¹² जौ सुनकै पीलातुस बाकै छोड़नै के ताँई कोसिस करल लगो। मगर यहूदी लोग चिल्‍लाए “अगर तू जाकै छोड़ै है, तौ तू रोमी समराट कैसर को दोस्त ना है, कोई बी जो अपने आपकै राजा होनै को दाबो करै है, तौ बौ कैसर को बिरोदी है।”

¹³ जब पीलातुस नै जे बात सुनी तौ बौ ईसु कै बाहार बा जघै मै ले गओ और “पत्‍थर को चबूतरा” नाम की नियाय की गद्‍दी मै बैठो। जाकै इबरानी भासा मै “गब्बता” कैओ गओ है।

¹⁴ जौ फसै के तौहार की तईयारी को दिन हो, और कम सै कम दुफैर के बारैह बज रए हे। तब बानै यहूदिऔं सै कैई, “देखौ, तुमरो राजा।”

¹⁵ बे फिर चिल्‍लाए, “जाकै मार दो! जाकै मार दो! जाकै कुरूस मै चढ़ाओ!” पीलातुस नै उनसै कैई, “का मैं तुमरे राजा कै कुरूस मै चढ़ाऔ?” मुक्‍ख पुजारिऔं नै जबाब दओ, “रोमी समराट कैसर कै छोड़कै हमरो कोई दूसरो राजा ना है।”

¹⁶ तब पीलातुस नै कुरूस मै चढ़ानै के ताँई ईसु कै उनकै दे दओ। इसताँई बे ईसु कै ले गए,

ईसु कै कुरूस मै चढ़ाओ जानो

¹⁷ और बौ अपनो कुरूस उठाते भए बा जघै तक गओ जो “खोपड़ी की जघै” कैलाबै ही और जिनकै इबरानी मै “गुलगोता” कैबै हैं।

¹⁸ बहाँ उनौनै ईसु और बाके संग दो और आदमी कुरूस मै चढ़ाऐ एक कै इस ओर और दूसरे कै उस ओर और बीच मै ईसु कै।

¹⁹ पीलातुस नै एक तक्‍ती मै लिखकै कुरूस मै टांग दई। और बामै जौ लिखो भओ हो, “नासरत को ईसु, यहूदिऔं को राजा।”

²⁰ इसताँई तक्‍ती भौत से यहूदिऔं नै पढ़ी, कैसेकै जिस जघै मै ईसु कुरूस मै चढ़ाओ गओ हो बौ ऐरूसलेम सैहर के धौंरे हो, और जौ इबरानी, लातीनी और यूनानी भासा मै लिखो हो।

²¹ इसताँई यहूदिऔं के मुक्‍ख पुजारिऔं नै पीलातुस सै कैई, “‘यहूदिऔं को राजा’ मत लिख, पर बौ लिख जो बानै कैई ही, ‘मैं यहूदिऔं को राजा हौं।’”

²² पीलातुस नै जबाब दओ, “जो मैंनै लिख दओ तौ लिख दओ।”

²³ सिपाईऔं नै जब ईसु कुरूस मै चढ़ा दओ तौ उनौनै बाके लत्‍ता उतारे और उनके चार हिस्सा करे, हर एक सिपाई के ताँई एक-एक हिस्सा, ऐंसेई चोला बी लेओ, पर चोला बिना सीमन को ऊपर सै नीचे तक बिनो भओ हो।

²⁴ इसताँई उनौनै एक दूसरे सै कैई, “हम जाकै ना फाड़ै, पर जाके ताँई, परची डारै हैं कै जौ किसको होगो,” जिस्सै कै पबित्‍तर सास्तर की बात पूरी हो “उनौनै मेरे लत्‍ता आपस मै बाँट लए, और मेरे लत्‍ता के ताँई परची डारीं” और सिपाईऔं नै ऐंसोई करो।

²⁵ पर ईसु के कुरूस के धौंरे बाकी अईया, और बाकी अईया की बहन, कलोपास की बईयर मरियम, और मरियम मगदलनी खड़ी हीं।

