याकूब 5 - बुक्सासेट आदमिऔ कै चितौनी 1 हे सेट आदमिऔ मेरी बात सुनौ, तुम लोगौ कै रोनो और चिल्लानो चँईऐ, कैसेकै तुमरे ऊपर मुसीबत आनै बारी हैं। 2 तुमरी धन-दौलत सड़ गई है, और तुमरे लत्तौ कै कीड़ा खा गए हैं। 3 तुमरे सौने चाँदी मै जिंगाल लग गई है, और बौ जिंगाल तुमरे खिलाप गभाई देगी, और बौ आग के हाँई तुमरो मांस कै खा जागी। कैसेकै तुम लोगौ नै आखरी के दिनौ मै धन-दौलत को ढेर लगाओ है। 4 देखौ, जिन मजदूरौ नै तुमरे खेतौ की फसल काटी और तुमनै उनकी डिहाड़ी धोको देकै रख लई है, बे चिल्लाकै रो रए हैं और उनकी चीख पुकार सरब सकतिमान परभु के कानौ तक जा रई है। 5 तुमनै धरती मै सुक और मजे की जिन्दगी जी लई है, और तुमनै अपने सरीर कै आखरी के दिन मै कटनै के ताँई मोटो करो है। 6 तुमनै धरमी आदमी कै दोसी ठैराकै मार डारो; पर बानै तुमरे खिलाप कुछ काम ना करो। दुख मै सबर रक्खौ 7 इसताँई मेरे भईयौ, परभु ईसु मसी के फिर सै आनै तक सबर रक्खौ, देखौ, किसान जो अपने खेत की फसल कै पकनै को पैंड़ो देखै है, तौ बा सुरू की बरखा सै लेकै बाद की बरखा के आनै तक सबर रक्खै है। 8 तुम लोग बी सबर रक्खौ, और हिम्मत ना हारौ, कैसेकै परभु को फिर सै आनै को बखत धौंरेई है। 9 हे भईयौ, एक दूसरे के खिलाप कुड़कुड़ाऔ ना, जिस्सै कै तुम दोसी ना बन जाऔ। देखौ, नियाय कन्नै बारो मौहड़े मैई खड़ो है। 10 हे भईयौ, उन भबिसबानी कन्नै बारौ कै याद रक्खौ जिनौनै परभु के नाम सै बात बताँई, और जिनौनै दुख और मुसीबत सैहईं। उनको सबर और दुख सैहनो तुमरे ताँई एक मिसाल है। 11 देखौ, सबर रखनै बारौ कै हम धन्न कैबै हैं। तुम लोगौ नै आयूब के सबर के बारे मै तौ सुनोई है, और परभु नै आखरी मै बाकै बाको ईनाम बी दओ, बाकै बी तुम जानौ हौ। कैसेकै परभु बेसानी तरस खानै बारो और दया कन्नै बारो है। 12 हे मेरे भईयौ, सबसै बड़ी बात तौ जौ है कै कसम ना खाऔ; ना सुरग की, ना धरती की, और ना किसी और चीज की। पर तुमरी बात हाँ की हाँ, या ना की ना मै हो, कहीं ऐंसो ना होए कै तुमकै सजा मिलै। बिसवास की पिराथना 13 अगर तुम्मै सै कोई दुखी होए तौ बौ पिराथना करै, अगर कोई खुस होए, तौ बौ परमेसर के भजन गाऐ। 14 अगर तुम्मै सै कोई बेमार है, तौ बौ बिसवासिऔ की मंडली के मुखियौं कै बुलाऐ और बे परभु के नाम सै पिराथना करैं और बाके ऊपर तेल लगाऐ। 15 और बिसवास की पिराथना सै बेमार आदमी ठीक हो जागो और परभु बा बेमार कै उठाकै खड़ो करैगो। और अगर बानै पाप करे बी हौंगे तौ परभु उनकै बी माफ कर देगो। 16 इसताँई तुम लोग एक दूसरे के सामने अपने अपने पापौं कै मान लो; और एक दूसरे के ताँई पिराथना करौ, जिस्सै कै तुम लोग ठीक हो जाऔ। धरमी आदमी की पिराथना भौत सकतिसाली और असरदार है। 17 एलिया बी तौ हमरेई हाँई एक आदमी हो जिसनै पिराथना करी कै बरखा ना बरसै, और साड़े तीन बरस तक धरती मै बरखा ना पड़ी। 18 और बानै फिर पिराथना करी, तौ आसमान सै बरखा बरसी और धरती मै फसल जमल लगी। 19 हे मेरे भईयौ, अगर तुम लोगौ मै सै कोई सच्चाई की रस्ता सै भटक जाय, और कोई दूसरो बाकै बापस लौहटार लाए। 20 तौ बौ जौ जान ले कै जो आदमी किसी पापी कै पाप की रस्ता सै लौहटार लाबै है, तौ बौ बाके आत्मा कै हमेसा की मौत सै बचावै है और उनके पापौं कै ढक देवै है। |
New Life Compute Institute [NLCI] - CC BY-NC-ND 4.0