याकूब 4 - बुक्सा

परमेसर के ताँई जिऔ

¹ तुमरे बीच मै लड़ाई और बैहसबाजी की बजै का है? कहीं जौ तुमरे भीतर की बुरी इच्‍छा की बजै सै तौ ना है?

² तुम जब किसी चीज कै पानै के ताँई इच्‍छा करौ हौ, और जब बौ तुमकै ना मिल पावै है, तौ तुम खून करौ हौ। और जिस चीज के ताँई जरन रक्‍खौ हौ, पर बौ तुमकै ना मिल पावै है, तौ इसताँई तुम लड़ाई और बैहसबाजी करौ हौ। तुम माँगौ ना हौ, इसताँई तुमकै कुछ ना मिलै है।

³ जब जो कुछ तुम माँगौ हौ, तौ बाकै बुरी इच्‍छा सै माँगौ हौ। कैसेकै तुम बाकै अपनी बुरी इच्‍छाऔं कै पूरो कन्‍नै के ताँई माँगौ हौ इसताँई तुमकै ना मिलै है।

⁴ बैबिचार कन्‍नै बारौ का तुम जौ ना जानौ हौ, कै दुनिया सै दोस्ती कन्‍नी परमेसर सै दुसमनी कन्‍नै के बराबर है? इसताँई जो कोई दुनिया सै दोस्ती कन्‍नो चाँहै है बौ परमेसर को दुसमन बन जावै है।

⁵ का तुम पबित्‍तर सास्तर की जा लिखी भई बात कै बेकार समजौ हौ? जो आत्‍मा परमेसर नै हमरे भीतर दई है, बौ हम सै पूरी इच्‍छा रक्‍खै है कै हम बिसवासजोग बने रैह।

⁶ परमेसर तौ हमरे ऊपर और बी जादा किरपा करै है; इसताँई पबित्‍तर सास्तर मै कैओ गओ है, “परमेसर घमंड कन्‍नै बारौ के खिलाप है, पर दीन आदमिऔ की भौत सायता करै है।”

⁷ इसताँई परमेसर के आधीन रैहऔ। सैतान को सामनो करौ, तौ बौ तुमरे धौंरे सै भाज जागो।

⁸ परमेसर के धौंरे आऔ, तौ बौ बी तुमरे धौंरे आगो; अरे पापिऔं, अपने हात सुद्‍द करौ; और हे दो मन बारे लोगौं अपने आपकै पबित्‍तर रक्‍खौ।

⁹ दुखी होओ, रोबौ और मातम मनाऔ, तुमरी हसी रोनै मै और खुसी दुख मै बदल जाय।

¹⁰ परभु के सामने दीन आदमी बनौ, तौ बौ तुमकै ऊँचे पद मै पौंचागो।

भईयौ के ऊपर दोस लगानो

¹¹ हे भईयौ, एक दूसरे की बदनामी ना करौ, जो अपने भईया की बदनामी करै है, या भईया के ऊपर दोस लगाबै है, तौ बौ परमेसर के नियम के खिलाप बोलै है। अगर तुम नियम मै दोस लगाबौ हौ, तौ तुम नियम मै चलनै बारे ना हौ पर बाके ऊपर दोस लगानै बारे हौ।

¹² नियम कै दैनै बारो और नियाय कन्‍नै बारो तौ परमेसरई है, जिसके धौंरे बचानै और नास कन्‍नै दौनौ की सकति है। पर अपने पड़ोसी के ऊपर दोस लगानै बारो तू कौन होवै है?

घमंड के खिलाप चितौनी

¹³ सुनौ, तुम लोग जो ऐंसो कैबौ हौ कै, हम आज या कल किसी दूसरे सैहर मै जाकै बहाँ एक बरस तक रैहकै और कारोबार करकै पैसा कमांगे।

¹⁴ मगर तुम जौ ना जानौ हौ कै कल तुमरी जिन्‍दगी मै का होगो; सुनौ, तुम तौ बा कौहौल के हाँई हौ जो थोड़ी देर ताँई आवै है और फिर खतम हो जावै है।

¹⁵ इसताँई तुमकै जौ कैनो चँईऐ कै, “अगर परभु की मरजी होगी, तौ हम जिन्‍दे रैहंगे और जौ या बौ काम करंगे।”

¹⁶ पर अब तुम अपने घमंड के ऊपर सेकी मारौ हौ। ऐंसो हर तरै को घमंड बुरो होवै है।

¹⁷ और जो आदमी जौ जानै है कै बाकै भलाई कन्‍नी चँईऐ, मगर बौ ना करै है, तौ बौ पाप कर रओ है।