²⁶ तौ जब ईसु नै अपनी अईया, और बा चेला कै जिस्सै बौ पियार करै हो, धौंरे खड़े भए देखे, तौ अपनी अईया सै कैई, “हे नारी! देख, जौ तेरो लौंड़ा।”

²⁷ तब बानै बा चेला सै कैई, “देख जौ तेरी अईया है।” और बाई टैम सै बौ चेला बाकै अपने घर ले गओ।

ईसु को मरनो

²⁸ जाके बाद ईसु नै जौ जानकै कै सब कुछ पूरो हो गओ है, तौ बानै पबित्‍तर सास्तर की बात पूरी होनै के ताँई कैई, “मैं पियासो हौं।”

²⁹ बहाँ अंगूर को सिरका सै भरो भओ एक बरतन रखो भओ हो, और उनौनै सिरका मै सोक्‍ता भिजा कै डन्डा मै रखो और बाके मौह मै लगाओ।

³⁰ जब ईसु नै बौ सिरका लेओ तौ कैई, “पूरो भओ” और बानै खोपड़ी झुकाई और अपनी आत्‍मा सौंप दई।

³¹ इसताँई कै बौ फसै के तौहार की तईयारी को दिन हो, इसताँई यहूदिऔं नै पीलातुस सै बिनती करी कै तू जौ हुकम देकै उनकी टांग तोड़ दई जाऐ जिस्सै उनकी लाहस बहाँ सै उतारी जाय कै आराम कन्‍नै बारे दिन लाहस कुरूस मै ना रैहए, कैसेकै आनै बारो आराम कन्‍नै को बौ दिन भौत खास हो।

³² तब सिपाईऔं नै आकै पैले की और फिर दूसरे की बी जो ईसु के संग कुरूस मै चढ़ाए गए हे, टांग तोड़ी,

³³ पर जब उनौनै ईसु कै धौंरे से आकै देखो कै बौ मर चुको है, तौ बाकी टांग ना तोड़ी,

³⁴ पर सिपाईऔं मै सै एक नै बाकी पसरी मै भालो बारो, और तुरन्‍त बामै सै खून और पानी लिकरल लगो।

³⁵ जिसनै जौ देखो है बानै जाकी गभाई दई है, और बाकी गभाई सच्‍ची है, और बौ जानै है कै बौ सच कैरओ है, जिस्सै कै तुम बी बिसवास कर सकौ।

³⁶ जे बात इसताँई भंई कै पबित्‍तर सास्तर को जौ बचन पूरो हो, “बाकी एक बी हड्‍डी तोड़ी ना जागी।”

³⁷ और पबित्‍तर सास्तर मै एक और जघै जौ बी लिखो है, “जिसकै उनौनै भालो बारो हो, बे बाकी ओर देखंगे।”

ईसु कै दफनाओ जानो

³⁸ इसके बाद अरमतिआ के यूसप नै, जो यहूदिऔं के डर सै गुप्‍त रूप सै ईसु को चेला हो, बानै पीलातुस सै ईसु की लाहस कै लेजानै की बिनती करी और पीलातुस नै आगियाँ दे दई। तब बौ आकै ईसु की लाहस कै ले गओ।

³⁹ और नीकुदेमुस बी, जो पैले ईसु के धौंरे रात मै आओ हो, बौ कम सै कम तीस किलो गन्धरस और एलोब मिलाए भए खसबोईदार मसाले लेकै आओ।

⁴⁰ तब उनौनै ईसु की लाहस लेई और यहूदिऔं के दफनानै की रीति के अनुसार बौ खसबोई बारी चीज के संग कफन मै लपेटो।

⁴¹ बा जघै मै जहाँ बौ कुरूस मै चढ़ाओ गओ हो बहाँ एक बगीचा हो, और बगीचा मै एक नई कबर ही जिसमै अबी तक कोई बी ना रखो गओ हो।

⁴² और यहूदिऔं के आराम कन्‍नै की तईयारी के दिन के कारन, और इसताँई कै बौ कबर धौंरेई ही, उनौनै ईसु कै बामै रख दओ।