इबरानिओ 9 - बुक्सादुनिया को तम्बू 1 बा पैले के करारनामो मै बी आराधना के नियम हे और धरती मै पबित्तर तम्बू बी हो। 2 बा तम्बू के पैले कमरा मै दीपदान, मेज, और बा मेज मै चढ़ाबे की रोटी कै रक्खै हे और जाकै पबित्तर जघै कैओ जावै हो। 3 और जा कमरा के बाद एक परदा हो और बा परदा के पिच्छे दूसरो कमरा हो जिसकै सबसै पबित्तर जघै कैबै हे। 4 उसमै खसबोई बारी चीजौ कै जरानै के ताँई सौने की धूपदानी ही और चारौ लंग सै सौने सै मढ़ो भओ बाचा को सन्दूक, जिसमै मन्ना सै भरो सौने को बरतन, हारून की लठिया जिसमै कन्छी लिकरी हीं और बे पत्थर की तकती जिसमै करारनामो लिखो भओ हो। 5 और सन्दूक के ऊपर खूब चमकदार करूब नै अपने पंखौ की छाँई सै “दया की जघै” कै ढकर खाओ हो। पर इन चीजौ के बारे मै अबी मैं खुल कै ना कैह सकौ हौं। 6 इन सिगरी चीजौ की तईयारी के बाद पुजारी लोग हरदम तम्बू के पैले कमरा मै सेवा को काम करै हैं। 7 पर जो तम्बू के भीतर को कमरा है बामै सिरप बड़ो पुजारी साल मै एक दफै जावै है और बौ खून लेए बिना ना जावै है और बा खून कै अपने पापौं के ताँई और अनजाने मै करे भए लोगौ के पापौं के ताँई चढ़ाबै है। 8 इस्सै पबित्तर आत्मा जौ दिखाबै है कै, जब तक लै तम्बू को पैलो कमरा है तब तक भीतर के सबसै पबित्तर कमरा के मौहड़े बन्द हैं। 9 जौ तम्बू तौ जा बखत के ताँई एक चिन्न है जो जौ दिखाबै है कै, चढ़ाबो और बलि जो चढ़ाए जावै हैं बे आराधना कन्नै बारे मन कै सिद्द ना कर सकै हैं। 10 जे तौ सिरप खानै पीनै की चीजौ और अगल अगल तरीका सै नाहनै-धोनै के सरीर के नियम हैं, जे नियम तौ चलते रैहबै हैं जब तक कै नए बिधि-बिधान ना आ जांऐ। सुरग को तम्बू 11 पर जब मसी अच्छी चीजौ को बड़ो पुजारी बनकै आओ तब बौ बा बढ़िया और सबसै अच्छे तम्बू मै सै होकै आओ जो आदमी के हात सै बनाओ भओ ना हो यानी जा दुनिया को ना। 12 बौ बकरौ के और बछड़ौ के खून के दुआरा ना पर हमेसा के ताँई एकई दफै अपने खून के दुआरा बा सबसै पबित्तर जघै मै पौंचो और हमरे ताँई बौ हमेसा को छुटकारो लाओ। 13 कैसेकै अगर रीति-रिबाज की बजै सै अपबित्तर भए लोगौ के ऊपर बकरौ, बैलौ को खून और बछिया की छार कै छिड़कनै सै बे लोग सरीर सै सुद्द होवै हैं तौ, 14 मसी को खून भौत कुछ कर सकै है, मसी तौ हमेसा की आत्मा के दुआरा हमरे परमेसर के सामने निरदोस चढ़ाबो करकै खुद कै चढ़ाओ, तब तौ बाको खून जरूर मौत की ओर लेजानै बारे कामौ सै हमरे मन कै सुद्द करैगो, जिस्सै हम जिन्दे परमेसर की सेवा करैं। 15 इसताँई मसी नए करारनामे को बिचौंदिया बनो। जिस्सै कै जिन लोगौ कै बुलाओ गओ है बे लोग परमेसर के बादे करे भए हमेसा की बिरासत के हकदार बनै कैसेकै जिन्नै पैले करारनामे के हक मै रैहते भए पाप करो है उनकै बासै छुटकारे के ताँई मसी नै अपनी जान दे दई। 16 और अगर बसीयत लागू होनी है तौ जिसनै बसीयत लिखर खाई है, बाके मरनै को पक्को सबूत होनो जरूरी है, 17 बाके मरनै के बाद बसीयत पक्की ठैरैगी। जब तक बसीयत कै लिखनै बारो जिन्दो है तब तक बा बसीयत की कोई ऐहमियत ना है। 18 इसताँई पैलो करारनामो बी खून सै लागू भओ। 19 जब मूसा लोगौ कै नियम की सिगरी आगियाँ की बातौं कै सुना चुको, तौ तबई बानै पानी के संग बकरौ को और बछड़ौ को खून लओ और बाकै लाल ऊन और हिसप पौधा की डुग्गिऔ सै नियम की किताब मै और लोगौ के ऊपर छिड़को। 20 और बानै कैई कै, “जौ बा करारनामे को खून है जिसको हुकम परमेसर नै तुमकै दओ है।” 21 और बानै तम्बू और बाके भीतर की सैरी सेवा की चीजौ के ऊपर बी जौई खून छिड़को हो। 22 नियम के हिसाब सै लगभग सिगरी चीज खून के दुआरा सुद्द करी जावै हैं। पर पाप की माफी बगैर खून बहाए ना मिलै है। मसी के खून दुआरा पाप सै माफी 23 तबई जौ जरूरी है कै जो चीज सुरग की चीजौ के हाँई हैं उनकै इनई बलिदानौ के दुआरा सुद्द करो जाऐ, पर सुरग की चीजौ कै तौ इनसै बी अच्छे बलिदानौ के दुआरा सुद्द करो जावै है। 24 कैसेकै मसी आदमी के हात सै बनाई भई पबित्तर जघै मै ना गओ जो सच्चे पबित्तर जघै की एक नकल है। पर अब हमरी ओर सै बौ परमेसर के सामने परकट होनै के ताँई सुरग मै गओ। 25 जैसे बड़ो पुजारी हर साल दूसरे को खून लेकै सबसै पबित्तर जघै मै जावै है बैसेई मसी सुरग मै अपने आपकै हर साल बेरमबेरा चढ़ानै के ताँई ना गओ। 26 अगर ऐंसो है तौ जब सै दुनिया बनी ही तब सै मसी कै बेरमबेरा दुख झेलनो पड़तो। पर अब युग के अन्त मै बानै खुद की बलि के दुआरा पापौं कै खतम कन्नै के ताँई एकई दफै परकट करो। 27 और जैसे आदमिऔ के ताँई एक दफै मरनो और बाके बाद नियाय को होनो पक्को है, 28 बैसेई मसी नै बी भौस्से लोगौ के पापौं के ताँई एकई दफै अपनी बलि चढ़ाई। अब बौ दूसरी दफै पाप की बलि चढ़नै के ताँई ना आगो पर जो लोग बाको पैंड़ो देख रए हैं उनकै बचानै के ताँई आगो। |
New Life Compute Institute [NLCI] - CC BY-NC-ND 4.0